Olíuverð hækkar vegna ótta um samdrátt

Heimsmarkaðsverð á hráolíu hækkaði lítillega á markaði í dag og fór í tæpan 61 dal á tunnu. Helsta ástæðan fyrir hækkuninni er sú að búist er við að olíubirgðir hafa minnkað nokkuð á milli vikna í Bandaríkjunum. Orkumálaráðuneyti Bandaríkjanna birtir vikulega skýrslu sína um olíubirgðir landsins síðar í dag.

Markaðirnir að jafna sig

Hlutabréfamarkaðir í Asíu jöfnuðu sig að nokkru leyti í gær en flestar vísitölur kauphalla hækkuðu lítillega eftir talsverðar lækkanir frá upphafi síðustu viku þegar markaðirnir tóku snarpa dýfu. Fjárfestar munu þó enn vera áhyggjufullir.

Stefnt að hækkandi arði

Finnska fjármálafyrirtækið Sampo Group kynnti nýja arðgreiðslustefnu á dögunum. Markmiðið er að arðgreiðslur aukist á milli ára sem samsvari 4-6 prósenta árlegri ávöxtun á nafnverð hlutafjár.

Moody‘s metur Norvik Banka

Sérfræðingar matsfyrirtækisins Moody‘s eru nú staddir úti í Lettlandi þar sem þeir kynna sér rekstur Norvik Banka áður en hann verður metinn í fyrsta sinn. Bankinn hét áður Lateko og er í meirihlutaeigu Straumborgar, félags Jóns Helga Guðmundssonar.

NASA vantar fjármagn

Fulltrúar Geimsferðarstofnunar Bandaríkjanna, Nasa, segja stofnunina vanta fjármagn til að rannsaka alla þá loftsteina og halastjörnur sem Jörðinni kann að stafa ógn af. Talið er að um 20,000 hluti sé að finna í sólkerfi okkar sem kunna að nálgast Jörðina í framtíðinni. Ætlun Nasa er að finna og rannsaka 90 prósent þeirra fyrir árið 2020. Í skýrslu sem Nasa lét vinna kemur fram að kostnaðurinn við þá vinnu yrði um einn milljarður bandaríkjadala.

Markaðir aftur á uppleið

Hlutabréfamarkaðir bæði í Asíu og Evrópu hafa tekið kipp upp á við í dag eftir talsverðar lækkanir síðustu vikuna. FTSE-vísitala kauphallarinnar í London hækkaði eilítið fljótlega eftir opnun í morgun og aðrar evrópskar vísitölur hækkuðu einnig. Nikkei-vísitalan í Japan hækkaði um rúmt prósent í dag en gærdagurinn var sá versti í Tokyokauphöllinni í níu mánuði. Þá hækkaði Hang Seng vísitalan í Hong Kong um 1.6% og SSE vísitalan í Shanghai um tæplega 2%.

Minna tap í olíuleitinni

Færeyska olíuleitarfélagið Atlantic Petroleum skilaði tapi upp á rúma 8,1 milljón danskra króna, jafnvirði rétt rúmra 96 milljóna íslenskra króna, á síðasta ári. Þetta er nokkru minna tap en árið áður en þá tapaði félagið tæplega 10,4 milljónum danskra króna, sem jafngildir 123,3 milljónum íslenskra króna.

EMI hafnaði Warner Music

Stjórn bresku hljómplötuútgáfunnar EMI hafnaði í gær yfirtökutilboði bandarísku risasamstæðunnar Warner Music Group. Tilboðið hljóðaði upp á 260 pens á hlut, sem þýðir að EMI er metið á 2,1 milljarð punda, jafnvirði um 275 milljarða íslenskra króna.

Lítil breyting á markaði í Bandaríkjunum

Fjármálamarkaðir í Bandaríkjunum opnuðu fyrir skömmu. Lækkanir á vísitölum á mörkuðum í Asíu og í Evrópu virðast ekki hafa skilað sér vestur um haf enda hækkuðu helstu vísitölur á bandaríska markaðnum lítillega við opnun markaða. Greinendur eru ekki vissir um hvað dagurinn feli í skauti sér en vísa til orða Henry Paulsons, fjármálaráðherra, sem segist hafa tröllatrú á bandaríska hagkerfinu.

Olíuverðslækkanir hafa áhrif í Noregi

Gengi hlutabréfa í kauphöllinni í Osló í Noregi hefur ekki farið varhluta af lækkunum á helstu fjármálamörkuðum í Asíu og Evrópu í dag. Inn í spilaði reyndar heimsmarkaðsverð á hráolíu, sem hefur talsverð áhrif inn í norsku kauphölina, en það dró vísitöluna niður um 2,8 prósent. Gengi bréfa í Kauphöll Íslands hefur lítið breyst eftir því sem liðið hefur á daginn.

HSBC skilaði methagnaði

Alþjóðlegi bankinn HSBC, einn stærsti banki í Evrópu, skilaði 11,5 milljarða punda hagnaði á síðasta ári. Þetta jafngildir rúmum 1.500 milljörðum íslenskra króna sem er fimm prósenta hækkun á milli ára. Þetta er langt yfir væntingum greinenda enda metafkoma í sögu bankans. Á sama tíma varð bankinn að afskrifa um 5,4 milljarða punda á bandaríska fasteignalánamarkaðnum.

Enn lækka markaðir í Asíu

Hlutabréfamarkaðir í Japan tóku enn eina dýfuna þegar markaðir opnuðu þar eftir helgina en Nikkei-vísitala kauphallarinnar í Tokyo féll um þrjú og hálft prósent í dag. Samtals hefur vísitalan því lækkað um nær 8 prósent á einni viku. Þá veiktist staða japanska jensins gagnvart dollara. Ekki sér fyrir endann á lækkun markaða. Þá lækkuðu hlutabréf í kauphöllinni í Shanghai í Kína um nær 2 prósent í dag eftir að hafa tekið lítinn kipp upp á við fyrir helgi.

BBC og YouTube í eina sæng

BBC og YouTube hafa gert með sér samstarfssamning sem felur í sér að YouTube býður nú myndskeið frá þremur sjónvarpsrásum BBC. Þá verður hægt að sjá viðtöl BBC við „fræga fólkið“, fréttir og eitthvað skemmtiefni. BBC mun að líkindum sjálft sjá um að hýsa myndskeiðin, en þeim verður veitt á síðu YouTube eins og öðrum myndskeiðum sem þar má sjá.

Gengi bréfa í EADS á niðurleið

Gengi hlutabréfa í EADS, móðurfélagi evrópska flugvélaframleiðandans Airbus, hefur farið niður um 3,9 prósent eftir að fyrirtækið greindi frá því í gær að það hyggðist fresta þróun og framleiðslu á fraktflugvél af gerðinni A380. Fyrirtækið mun eftirleiðis einbeita sér að framleiðslu á farþegaþotu af sömu gerð sem stefnt er að komi á markað í haust.

Lenovo innkallar rafhlöður

Kínverski tölvuframleiðandinn Lenovo hefur ákveðið að innkalla um 205.000 rafhlöður sem fylgja IBM Thinkpad-fartölvum fyrirtækisins. Japanska tæknifyrirtækið Sanyo framleiddi rafhlöðurnar fyrir fyrirtækið. Innköllunin kemur til viðbótar þeirri rúmlega hálfri milljón rafhlaða undir merkjum Sony sem fyrirtækið innkallaði í fyrra.

FlyMe í Svíþjóð gjaldþrota

Sænska lággjaldaflugfélagið FlyMe ætlar að óska eftir gjaldþrotaskiptum. Öllu flugi félagsins hefur verið aflýst. Íslenska eignarhaldsfélagið Fons átti um skeið um tuttugu prósent hlut í félaginu.

Hlutabréfaverð í Kína að rétta úr kútnum

Hlutabréfaverð á kínverskum mörkuðum virðist vera að rétta úr kútnum eftir mikið hrun síðustu daga. Nú þegar líður að lokum kauphallarinnar í Shanghai fyrir helgina hefur vísitala hækkað um hálft annað prósent frá opnun í morgun. Nikkei-vísitala kauphallarinnar í Tokyo heldur að vísu áfram að lækka og hefur lækkað um 1,3 prósent frá opnun í morgun og samtals um nær sex prósent í þessari viku.

Fá hálfsárseinkasöluleyfi í Bandaríkjunum

Actavis hefur fengið samþykki bandarísku matvæla- og lyfjastofnunarinnar til að markaðssetja meltingarfæralyfið Ranitidine mixtúru þar í landi.

M&S fylgist grannt með Sainsbury

Stuart Rose, forstjóri Marks & Spencer, segir að fyrirtækið íhugi að leggja fram tilboð í Sainsbury, þriðju stærstu stórmarkaðakeðju Bretlands. „Eignir sem þessar koma ekki oft inn á markaðinn,“ sagði hann á miðvikudaginn og bætti við að eigendur M&S myndu álíta hann vera fífl ef hann skoðaði ekki málið.

Markaðir enn á niðurleið

Gengi hlutabréfa á helstu fjármálamörkuðum í Asíu og Evrópu hélt áfram að lækka í dag, þriðja daginn í röð eftir að SCI-vísitalan féll snarlega í Kína á þriðjudag eftir nokkrar hækkanir dagana á undan. Greinendur eru ekki á einu máli um það hvenær vísitölurnar rétta úr kútnum og telja að markaðurinn nái sinni fyrri stöðu ekki fyrr en um miðjan mánuðinn.

Tölvuþrjótar skrefi á undan

Ný tegund glæpamanna ryður sér til rúms. Þeir gera skipulagðar, fágaðar og arðbærar árásir á netnotendur. Þeir nota tegund hugbúnaðar sem kallast „malware" eða spilliforrit. Þannig plata þeir fólk til gefa sér upplýsingar eða stela þeim án þess að tekið sé eftir.

Hagnaður Mörthu Stewart sexfaldast

Fyrirtæki bandarísku sjónvarps- og lífsstílskonunnar Mörthu Stewart skilaði 16,2 milljóna dala hagnaði á síðasta ársfjórðungi í fyrra. Þetta jafngildir tæplega 1,1 milljarði íslenskra króna sem er tæplega sex sinnum meira en fyrirtækið skilaði á sama fjórðungi árið 2005.

Enn lækka hlutabréf í Asíu

Hlutabréf í Asíu halda áfram að lækka við upphaf viðskipta í dag og þannig hefur Hang Seng vísitalan í Hong Kong lækkað um 174 stig frá opnun í morgun sem jafngildir tæpu einu prósentustigi. Þá hefur Nikkei-vísitala kauphallarinnar í Tokyo lækkað um rúm 150 stig frá opnun eða um svipað hlutfall.

Microsoft læra af Google

Það var velgengni Google sem opnaði augu Microsoft fyrir þeim gríðarlegu fjármunum sem eru í húfi þegar kemur að auglýsingum á internetinu. Þetta sagði einn helsti hugbúnaðarhönnuður Microsoft á ráðstefnu í dag. Microsoft ætlar sér stóraukna markaðshlutdeild á vefnum á næstu árum en hingað til hefur meginþorri tekna fyrirtækisins komið í gegnum sölu á Windows-stýrikerfinu og skrifstofuhugbúnaði á borð við Word og Ecxel.

Airbus segir upp tíu þúsund manns

Flugvélaframleiðandinn Airbus hefur tilkynnt að tíu þúsund störf verði lögð niður í Evrópu á næstu fjórum árum. Starfsmenn fyrirtækisins í Frakklandi munu verða verst úti, en þar missa 4.300 vinnuna. Í Þýskalandi munu 3.700 störf verða lögð niður, 1.600 í Bretlandi og 400 á Spáni.

Væntingarvísitala niður í Bretlandi

Væntingarvísitala í Bretlandi fór niður í febrúarmánuði þegar neytendur voru varkárari vegna efnahagsástandsins í landinu. Þrátt fyrir það virðast neytendur almennt vera jákvæðari gagnvart eigin fjármálum. Þetta kemur fram í mánaðarlegri könnun sem birt var í dag af fyrirtækinu GfK NOP.

Hlutabréf falla enn í Evrópu og Asíu

Hlutabréf héldu áfram að falla á heimsmörkuðum í dag eftir opnun kauphallanna í Asíu í nótt og Evrópu snemma í morgun. Í Bretlandi féll FTSE vísitalan um nærri tvö prósent við upphaf viðskipta og í Frakklandi féll Cac vísitalan um tvö prósent.

Fengitími á norrænum fjármálamörkuðum

Sænska hægri stjórnin hefur boðað stórfellda einkavæðingu, þar á meðal á eignarhlut í Nordea og fasteignalánabankanum SBAB. Af pólitískum ástæðum er talið ósennilegt að ríkið selji kjölfestuhlut í Nordea til útlendinga og vilji biðla til Wallenberg-fjölskyldunnar sem fer fyrir SEB. Danske Bank er sterklega orðaður við SBAB og skammt undan bíða Exista, Kaupþing og Sampo Group með digra sjóði sem hægt er að nýta til góðra verka.

Apar kunna að nota spjót

Vísindamenn telja miklar líkur á að tækniþekking hafi borist milli manna með svipuðum hætti og hjá öpum.

Dow Jones hríðfellur

Dow Jones vísitalan bandaríska lækkaði mest um 537 stig í dag eða rúmlega 4 prósent. Hún hefur þó eitthvað tekið við sér og er lækkunin nú rúmlega 370 stig eða tæp þrjú prósent. Ástæður fyrir þessu eru taldar vera líkur á því að bandarískt efnahagslíf gæti farið að hægja á sér.

Fresta útkomu Apple-TV

Raftækja- og tölvurisinn Apple hefur ákveðið að fresta útkomu nýs Apple-TV tengiboxs fyrir sjónvörp þar til um miðjan mars. Talsmaður fyrirtækisins segir ástæðuna vera að pökkun hafi tekið lengri tíma en áætlað var og því þurfi að fresta útkomu Apple-TV um nokkra daga.

Wal-mart ryður sér veg í Kína

Bandaríska verslanakeðjan Wal-Mart ætlar að borga um milljarð bandaríkjadala til að taka yfir stærstu verslanakeðju Kína. Sú keðja rekur yfir 100 stórverlanir í 34 kínverskum borgum undir nafninu Trust-mart. Ef af verður verður Wal-mart farið að reka þessar verslanir fyrir árið 2010. Kínverskur efnahagur hefur sprungið út á undanförnum árum og má telja að Wal-mart ætli að nýta sér það enn frekar en þegar rekur verslanarisinn þar yfir 70 verslanir með um 37 þúsund starfsmönnum.

Breskir bankar endurgreiða ólöglegar greiðslur

Bankar í Bretlandi gætu þurft að endurgreiða viðskiptavinum sínum allt að 7,2 milljarða sterlingspunda, eða rúmlega 900 milljarða íslenskra króna, vegna ólöglegra gjalda sem þeir hafa krafið viðskiptavini sína um. Gjöldin sem um ræðir eru greiðslur til banka þegar farið er yfir yfirdráttarheimild eða þegar ávísun er hafnað.

Greenspan óttast niðursveiflu

Alan Greenspan, fyrrum æðsti yfirmaður seðlabanka Bandaríkjanna, sagði í dag að bráðum myndi fara að hægja á bandarísku efnahagslífi. Hann sagði það hafa þanist síðan árið 2001 og að núna bentu merkin til þess að þenslan væri að stöðvast.

BitTorrent ætla að selja löglegt efni

Veffyrirtækið BitTorrent sem löngum hefur verið talið einn helsti óvinur Hollywood fyrir að hafa fundið upp torrent-skráaskiptastaðalinn hefur nú slegist í lið með kvikmyndaiðnaðinum og ætlar að fara að selja kvikmyndir og sjónvarpsþætti á vefsíðu sinni og dreifa þeim með torrent-tækninni. Einnig er ætlunin að selja tónlist og tölvuleiki á síðu BitTorrent.

IBM styðja ekki Linux frá Oracle

IBM-tölvuframleiðandinn segist ekki tilbúinn að tryggja að tölvur þeirra geti keyrt nýja útgáfu Linux-stýrikerfisins frá Oracle. Þetta þýðir að ef upp koma vandamál með keyrslu á nýja Linux á tölvum IBM er það vandamál Oracle, ekki IBM sagði talsmaður IBM í gær.

BAE skilaði af sér góðu ári

Tekjur breska hergagnaframleiðandans BAE Systems tæplega þrefaldaðist á síðasta ári. Mestu munar um aukna sölu á hergögnum til bandaríska hersins í fyrra og sölu félagsins á 20 prósenta hlut í evrópska flugvélaframleiðandanum Airbus til EADS, móðurfélags Airbus.

Byggðastofnun skilaði 10 milljónum í hagnað

Byggðastofnun skilaði 10,1 milljón króna hagnaði á síðasta ári samanborið við 272,2 milljóna króna hallarekstur árið 2005. Í ársuppgjöri stofnunarinnar segir að í vetur hafi á ný verið lagt fram á Alþingi frumvarp um opinberan stuðning við tæknirannsóknir, nýsköpun og atvinnuþróun en það hafi hins vegar ekki verið afgreitt.

Merkel og Chirac ræða við EADS

Angela Merkel, kanslari Þýskalands, og Jacques Chirac, forseti Frakklands, ætla að funda bráðlega með stjórnendum EADS, móðurfélagi evrópska flugvélaframleiðandans Airbus, vegna fyrirhugaðra hagræðingaaðgerða félagsins. Gert er ráð fyrir að félagið segi upp tugþúsundum starfsmanna auk þess sem nokkrum verksmiðjum verður lokað.

Gengi bréfa í Sanyo hrundi vegna rannsóknar

Gengi hlutabréfa í japanska tæknifyrirtækinu Sanyo féll um heilt 21 prósent í kauphöllinni í Tókýó í Japan í dag eftir að fréttir bárust af því að fjármálayfirvöld í Japan hefðu fyrirtækið til rannsóknar. Grunur er sagður leika á að gögn í bókhaldi fyrirtækisins hafi verið fölsuð árið 2003.

Borgaði Apple fyrir iPhone nafnið?

Nú eru uppi kenningar um að Apple hafi borgað Cisco milljónir dala fyrir afnot af iPhone nafninu. Fyrirtækin hafa rifust um nafnið í nokkrar vikur þar til í dag að þau náðu samkomulagi um að Apple mætti nota nafnið. Cisco hefur notað iPhone sem vörumerki á internet símaþjónustu í nær sjö ár.

Microsoft greiði himinháar skaðabætur

Alríkisdómstóll í Bandaríkjunum hefur dæmt Microsoft til að greiða einn og hálfan milljarð bandaríkjadala í skaðabætur til Alcatel-Lucent hugbúnaðarfyrirtækisins fyrir að hafa stolið einkaleyfisvörðu skráartegundinni mp3.

Apple og Cisco ná sáttum

Bandarísku tölvufyrirtækin Apple og Cisco hafa náð sáttum sem felur í sér að bæði fyrirtækin geta notað vörumerkið iPhone. Steve Jobs, forstjóri Apple, greindi frá því í síðasta mánuði að Apple ætli að setja margmiðlunarsímann iPhone á markað í haust. Forsvarsmenn Cisco Systems bentu hins vegar á að fyrirtækið hefði átt vörumerkið síðan árið 2000.

Canon kynnir nýjar gerðir myndavéla

Canon kynntu í dag til sögunnar fimm nýjar gerðir af stafrænum myndavélum fyrir almenning. Þá kynntu þeir einnig nýja gerð af stafrænni vél fyrir atvinnumenn, 10.1 megapixla 1D Mark III D-SLR.

Hráolíuverð á uppleið

Heimsmarkaðsverð á hráolíu hækkaði nokkuð í dag og fór í rúma 60 bandaríkjadali á tunnu eftir að orkumálaráðuneyti Bandaríkjanna greindi frá því í gær að umframbirgðir af olíu jukust minna er gert hafði verið ráð fyrir. Hráolíubirgðirnar jukust hins vegar meira en vænst var.