Rannsaka þarf hvort lög hafi verið brotin hjá FL Group

Össur Skarphéðinsson iðnaðarráðherra telur að þar til bærum yfirvöldum beri að rannsaka það hvort ólöglega hafi verið staðið að flutningi á þremur milljörðum króna úr FL Group fyrir þremur árum. Þetta sagði hann í fyrirspurnartíma á Alþingi í dag.

Minna heimilissorp í kreppunni

,,Magn heimilissorps sem safnað var í október á þessu ári er um 16% minna en í október í fyrra,“ segir Guðmundur B. Friðriksson hjá Umhverfis- og samgöngusviði Reykjavíkurborgar í tilkynningu.

Engin áform um að flýta kosningum að svo stöddu

Geir H. Haarde forsætisráðherra segir engin áform um að flýta kosningum að svo stöddu. Þetta kom fram í svari hans við fyrirspurn Steingríms J. Sigfússonar, formanns Vinstri - grænna.

Verð hækkar mest í lágvöruverslunum

Vörukarfa ASÍ hækkaði um 9% til 28% í helsu verslunarkeðjum frá miðjum apríl til októberloka. Mestar hækkanir á verð vörukörfunnar voru í lágvöruverðsverslunum. Verðlagseftirlit ASÍ mælir breytingar á verði vörukörfu sem getur endurspeglað almenn innkaup meðalheimilis.

Ekki útlit fyrir að lífeyrir skerðist hjá Lífeyrissjóði verslunarmanna

Útlit er fyrir að ekki þurfi að lækka lífeyri og önnur réttindi hjá Lífeyrissjóði verslunarmanna um næstu áramót samkvæmt tryggingafræðilegri úttekt sem sjóðurinn hefur látið gera.

Fá ekki að hitta Guðlaug Þór

Þórarinn Tyrfingsson, yfirlæknir á Vogi og formaður SÁÁ, segir að framkvæmdastjórn SÁÁ fái ekki áheyrn hjá Guðlaugi Þór Þórðarsyni heilbrigðisráðherra.

Um 400 milljóna króna styrkur til rannsókna í kerfislíffræði

Dr. Bernhard Örn Pálsson, gestaprófessor við Háskóla Íslands og prófessor í lífverkfræði við University of California, San Diego hefur hlotið 2,4 milljóna evra styrk frá Evrópska rannsóknarráðinu til rannsókna í kerfislíffræði.

Afhentu Gunnari undirskriftalista - Félagsfundur á fimmtudaginn

Kristófer Jónsson, félagi í VR, segir mótmælastöðu við höfuðstöðvar VR í hádeginu í dag hafa heppnast vel og fleiri félagsmenn hafi mætt en fyrir helgi.

Fimm fíknefnamál í Reykjavík

Fimm fíkniefnamál komu til kasta lögreglunnar á höfuðborgarsvæðinu um helgina. Við sögu komu jafnmargir karlar en þeir voru allir teknir í Reykjavík, þrír í miðborginni og einn í Hlíðunum og Árbæ.

Sjötíu prósent vilja flugvöllinn áfram í Vatnsmýrinni

Meirihluti landsmanna, eða 70 prósent, vill að Reykjavíkurflugvöllur verði áfram á sínum stað í Vatnsmýrinni. Þetta kemur fram í skoðanakönnun sem Capacent Gallup vann í september og byrjun október fyrir Flugstoðir.

Óskar: Reglum breytt svo fólk þurfi síður að skila lóðum

Óskar Bergsson, formaður borgarráðs og framkvæmda- og eignaráðs, staðfestir að Reykjavíkurborg sé hætt að taka við lóðum frá fólki sem vill skila þeim inn eins og greint var frá fyrr í dag. Hann segir þetta tímabundna ákvörðun en verið sé að vinna að breytingum á skilmálum lóðaúthlutana sem hann segir miða að því að auðvelda fólki að halda lóðum sínum og byggja á þeim.

Von á breskum og hollenskum sendinefndum

Von er á breskri sendinefnd frá Kent sýslu í þessari viku. Ætlar fulltrúar sýslunnar að freista þess að fá til baka 50 milljónir punda, eða um tíu milljarða króna miðað við seðlabankagengi, sem lagðar voru inn á reikninga íslensku bankanna í Bretlandi. Þá er einnig von á sendinefnd frá Hollandi í þessari viku.

ESB-aðild og svo evra í stað einhliða upptöku evru

Valgerður Sverrisdóttir, varaformaður Framsóknarflokksins, telur að Íslendingar eigi að taka upp evruna í framhaldi af aðild að Evrópusambandinu fremur en að taka evruna einhliða upp líkt og lagt hefur verið til.

Ekkert ESB-lán fyrr en Icesave-deilan leysist

Framkvæmdastjórn Evrópusambandsins ætlar ekki að veita Íslendingum lán nema gengið verði frá skuldbindingum vegna Icesave fyrst. Reuters fréttastofan hefur þetta eftir Johannesi Laitenberger, talsmanni framkvæmdastjórnarinnar.

Lést af áverkum af mannavöldum

Bráðabirgðaniðurstöður krufningar á líki mans, sem lést sumarbústað í Grímsnesi um helgina, benda ótvírætt til þess að hann hafi látist af áverkum sem hann hlaut af mannavöldum.

Borgin hætt að taka við lóðum

Reykjavíkurborg er hætt að taka við lóðum frá fólki og endurgreiða lóðagjöld eftir því sem segir á vef Neytendasamtakanna.

Áflogaseggir handteknir í Bolungarvík

Tveir menn gistu fangageymslur á Ísafirði vegna ölvunar og óspekta aðfaranótt sunnudagsins.

Verið að drepa málum á dreif með tali um einhliða upptöku evru

Ágúst Ólafur Ágústsson, varaformaður Samfylkingarinnar, segir að verið sé að drepa málum á dreif með því að velta upp hugmyndum um einhliða upptöku evru. Kostirnir séu í raun tveir, krónan og evran, og sú fyrrnefnda eigi sér nú fáa formælendur.

Mótmæli gegn VR halda áfram

Mótmælastöðu verður fram haldið við höfuðstöðvar VR í Húsi verslunarinnar í hádeginu í dag. Kristófer Jónsson, félagi í VR segist vonast til að sem flestir sjái sér fært að mæta. Til stendur að afhenda undirskriftalista þar sem óskað er eftir félagsfundi í VR en mótmælendurnir eru óánægðir með framgöngu formanns VR og stjórnarinnar í heild sinni.

Varað við hvassviðri á Kjalarnesi og í Staðarsveit

Vegagerðin varar við hvassviðri, svo sem á Kjalarnesi og í Staðarsveit, þar sem vindhviður hafa verið yfir 30 metrum á sekúndu.

Þungt haldin eftir bílslys

Kona á níræðisaldri, sem varð fyrir bíl á Akranesi í gærkvöldi og var flutt á alysadeild Landspítalans í Reykjavík, liggur þungt haldin á gjörgæsludeild spítalans.

Segir engin lög hafa verið brotin

Hannes Smárason segir að engin lög hafi verið brotin og vísar ásökunum Morgunblaðsins um ólögmætar peningamillifærslur á bug. Morgunblaðið segir frá því í morgun að heimildir blaðsins hermi að FL, sem Hannes gegndi stjórnarformennsku í, hefði flutt 3 milljarða króna á reikning hjá Kaupþingi í Lúxemborg. Þeir fjármunir hafi síðan verið notaðir af Pálma Haraldssyni til kaupa á Sterling flugfélaginu.

Vill að viðskipta- og fjármálaráðherra axli ábyrgð á ástandinu

Gylfi Arnbjörnsson forseti ASÍ sagði í Mannamáli á Stöð 2 í kvöld að viðskipta- og fjármálaráðherra ættu að axla ábyrgð á atburðum síðustu vikna og taka poka sinn. Einnig kom fram í þættinum að samtök atvinnulífsins og ASÍ vinna að efnahagspakka sem vonandi endar með þjóðarsátt.

Öll úrskurðuð í gæsluvarðhald

Tvær konur og einn karlmaður voru í kvöld úrskurðuð í gæsluvarðhald til 28.nóvember í tengslum við mannslát í sumarbústað í Grímsnesi í gærmorgun. Áður hafði annar karlmaður verið úrskurðaður í gæsluvarðhald vegna málsins.

Kreppan hér er alvarlegri en sú sem Finnar upplifðu

Sú kreppa sem Íslendingar standa frammi fyrir er mun alvarlegri en það sem Finnar upplifðu á árunum 1990 til 1994. Er þá sama hvaða hagfræðilegi mælikvarði er notaður. Þetta er mat Jóns Baldvins Hannibalssonar, fyrrverandi utanríkisráðherra og sendiherra í Finnland.

Hundruðum barna vísað frá heimilum ABC í Kenýa

Hundruð barna sem hafa búið á heimili ABC barnahjálpar í Kenýa var í gær vísað frá. Starfsemi ABC í Kenýa er í algeru uppnámi eftir að vopnað rán var framið á skrifstofu samtakanna.

Eldarnir brenna - við þurfum að skipta út krónunni á næstu vikum

Við erum í kapphlaupi við tímann, eldarnir brenna enn og við þurfum að skipta út krónunni á næstu vikum. Þetta segir Baldur Pétursson, aðstoðarframkvæmdastjóri Þróunarbanka Evrópu.

Ikea vísitalan hækkar um 47%

Ikea vísitala Stöðvar tvö hefur hækkað um fjörutíu og sjö prósent frá því bæklingur sænsku verslanakeðjunnar var dreift á heimili landsins í fyrra. Hvort IKEA-vísitalan veitir vísbendingu um verðhækkanir á innfluttum vörum er óvíst - því kollsteypa krónunnar gagnvart evru var 90% á sama tíma.

Björn um synjun forsetans á fjölmiðlalögunum

Björn Bjarnason dóms- og kirkjumálaráðherra landsins skrifar pistil á heimasíðu sína í dag. Þar veltir hann m.a fyrir sér stöðu fjölmiðla á Íslandi og segir það ótrúleg tíðindi ef það teljist samrýmast eðlilegri skipan „fjórða valdsins“ að sami eigandi sé þungamiðjan í verslunarrekstri í landinu og öllum fjölmiðlum nema RÚV og Viðskiptalblaðsins.

Kreppubrandarar óskast

Sem betur fer hefur skopskynið ekki svikið Íslendinga þótt á móti blási. Allskonar brandarar eru á ferð og flugi um netið, sumir í orðum aðrir í myndum.

Gæsluvarðhalds krafist yfir fjórða manninum

Lögreglan á Selfossi hefur farið fram á gæsluvarðhaldsúrskurð yfir fjórða manninum sem handtekinn var síðdegis í gær vegna mannsláts í sumarbústað í Grímsnesi. Ákvörðun dómari mun liggja fyrir síðar í dag.

Þýðir ekkert fyrir Breta að senda okkur Icesavereikning

Það þýðir ekkert fyrir Breta að senda okkur reikninginn fyrir innistæðum sparifjáreigenda hjá Icesave, segir Geir H. Haarde forsætisráðherra.

Einn í gæsluvarðhald vegna mannsláts í sumarbústað

Karlmaður á þrítugsaldri hefur verið úrskurðaður í gæsluvarðhald til 28.nóvember vegna mannslát í sumarbústað í Grímsnesi í gær. Maðurinn var handtekinn ásamt tveimur öðrum konum á staðnum. Lögregla fór einnig fram á að konurnar yrðu úrskurðaðar í gæsluvarðhald en dómari tók sér frest þar til síðar í dag til þess að kveða upp úrskurð varðandi þær.

Feðradagur í skugga fjármálakreppu

Feðradagurinn er haldinn í dag í þriðja skiptið en það er félag Foreldra um jafnrétti sem stendur að deginum. Lúðvík Börkur Jónsson formaður félagsins segir að í upphafi hafi krafan um daginn einfaldlega komið vegna mæðradagsins. Dagurinn á að minna fólk á stöðu og réttindi barna og feðra sem ekki búa við hefðbundið fjölskyldumynstur.

Ráðherrabústaðnum lokað vegna aðgerðarleysis

Lögreglan fjarlægði borða sem settir höfðu verið upp við Ráðherrabústaðinn í Tjarnargötu í nótt. Samkvæmt heimildum Vísis sáu einhverjir sig knúna til þess að líma fyrir gluggana og strengja borða við innganginn með áletruninni „Lokað vegna aðgerðarleysis“.

Mannslát í sumarbústað: Hinir handteknu enn í haldi

Fólkið sem handtekið var í tengslum við mannslát í sumarbústað rétt fyrir utan Selfoss í gær er enn í haldi að sögn lögreglu. Um hálf níu leytið í gærmorgun hafði maður samband sem hafði komið að félaga sínum látnum í sumarbústað sem þeir gistu í ásamt tveimur konum. Lögregla og sjúkralið fóru á staðinn og var hann úrskurðaður látinn. Maðurinn er útlendingur en þrír samlandar hans voru handteknir á staðnum. Lögregla rannsakar nú málið og segir frekari frétta að vænta síðar í dag.

Manni bjargað úr sjónum við Kirkjusand - annar stunginn í miðbænum

Lögreglan fékk símtal frá skokkara við Kirkjusand snemma í morgun. Tilkynnti hann um mann á miðjum aldri sem kominn var út í sjó. Þegar lögregla kom á staðinn var vatnið komið upp að mitti. Honum var komið undir læknishendur.

Strætisvagn og fólksbílar í hörðum árekstri - þrír fluttir á sjúkrahús

Nokkkuð harður árekstur varð á gatnamótum Hringbrautar og Njarðargötu fyrir stundu. Um er að ræða strætisvagn og tvo fólksbíla. Búið er að loka Hringbrautinni í austurátt við Þjóðminjasafnið og í vesturátt á gatnamótunum við BSÍ.

Alþingishúsið grýtt með eggjum - aðsúgur gerður að lögreglu

Lögreglan segir að á fjórða þúsund manns sé samankominn á Austurvelli að mótmæla ástandinu. Að sögn sjónarvotta var aðsúgur gerður að lögreglunni auk þess sem eggjum rigndi yfir Alþingishúsið.

Maðurinn fannst látinn í sumarbústað

Í tilkynningu frá lögreglunni á Selfossi vegna mannslát rétt fyrir utan bæinn kemur fram að rétt fyrir hálf níu í morgun hafi maður haft samband og sagst hafa komið að félaga sínum látnum í sumarbústað sem þeir gistu í ásamt tveimur konum.

Mikil reiði á borgarafundi í Iðnó

Fullt var út úr dyrum á borgarafundi í Iðnó sem var að ljúka fyrir stundu. Þingmenn frá öllum flokkum létu sjá sig á fundinum og greinilegt var að fólki var heitt í hamsi. Enginn formaður stjórnmálaflokks lét sjá sig að Ómari Ragnarssyni frá Íslandshreyfingunni undanskildnum og Steingrími J Sigfússyni formanni Vg.

Rannsaka mannslát rétt fyrir utan Selfoss

Tilkynning um mannslát barst lögreglunni á Selfossi í morgun en nú fer fram vettvangsathugun. Ólafur Helgi Kjartansson sýslumaður á Selfossi segir að mannslát séu alltaf rannsökuðu hvort sem grunur um sakhæft athæfi sé eða ekki. Hann vill annars lítið gefa uppi um rannsóknina sem er í fullum gangi.

Ekki vera þolandi, vertu þáttakandi

Ekki vera þolandi, vertu þátttakandi - er yfirskrift tveggja kreppusamkoma í Reykjavík í dag. Klukkan eitt hefst opinn borgarafundur um stöðu þjóðarinnar í Iðnó. Öllum stjórnmálamönnum, seðlabankastjórum og bankastjórum er boðið að mæta til að svara spurningum Íslendinga milliliðalaust.

Mikill erill í höfuðborginni - 140 bókanir

Samkvæmt upplýsingum frá lögreglunni á höfuðborgarsvæðinu var þónokkur erill hjá lögreglunni í nótt. Eftir gærkvöldið og nóttina liggja 140 bókanir sem telst nokkuð mikið. Níu aðilar voru teknir fyrir meinta ölvun við akstur auk þess sem 5 líkamsárásir voru tilkynntar lögreglu.

Ríkið ekki trúverðugur eigandi bankanna

Vilhjálmur Egilsson framkvæmdarstjóri samtaka atvinnulífsins segir ríkið ekki trúverðugan eiganda bankanna gagnvart erlendum kröfuhöfum. Þetta kemur fram í Morgunblaðinu í morgun.