Júsjenkó varð fyrir eitrun

Viktor Júsjenkó, forsetaframbjóðandi í Úkraínu varð fyrir dioxineitrun, en ekki er enn vitað hvort eitrað hafi verið fyrir honum af ásettu ráði. Læknar sem rannsakað hafa Júsjenkó undanfarna daga segja engan vafa leika á því að Júsjenkó hafi orðið fyrir dioxineitrun og líklega hafi hann fengið það í gegnum munninn. Það sé ástæða þess hve heilsu og útliti forsetaframbjóðandans hafi hrakað á undanförnum vikum. Hins vegar segja þeir ómögulegt að segja til um hvort eitrað hafi verið fyrir honum af ásettu ráði, enda sé það lögregluyfirvalda að komast að því.