Njósnahneyksli

 Valerie Plame var árum saman njósnari hjá CIA. Hún sinnti leyniverkefnum og beitti AK-47 hríðskotariffli af mikilli færni. En hefur nú látið af störfum eftir að flett var ofan af henni í bandarískum fjölmiðlum. Það er brot á alríkislögum og var hafin rannsókn á lekanum.   Blaðamennirnir sem greindu frá upplýsingunum voru þvingaðir til að greina frá uppljóstraranum eða sæta fangelsisvist, sem sumir þeirra kusu reyndar. Og heimildarmaðurinn reyndist vera, Karl Rove, nánasti ráðgjafi og samstarfsmaður Bush Bandaríkjaforseta. Rove hefur aneitað því að vera heimildarmaðurinn, en málið hefur engu að síður valdið miklu fjaðrafoki í Washington. Eiginmaður Plame er Joe Wilson, fyrrverandi sendiherra sem gagnrýndi harðlega fullyrðingar stjórnar Bush um kjarnorkuvopnaeign Íraka. Hvíta húsið átti erfitt með að svara áskökunum hans og svo virðist sem ákveðið hafi verið að grípa til hefnda. Hefndin fólst í því að fletta ofan af Plame og valda þar með uppnámi sem skyggði á gagnrýni Wilsons.   Fáir vita um njósnara CIA og því beindist grunur að háttsettum embættismönnum, meðal annars Rove. Talsmenn Hvíta hússins hafa hins vegar ítrekað undanfarin misseri þvertekið fyrir að Rove hefði neitt með málið að gera, en nú virðist sem það sé ekki satt. Blaðamannahersveitin í Hvíta húsinu lítur nú svo á að Scott McClellan, talsmaður Bush og fleiri hafi logið blákalt að fréttamönnum og um leið að þjóðinni. Því er krafist svara með hörku sem ekki hefur sést lengi - líkast til ekki síðan á dögum Lewinsky hneykslis Clintons forseta. Bush forseti hefur áður sagt að hann myndi reka þann sem lak upplýsingunum og í gær sagði hann að réttast væri að bíða þar til rannsókninni lyki áður en ályktanir yrðu dregnar. Hann sagðist ekki þekkja staðreyndir og vill kynna sér þær frá þeim sem rannsaka málið. Hann vill að þessu ljúki sem fyrst og hafi einhver framið glæp mun hann ekki starfa í ríkisstjórninni.   Grunur um pólitíska hefndaraðgerð og lygar vekur spurningar um hvort áður hafi verið farið frjálslega með sannleikann í Hvíta húsinu. Tortryggnin í Washington nær nýju hámarki og næsta víst að málinu sé ekki lokið.