Stefán út­varps­stjóri gáttaður á Stefáni út­varps­stjóra

Í aðgerðapakka stjórnvalda í þágu fjölmiðla felst tillaga að lagabreytingu um að fella brott kvöð um fjölda útvarpsstöðva sem Ríkissjónvarpið þarf að halda úti, það er að segja tveimur.  Stefán Eiríksson, útvarpsstjóri Ríkisútvarpsins, sagði við Sýn í gær að ekki stæði í farvatninu að leggja niður Rás 2 þrátt fyrir boðaða heimild til þess.

Logi Einarsson, menningar-, nýsköpunar- og háskólamálaráðherra, kynnti aðgerðapakkann á blaðamannafundi í gær.

„Í því ljósi skýtur skökku við að Stefán Eiríksson hefur nú þegar stigið fram og sagt að ekki standi til að leggja Rás 2 niður. Var sú yfirlýsing gefin skv. umboði stjórnar?“ skrifar Stefán Ernir hjá Sýn í skoðanagrein á Vísi.  Sá vill meina að það sé ekki lengur nauðsynlegt fyrirkomulag að Rás 1 sinni hefðbundnu menningarhlutverki og Rás 2 afþreyingu.

„Í dag eru tækifæri ríkisins til hagræðingar veruleg; með því að selja Rás 2 eða leggja hana niður og færa menningarlegt hlutverk hennar yfir á Rás 1, mætti spara almannafé án þess að skerða þjónustu verulega.“

Hið sama eigi við um öryggishlutverk ríkismiðilsins. „Reynslan sýnir að Bylgjan hefur brugðist hraðar við en ríkismiðlarnir í neyðartilfellum, líkt og sást þegar eldgos hófst á Reykjanesi fyrir tveimur árum. Þá var Bylgjan um 20 mínútum á undan ríkismiðlum með sérstaka upplýsingagjöf til almennings.“

Vinsældirnar tali einnig sínu máli þar sem í nýjustu mælingum Gallup hafi Bylgjan mælst með 38 prósenta hlutdeild á meðan Rás 2 var með 22 prósenta hlutdeild í aldurshópnum 12 til 80 ára.

Það er því rökrétt skref í átt að heilbrigðari fjölmiðlamarkaði að ríkið dragi sig út úr samkeppnisrekstri þar sem einkamarkaðurinn stendur vaktina af öryggi og fagmennsku.“

Stefán Eiríksson hjá Rúv sagði aftur á móti í gær að Rás 2 væri mikilvægur vettvangur. „Öflug útvarpsstöð, yfir fjörutíu ára gömul, sem sinnir mikilvægu menningarhlutverki hér á landi og mun gera það um ókomna tíð, geri ég ráð fyrir,“ sagði Stefán Eiríksson, sem benti einnig á að í raun væri aðeins verið að afnema skilyrði í lögum um tiltekinn fjölda útvarpsstöðva á vegum Ríkisútvarpsins. 

Vísir er í eigu Sýnar.