Landshnitakerfið endurmælt

Rekið á Ameríku- og Evrópuflekunum auk jarðskorpuhreyfinga eins og á Suður- og Norðausturlandi knýja á að landshnitakerfið verði endurmælt. Landmælingar Íslands ráðast í verkið á fyrri hluta þessa mánaðar. Til að tryggja áreiðanleika og nákvæmni grunnnetsins verður að yfirfara gps punktana bæði í byggð og í óbyggðum ekki sjaldnar en á tíu ára fresti. Notkun gps kerfisins til staðarákvörðunar eykst með hverju árinu sem líður, og má áætla að yfir 200 gps landmælingatæki séu í notkun á landinu. Öll kortagerð og skipulagsvinna í landinu bæði í þéttbýli og dreifbýli byggist á grunnstöðvanetinu og sífellt eru gerðar meiri kröfur um nákvæmni, bæði í samræmingar- og öryggissjónarmiði.