Í nafni jóga

Vinsældir jóga á Vesturlöndum síðastliðin ár eiga sér bæði jákvæðar og neikvæðar hliðar. Svo virðist sem allir vilji eiga hlutdeild í þeim ávinningi sem reglubundin jógaástundun skilar. Hver vill ekki verða sterkari, liðugri, einbeittari, ná djúpri slökun og upplifa hugarró? Jafnt auglýsendur og aðilar úr heilsuræktariðnaðinum hafa reynt að nýta sér þessar vinsældir með því að tengja vörur sínar og þjónustu við jóga. Í auglýsingum er yfirleitt einhver í sitjandi hugleiðslustöðu tengdur við vöruna. Í heilsuræktariðnaðinum eru til alls konar líkamsræktarkerfi sem hafa splæst orðinu jóga inn í nafn sitt. Kerfin eru mörg hver mjög góð og skila sjálfsagt góðu líkamlegu formi og hafa einhver andleg áhrif en það þýðir ekki að þau hafi nokkuð með jóga að gera. Jóga er heildrænt æfinga- og hugræktarkerfi fyrir alla þætti manneskjunnar. Jógastöður æfa öll kerfi líkamans. Að taka nokkrar æfingar úr jóga, hvort sem er öndunaræfingar eða jógastöður, og kalla æfingakerfið jóga er einfaldlega rangt. Eðlilegt er að í jóga sé framþróun og upp komi nýjungar. Hins vegar eru jógafræðin of oft útþynnt í gegnum auglýsingar og aðlögun við önnur líkamsræktarkerfi. Því er ekki allt gull sem glóir eða allt jóga sem kennt er við jóga.