Mökkurinn er yfir Normandí

Slökkviliðsmenn hófu í gær að slökkva eldana ógurlegu sem upp komu í Buncefield-olíubirgðastöðinni í Hertfordskíri, skammt norður af Lundúnum í gær. Sprengingarnar sem fylgdu eldunum gerðu að verkum að ekki var hægt að hefja slökkvistarf fyrr. Slökkviliðsmenn lögðu til atlögu við vítiseldana strax í gærmorgun en aðstæður voru nokkuð erfiðar þar sem bætt hafði í vindinn og áttin breyst.

Franska veðurstofan greindi frá því að mökkurinn væri kominn til Normandí og er búist við að hans verði vart á Spáni á morgun. "Við fetum ókunna stigu. Þetta er mesti eldsvoði sinnar tegundar sem komið hefur upp í Bretlandi og Evrópu," sagði Roy Wilsher, slökkviliðsstjóri í Hertfordskíri á blaðamannafundi í gær. Sérstakri efnakvoðu var sprautað á eldinn og var á Wilsher að heyra að hann væri spenntur að sjá árangurinn af því.

"Við erum ekki einu sinni vissir um hvernig þessi ógnarhiti mun fara með kvoðuna. Hún gæti þess vegna gufað upp." Áhyggjur slökkviliðsstjórans virtust hins vegar óþarfar því um miðjan daginn í gær hafði tekist að kæfa eldinn í tíu af þeim tuttugu tönkum sem brunnu. Sjö tönkum tókst að bjarga alveg með því að sprauta 32.000 lítrum af vatni á mínútu yfir þá alla nóttina. Rannsókn á eldsupptökum er hafin en að sögn Frank Whiteley, lögreglustjóra í héraðinu, á enn eftir að yfirheyra stjórnendur stöðvarinnar. Vonast er til að þeir geti gefið upplýsingar sem varpað geta ljósi á málið.

"Vel má vera að þegar eldarnir hafa verið slökktir þá verði lítið sem ekkert eftir fyrir tæknimenn okkar að rannsaka. Ég vonast þó til að við leysum gátuna á endanum." Whiteley ítrekaði í gær að ennþá benti allt til þess að óhapp væri orsök brunans en þó væri öllum möguleikum haldið opnum. Í síðustu viku birtist myndband frá al-Kaída þar sem hvatt var til árása á olíumannvirki þar sem olíunni hefði verið stolið úr löndum múslima.