Samstarf Breiðabliks og Augnabliks

Knattspyrnudeild Breiðabliks og knattspyrnufélagið Augnablik hafa skrifað undir samning um samstarf félaganna á knattspyrnusviðinu. Helstu atriði samningsins eru að Breiðablik mun lána Augnablik leikmenn sem af ýmsum ástæðum ekki komast að hjá Blikaliðinu. Breiðablik mun einnig aðstoða Augnablik varðandi vallarmál og æfingaaðstöðu í samvinnu við rekstrarnefnd Fífunnar og vallaryfirvöld í Kópavogi. Augnablik var stofnað af ungum Blikum fyrir tæpum 25 árum í nánu samstarfi við knattspyrnudeild Breiðabliks. Félagið hafði legið í dvala í nokkur ár þegar nokkrir ungir og vaskir menn ákváðu að reisa það úr öskustónni sl. haust og spila undir merkjum félagsins í 3. deildinni á komandi sumri. Þess má geta að 2. flokkur Breiðabliks og Augnablik áttust við í æfingaleik í Fífunni um nýliðna helgi. Einkenndist leikurinn fyrst og fremst af sterkum varnarleik beggja liða, enda var niðurstaðan markalaust jafntefli. Með smá heppni hefðu Breiðabliksstrákarnir þó átt að tryggja sér sigur.