Útiloka ekki sprengjutilræði

Lögregla vill ekki útiloka að sprengja hafi sprungið í fjölbýlishúsi í Stokkhólmi í morgun. Eins er saknað eftir sprenginguna. Þó að lögregla vilji ekki útiloka sprengitilræði er jafnframt talið hugsanlegt að gassprenging hafi orðið. Sprengingin varð á fimmtu hæð á fjölbýlishúsi í miðborg Stokkhólms um klukkan hálffimm að staðartíma. Íbúðin nánast sprakk, útveggir hrundu og svo virðist sem risíbúðin fyrir ofan hafi sprungið í tætlur. Sænskir fjölmiðlar lýsa því þannig að húsið hafi rifnað, efsta íbúðin hrunið og nærliggjandi íbúðir stórskemmst. Steypu, grjóti og rúðugleri rigndi yfir bíla sem lagt var við götuna og er augljóst að verr hefði farið ef sprengingin hefði orðið eftir að fólk var komið á stjá. Eins manns er saknað, þess er bjó í risíbúðinni, en aðeins tveir slösuðust og báðir minniháttar. Lögreglan leitar nú í húsinu með sprengjuleitarhundum. Hætta er á frekara hruni og hafa allar íbúðir í húsinu verið rýmdar. Allt tiltækt lögreglu- og sjúkralið var kallað á staðinn sem og strætisvagnar til að flytja fólk í nærliggjandi húsum á brott. Þrettán slökkviliðsbílar voru á vettvangi fram eftir morgni. Umferð um næsta nágrenni hefur verið stöðvuð og getur lögreglan ekkert sagt til um það á þessari stundu hvenær verður óhætt að snúa aftur á staðinn.