Koeman: Við nálgumst Gylfa

Everton er nálægt því að ganga frá kaupunum á Gylfa Þór Sigurðssyni frá Swansea City. Þetta segir Ronald Koeman, knattspyrnustjóri Everton.

Gylfi hefur verið orðaður við Everton í allt sumar og fátt virðist geta komið í veg fyrir að hann gangi í raðir Bítlaborgarliðsins á allra næstu dögum.

„Við nálgumst Gylfa. Við þurfum að bíða. Það er ekki búið að ganga frá þessu,“ sagði Koeman við Sky Sports.

Swansea vill fá 50 milljónir punda fyrir Gylfa og hefur hafnað tilboðum frá bæði Everton og Leicester City í íslenska landsliðsmanninn.

Gylfi tók ekki þátt í æfingaleik Swansea í gær og svo virðist sem hann sé á förum frá félaginu.