Varavinnuafl á Íslandi

Gissur Pétursson, forstjóri Vinnumálastofnunar, segist geta svaraði því bæði játandi og neitandi að erlent starfsfólk hér á landi sé varavinnuafl fyrir íslenskan vinnumarkað. Ragnar Árnason, forstöðumaður vinnumarkaðssviðs Samtöka atvinnulífsins, segir íslensk lög tvímælaust gera ráð fyrir því að erlendir starfskraftar séu ekkert annað en varavinnuafl, þar sem útlendingarnir fái ekki atvinnuleyfi hér á landi nema Íslendingar fáist ekki í starfið sem þeir sækjast eftir. Gissur segir Vinnumálastofnun eðli sínu samkvæmt fyrst og fremst einblína á atvinnumálin. Fjöldi útgefinna atvinnuleyfa hverju sinni ráðist af því hvort í landinu sé atvinnuleysi eða hvort skortur sé á starfsfólki. Á síðustu misserum hafi þúsundir útlendinga bæst við vinnuaflið á Íslandi, fyrst og fremst til þess að fullnægja skammtímaeftirspurn eftir vinnuafli. Hins vegar sé óljóst hvort allir þessir útlendingar fari aftur úr landi þegar stórum framkvæmdum við Kárahnjúka og víðar verður lokið innan fárra ára. Þetta sögðu þeir Gissur og Ragnar á fundi um málefni innflytjenda sem haldinn var í húsakynnum Reykjavíkurakademíunnar í gær. "Þetta fólk er varavinnuafl," sagði Halldór Grönvold, aðstoðarframkvæmdastjóri Alþýðusambands Íslands. Hann sagði að á síðustu misserum hefðu æ fleiri útlendingar komið hingað til að vinna. Útlendingar sem fyrirtæki níðist á, bjóði lág kjör og lítil réttindi. Katrín Theódórsdóttir lögfræðingur segir afskaplega erfitt fyrir útlendinga að koma hingað til lands á eigin vegum. Hún hefur aðstoðað marga einstaklinga við að sækja um dvalarleyfi og reynslan segir henni að þótt löggjöfin sé afar ströng, þá sé framkvæmd laganna mun harkalegri en lögin gefi tilefni til. Þarfir stórfyrirtækja ráði þar ferðinni frekar en aðstæður þeirra einstaklinga sem hingað koma.