Unnið að leiðréttingum á umfjöllun

Bláa lónið er meðal ofmetnustu ferðamannastaða heims, segir blaðamaður breska stórblaðsins Sunday Times eftir heimsókn í lónið. Honum fannst það skítugt, alltof troðið af fólki og óaðlaðandi á allan hátt. Framkvæmdastjóri lónsins er mjög ósáttur við umfjöllunina og segir unnið að leiðréttingum. Í úttekt Sunday Times er Bláa lónið efst á lista yfir þá ferðamannastaði í heiminum sem ekki standi undir væntingum. Segir blaðamaðurinn að í ótal auglýsingum sé lóninu lýst sem sælustað fyrir líkama og sál en veruleikinn sé allur annar. Búningsklefarnir séu þröngir og illa lyktandi og það sé fjarri því að hann hafi fyllst vellíðan þegar hann hafi stigið ofan í lónið. Þvert á móti hafi honum liðið eins og hann gengi á lifur og þá hafi fjöldi ungra karla verið í lóninu með tilheyrandi látum og var blaðamaður ekki frá því að einn þeirra, með fjarrænt augnaráð, hefði verið að míga í lónið. Blaðamaðurinn hélt út í fimm mínútur. Grímur Sæmundsen, framkvæmdastjóri Bláa lónsins, er eðli málsins samkvæmt afar óánægður með umfjöllunina. Hann segir að yfir 350 þúsund gestir heimsæki Bláa lónið árlega og aðstandendur þess geti ekki stjórnað upplifun hvers og eins einasta gests en þeir hljóti að bregðast við ef farið sé með rangfærslur. Grímur segir blaðamanninn vera með persónulegar hugleiðingar sem séu vægast sagt mjög óviðeigandi og því hafi forsvarsmenn Bláa lónsins orðið fyrir vonbrigðum. Grími finnst vegið að íslenskri ferðaþjónustu í heild þar sem gefið sé í skyn að verið sé að bjóða vöru sem ekki standi undir nafni. Hann segir það samt rétt að stundum sé mjög margt fólk í lóninu í einu en það fylgi vinsælum ferðamannastöðum. En hafa verið gerðar einhverjar athugasemdir? Grímur segir að unnið sé að því í samráði við sendiráð Íslands í Lundúnum að gera athugasemdir við greinina og hann viti að samstarsaðilar Bláa lónsins í ferðaþjónustu hafi þegar sent ritstjórum Sunday Times athugasemdir, t.d. Icelandair.