Blunkett segir af sér

David Blunkett, innanríkisráðherra Bretlands, sagði í gær af sér embætti vegna ásakana um að hann hafi beitt sér óeðlilega til að tryggja barnfóstru þáverandi ástkonu sinnar dvalarleyfi á mun skemmri tíma en tekur venjulega að ganga frá slíkum leyfum. Blunkett sagðist ekkert hafa vitað af því að embættismenn hefðu skrifað stofnuninni sem veitir dvalarleyfi til að þrýsta á um að útgáfu dvalarleyfis barnfóstrunnar yrði flýtt. Sjálfur hafi hann ekki átt frumkvæði að því en verði að taka ábyrgð sem yfirmaður ráðuneytisins.