Ósáttir við að fá ekki eingreiðsluna

Guðmundur Gunnarsson, formaður Rafiðnaðarsambandsins, segir að iðnaðarmönnum finnist óréttlæti felast í samkomulaginu sem verkalýðshreyfingin náði við stjórnvöld og atvinnurekendur innan Forsendunefndarinnar.

Samkomulagið byggist á því að leiðrétta laun það sem af er samningstímanum og út næsta ár og er þessu meðal annars safnað saman í eingreiðslu upp á 26 þúsund krónur. Guðmundur bendir á að útborgunin í desember ráðist af því hversu lengi starfsmaðurinn hefur unnið á viðkomandi vinnustað.

"Þetta gerum við athugasemdir við. Margir iðnaðarmenn hafa skipt um vinnustað á þessu ári og margir þeirra fá bara hluta af eingreiðslunni. Við teljum að allt að þrjátíu prósent iðnaðarmanna fái lítið sem ekkert út úr þessu, sérstaklega í byggingageiranum því að margir þeirra hafa flutt sig á milli vinnustaða á árinu. Að öðru leyti erum við sáttir við þetta samkomulag," segir Guðmundur.

Aðalsteinn Baldursson, formaður Verkalýðsfélagsins á Húsavík, segist vera ánægður með aðkomu stjórnvalda að málinu, bæði atvinnuleysisbætur og örorkubyrðina, aukið framlag til starfsmenntunar og tímabær lög um starfsmannaleigur. Aðalsteinn segist hins vegar vera "bullandi óánægður" með launahækkun upp á 0,65 prósent í ársbyrjun 2007 og telur framlag atvinnurekenda "til háborinnar skammar".

"Þegar við sömdum um kostnaðarauka sömdum við um 15,7 prósent en aðrir fóru upp í allt að þrjátíu prósent. 20 til 22 prósent hefði verið sanngjarnt fyrir okkur," segir hann.

"Ég held að þetta samkomulag sé eitthvað sem allir hljóta að vera glaðir yfir því að það tryggir áframhaldandi frið á vinnumarkaði. Menn geta mótmælt því en það hefur enga efnislega þýðingu. Þetta þýðir aukinn kostnað fyrir fyrirtækin en ég geri ekki ráð fyrir að það breyti miklu. Ef þetta samkomulag hefur einhver áhrif á verðbólguna þá er það til lækkunar. Ég held að það sé ein af þeim forsendum sem þarf til að hér ríki viðunandi stöðugleiki á næstu tveimur árum," segir Björn Rúnar Guðmundsson, hagfræðingur í Greiningardeild Landsbankans.

Forystumenn félaga innan Starfsgreinasambandsins hittust á miðstjórnarfundi í gær og hittast aftur í dag. Búast má við að niðurstaða Forsendunefndarinnar komi til umræðu á þeim fundum.