Ekki vitað um 40 Íslendinga

Ekki er vitað um afdrif um fjörtíu Íslendinga sem voru á hamfarasvæðinu, af þeim sextíu og fimm sem staðfest er að eru þar um þessar mundir. Utanríkisráðuneytið hefur starfrækt neyðarvakt í dag þar sem upplýsingum er safnað og Íslendingum komið til aðstoðar ef með þarf. Flóðbylgjurnar fóru yfir marga vinsæla ferðamannastaði í Asíu, þar sem gera má ráð fyrir að fjöldi Íslendinga hafist við. Ungt par á flóðasvæðinu við Phuket eyju í Tælandi var statt á ströndinni og horfði á flóðbylgjurnar nálgast með ógnarhraða. Voru þau í bráðri lífshættu og hlupu upp á hæsta punkt eyjunnar. Ekki hefur náðst símasamband við þau síðan fyrir hádegi, en þá töldu þau sig úr hættu. Margrét Þorvaldsdóttir er stödd ásamt fjölskyldu sinni á sömu slóðum. Af hreinni tilviljun voru þau ekki niðri á strönd þegar flóðbylgjan reið yfir, en dvelja nú á hóteli sínu þar sem vatnið fyllir nánast fyrstu hæðina. Margrét segir fólk mjög hrætt og vatn sé út um allt. Varað hafi verið við að meira gæti fylgt í kjölfarið. Margrét segir að ágætlega fari um fjölskylduna. Starfsfólk Atlanta og Flugleiða á Maldvieyjum, Indónesíu og Malasíu er heilt á húfi. Staðfest hefur verið að ekkert amar að íslenskum starfsmönnum utanríkisþjónustunnar á Sri Lanka, þar sem þúsundir hafa látist. Strax í morgun var sett upp neyðarvakt í utanríkisráðuneytinu vegna flóðanna, til að safna upplýsingum um Íslendinga á hamfarasvæðinu og koma þeim til aðstoðar. Pétur Ásgeirsson, skrifstofustjóri í utanríkisráðuneytinu, segist ekki vita nákvæmlega hve margir Íslendingar séu á svæðinu, en ljóst sé að engar skipulagðar ferðir hafi verið farnar á þetta svæði undanfarið, en hins vegar séu þarna einhverjir á eigin vegum og verið sé að reyna að finna út hve margir þeir séu. Pétur segir markmiðið fyrst og fremst að ræðismenn Íslands geti stuðlað að því að hjálp berist.