Benitez styður Morientes

Rafael Benitez, knattspyrnustjóri Liverpool, segir að stuðningsmenn Liverpool eigi enn eftir að sjá það besta sem framherjinn Fernando Morientes hefur upp á að bjóða. Búist er við því að Morientes verði í byrjunarliði Liverpool sem mætir CSKA Sofia í 3. umferð Meistaradeildarinnar í kvöld, en hann náði sér ekki almennilega á strik eftir að hafa komið til Liverpool í janúar á þessu ári og skoraði aðeins þrjú mörk í þeim 17 leikjum sem hann lék. "Fernandi mun sýna framfarir, það er ég alveg viss um," segir Benitez. "Ég er sannfærður um að við eigum eftir að sjá hvað hann getur í vetur. Nú hefur hann fengið tíma til að aðlagast og það vita allir hvers megnugur Morientes er í sínu besta formi."