Senda Thatcher hlýjar kveðjur

Fjölmargir hafa sent Margréti Thatcher hlýjar kveðjur á sjúkrahúsið þar sem hún var lögð inn í gær. Járnfrúin gamla virðist ætla að hrista af sér þessi veikindi eins og svo margt annað.

Margrét Thatcher, var flutt á sjúkrahús eftir að hún fékk aðsvif, þar sem hún var á hárgreiðslustofu, í gær. Læknar segja að hún hafi átt rólega nótt á sjúkrahúsinu, og verði að öllum líkindum útskrifuð, í dag.

Thatcher, sem nýlega varð áttræð, var sterkasti stjórnmálamaður Bretlands á síðari hluta síðustu aldar. Hún hlaut viðurnefnið Járnfrúin vegna vegna hörku sinnar, og var ýmist dáð eða hötuð.

Hún braut verkalýðshreyfinguna á bak aftur og batt þannig enda á stöðug verkföll sem höfðu leikið efnahar Bretlands grátt. Þá stýrði hún þjóð sinni í gegnum Falklandseyjastríðið við Argentínu.

Þótt Thatcher sé andlega hress, hefur heilsu hennar að sögn nokkuð hrakað síðan Dennis, eiginmaður hennar lést, fyrir tveimur árum.