Nýjar kosningar eina leiðin

Leóníd Kútsma, forseti Úkraínu segir að nýjar forsetakosningar kunni að vera eina leiðin til að losa þjóðina úr þeirri spennutreyju sem hún sé í. Ólga fer hratt vaxandi með hótunum um aðskilnað og sjálfsstjórn í austurhluta landsins. Janúkovítsj, sem hefur verið lýstur sigurvegari í kosningunum, segist styðja að þær verði endurteknar ef svik verða sönnuð. Spennan er slík í landinu að óttast er að upp úr sjóði. Stjórnarandstaðan vill láta ógilda kosningarnar og boða til nýrra þann 12. desember vegna kosningasvika. Myndband sem sýnt var í sjónvarpi í dag sýnir eyðileggingu á kjörgögnum og kjósendur sem ekið er um í bíl merktum stórnvöldum á milli margra kjörstaða, og kjósendum eru réttir fleiri en einn kjörseðill. Hæstiréttur landsins hóf að fjalla um málið í morgun en það mun eflaust taka nokkra daga að ná niðurstöðu. Stuðningsmenn stjórnarandstæðingsins Júsjenkos standa nú þúsundum saman fyrir utan Hæstarétt. Þar eru einnig samankomnir stuðningsmenn Janúkovítsj sem yfirkjörstjórn Úkraínu hefur lýst sigurvegara. Þeir hóta að krefjast sjálfstjórnar í austurhluta landsins ef Júsjenko, keppinautur hans, verður lýstur sigurvegari. Sergej Kunitsyn, forsætisráðherra Krímskaga, segir fulltrúa frá yfirvöldum í Rússlandi spyrja hvort ekki sé brýnt að boða til kosninga til að skera úr um aðskilnað sjálfsstjórnarlýðveldisins Krím og að það gerist aðili að ríkjasambandi Rússlands. Viktor Janúkovítsj lýsti því óvænt yfir í dag að hann myndi styðja að kosningarnar verði endurteknar ef svik verða sönnuð. Á meðan hafa leiðtogar fjölda landa lýst yfir áhyggjum sínum af ólgunni í landinu. Fráfarandi forseti, Leóníd Kútsma, segir útilokað að landinu verði skipt og varaði við hættunni á því að efnahagur landsins hrynji vegna deilnanna. Jaap de Hoop Scheffer, framkvæmdastjóri NATO, segir að fyrst af öllu beri að endurtaka kosningarnar án alls ofbeldis og að skera verði úr um öll ágreiningsmál eins og haft hafi verið eftir Hæstarétti í dag.   Tony Blair, forsætisráðherra Bretlands, segir áhyggjuefni flestra í dag sé hvernig best sé að halda landinu saman, greina hvað hafi gerst, hvaða skref beri að stíga næst og gera það þannig að fólki verði ekki misboðið. „Ég tel að best sé að þetta sé í höndum fólksins á bak við tjöldin,“ sagði Blair.