Vilja komast til Rússlands

Mannræningjar sem rændu strætisvagni í Aþenu í morgun krefjast einnar milljónar evra í lausnargjald fyrir á þriðja tug gísla sem þeir hafa enn í haldi. Þeir hafa látið fimm lausa, en segjast munu halda hinum þar til þeir komast með flugi til Rússlands. Það var um klukkan fjögur í nótt að íslenskum tíma að tveir menn stigu upp í rútuna í úthverfi Aþenu. Stuttu seinna skutu þeir í gegnum þakið og kröfðust þess að rútan yrði stöðvuð, og drógu fyrir alla glugga. Bílstjóri rútunnar slapp út, ásamt einum farþega og miðaeftirlitsmanni. Lögregla umkringdi rútuna, og var þá fleiri skotum skotið. Enginn hefur þó særst eftir því sem best er vitað. Nú fyrir hádegi voru fimm látnir lausir, þrjár konur og tveir karlmenn. Einn af þeim sem látinn var laus segir að auk skotvopna, séu ræningjarnir með sprengjur á sér, og að þeir séu afskaplega taugaveiklaðir. Mennirnir vilja komast til Rússlands með flugi, og segjast munu frelsa allar konur um borð ef nýr bílstjóri kemur í rútuna til að keyra hana á flugvöllinn í Aþenu. Ekki er vitað hversvegna þeir vilja komast til Rússlands. Auk þess krefjast þeir einnar milljónar evra, eða sem svarar 85 milljónum íslenskra króna, í lausnargjald. Sjúkrabílar og fjölmennt sjúkralið er í viðbragðsstöðu á vettvangi. Ekki er vitað um þjóðerni mannanna, en þeir mæla á rússnesku. Starfsmenn albanska og rússneska sendiráðsins í Aþenu voru kallaðir á staðinn til að bera kennsl á þjóðerni þeirra. Fyrir fimm árum síðan var tveimur rútum rænt á Grikklandi á tveggja mánaða tímabili. Í báðum tilfellum var um Albana að ræða sem krafðist þess að komast til Albaníu, og í báðum tilfellum var ræninginn skotinn til bana af lögreglu.