Björgunarsveit hjálpar manni úr sjálfheldu

Björgunarsveitin Víkverji var kölluð út síðdegis í dag til að sækja mann sem var í sjálfheldu í klettum í Þakgili í Höfðabrekkuafrétt. Hafði maðurinn klifrað upp til að aðstoða börn sín niður úr þessum sömu klettum en þegar hann ætlaði sjálfur niður hrundi aðeins undan fótum hans svo hann taldi vissara að kalla á aðstoð.

Vesturlandsvegur lokaður eftir að pallbíll valt

Vesturlandsvegur við Leirvogsá er lokaður eftir að pallbíll með hestakerru valt á veginum. Að sögn lögreglu slasaðist enginn alvarlega.

Lítil truflun á starfsemi Norðuráls vegna mótmæla

Engin röskun varð á starfsemi álvers Norðuráls á Grundartanga vegna mótmæla samtakanna Saving Iceland. Mótmælendur lokuðu annarri aðkeyrslunni að álverinu með því að hlekkja sig við veginn. Starfsmannastjóri álversins segir ólíklegt að lögð verði fram kæra vegna mótmælanna. Talsmaður Saving Iceland boðar frekari aðgerðir af hálfu samtakanna.

Áhöfn Sifjar vill fara að fljúga aftur sem fyrst

Áhöfn Landhelgisgæsluþyrlunnar Sifjar vonast til að geta farið aftur að fljúga sem fyrst. Þetta kom fram á blaðamannafundi sem haldinn var í flugskýli Landhelgisgæslu Íslands við Reykjavíkurflugvöll kl. 16 í dag og var að ljúka.

Mótmæli við Grundartanga

Mótmælendur samtakana Saving Iceland mótmæla nú við álver Norðuráls á Grundartanga. Nokkrir mótmælendur hafa lokað annarri aðkeyrslunni að álverinu með því að hlekkja sig við veginn, en samkvæmt lögreglunni á Akranesi truflar það ekki aðkomu því önnur leið er að svæðinu. Þá hefur einn mótmælandinn klifrað upp í krana.

Ósæmileg meðferð kirkjumuna

Tveir 17 ára piltar voru handteknir á höfuðborgarsvæðinu á dögunum en þeir voru með hvítan trékross í eftirdragi. Á krossinum var áletrað nafn látins einstaklings. Aðspurðir sögðust piltarnir hafa fundið krossinn fyrir tilviljun á víðavangi og ætluðu að gera úr honum listaverk.

Mennirnir sem leitað var að á Grænlandi eru á lífi

Danski flotinn á Grænlandi bíður nú eftir betri veðurskilyrðum til að bjarga tveimur mönnum sem fóru á flugi yfir Grænlandsjökul. Ekki er staðfest hvort flugvél mannanna hafi brotlent eða nauðlent. Kurt Andreasen, upplýsingafulltrúi dönsku flugmálastjórnarinnar, staðfestir að mennirnir séu á lífi. Þeir flugu í franskri vél af gerðinni ULM-Ultralight.

Saksóknari efnahagsbrota kærir frávísun til Hæstaréttar

Helgi Magnús Gunnarsson saksóknari efnahagsbrota hjá Ríkislögreglustjóra mun kæra úrskurð Héraðsdóms Norðurlands eystra í morgun til Hæstaréttar. Héraðsdómur vísaði máli gegn fólki á Akureyri sem nýtti sér kerfisvillu í netbanka Glitnis frá, á þeim grundvelli að kæruvald saksóknara efnahagsbrota styddist ekki við lög.

Héraðsdómur segir ákæruvald saksóknara efnahagsbrota lögleysu

Héraðsdómur Norðurlands vísaði í morgun frá máli sem saksóknari efnahagsbrota höfðaði gegn fólki á Akureyri sem nýtt hafði sér kerfisvillu í netbanka Glitnis til að þannig hagnast um tugmillljónir króna á gjaldeyrisviðskiptum. Dómarinn sagði í úrskurði sínum að ákæruvald saksóknara efnahagsbrota styddist ekki við lög. Freyr Ófeigsson dómsstjóri segir í úrskurði sínum, að saksóknara efnahagsbrota verði ekki falin sjálfstæð meðferð ákæruvalds með reglugerð að óbreyttum lögum. Hann hafi ekki haft heimild til að gefa út ákæru í máli þessu í eigin nafni og því sé ekki hjá því komist að vísa málinu sjálfkrafa frá dómi.

Bæjarstjórn Akureyrar ályktar vegna skerðingar á aflaheimildum á þorski

Bæjarstjórn Akureyrar ályktaði vegna skerðingar á aflaheimildum á bæjarstjórnarfundi í gær. Bæjarstjórnin lýsir þar yfir þungum áhyggjum af afleiðingum sem skerðingin mun hafa á atvinnulíf í Eyjafirði og á Norðurlandi öllu. Einnig óskar bæjarstjórnin tafarlaust eftir viðræðum við ríkisstjórnina um atvinnumál Eyjafjarðarsvæðisins.

Iðnaðarráðherra leggst á sveif með afa og ömmu

Afi og amma Suður-amerískrar stúlku á Ísafirði standa í ströngu í viðskiptum sínum við yfirvöld innflytjendamála. Össur Skarphéðinsson, iðnaðarráðherra hefur nú lagst á sveif með hjónunum. Á heimasíðu Bæjarins besta er sagt frá afa og ömmu hinnar Suður-amerísku Alejöndru sem þurfa að sækja um dvalarleyfi fyrir hana hér á landi á sex mánaða fresti.

Óþolinmæði og tillitsleysi ökumanna

Ökumenn sýndu óþolinmæði og tillitsleysi í gær við gatnamót Vesturlandsvegar og Þingvallavegar samkvæmt lögreglu, en þar var unnið við malbikun. Á umræddum gatnamótum er nú 30 km hámarkshraði, en engu að síður keyrðu ökumenn ógætilega um svæðið. Skapaðist því mikil hætta fyrir vegfarendur, ekki síst fyrir þá vinnumenn sem voru að vinna við malbikun.

Anheuser-Busch eignast 20% í Icelandic Glacial

Bandaríski risinn á drykkjarvörumarkaði, Anheuser-Busch hefur eignast 20% í vatnsfyrirtæki Jóns Ólafssonar og sonar hans Kristjáns. Þeir reka átöppunarverksmiðju á lindarvatni í Þorlákshöfn og er vatnið markaðssett undir vörumerkinu Icelandic Glacial.

Formaður Prestafélagsins vill breyta reglum um embættisskipanir presta

Ólafur Jóhannsson, formaður Prestafélags Íslands, segir að félagið hafi gert athugasemdir við þá ákvörðun Þjóðkirkjunnar að auglýsa stöðu sóknarprests í prestakalli Kálfastrandarsóknar og Ástjarnarsóknar.

Umferðarkönnun á Öxnadalsheiði

Vegagerðin mun standa fyrir umferðarkönnun á Hringvegi um Öxnadalsheiði fimmtudaginn 19. júlí og laugardaginn 21. júlí næstkomandi. Könnunin stendur yfir frá kl. 08:00-23:00 báða dagana.

Brot 39 ökumanna voru mynduð á hraðamyndavél lögreglunnar

Brot 39 ökumanna voru mynduð á hraðamyndavél lögreglunnar sem var við eftirlit á Álftanesi í gær. Fylgst var með ökutækjum sem var ekið Álftanesveg í suðurátt, þ.e. að Garðavegi. Á einni klukkustund, um hádegisbil, fóru 189 ökutæki þessa akstursleið og því óku 21% ökumanna of hratt eða yfir afskiptahraða.

Sr. Carlos íhugar að sækja rétt sinn fyrir héraðsdómi

Sr. Carlos Ferrer íhugar dómsmál gegn Þjóðkirkjunni eftir að sr. Bára Friðriksdóttir var ráðin í embætti sóknarprests í prestakalli Kálfatjarnarsóknar og Ástjarnarsóknar. Halldór Bachman, lögfræðingur Carlosar, telur að rangt hafi verið staðið að ákvörðuninni um að auglýsa starfið innan prestakallsins.

LSH fær nýjar talstöðvar að gjöf

Lionsklúbburinn Þór hefur fært slysa- og bráðasviði LSH að gjöf fimm nýjar Tetra talstöðvar. Talstöðvarnar leysa af hólmi eldri tæki sem ætluð voru fyrir greiningarsveit LSH.

Krakkar úr Kópavogi heimsmeistarar í skák

Skáksveit Salaskóla sigraði í flokki 14 ára og yngri á heimsmeistaramóti í skák sem lauk í Tékklandi í morgun. Þegar lokaumferð á mótinu hafði verið tefld voru Íslendingarnir með 1,5 vinning í forskot á næstu sveit.

Dæmdur fyrir vörslu barnakláms

Héraðsdómur Norðurlands eystra dæmdi mann fyrir vörslu barnakláms á mánudaginn. Ákvörðun um refsingu mannsins var frestað og fellur hún niður að liðnum 2 árum frá uppkvaðningu dóms haldi maðurinn almennt skilorð. Manninum er gert að greiða rúmlega 82.000 krónur í sakarkostnað.

Sekt fyrir að klæðast einkennisskyrtu lögreglu opinberlega

Karlmaður á Akureyri var í gær dæmdur til að greiða 20.000 króna sekt í ríkissjóð fyrir að vera í lögreglubúningi. Maðurinn var í einkennisskyrtu lögreglu á veitingastaðnum Kaffi Akureyri aðfaranótt sunnudagsins 29. apríl í vor. Héraðsdómur Norðurlands eystra taldi að hann hafi með því brotið gegn valdstjórninni.

Byssumaður í 10/11

Karlmaður í annarlegu ástandi kom inn í 10-11 verslunina við Austurstræti á sjöunda tímanum í morgun og miðaði startbyssu á viðskiptavini og starfsfólk, án þess að krefjast neins.

Tóku 60 erlenda ferðamenn fyrir hraðakstur

Meiri en helmingur þeirra sem lögreglan á Hvolsvelli stöðvaði í síðustu viku fyrir hraðakstur voru erlendir ferðamenn. Í umdæmi lögreglunnar á Selfossi eru að meðaltali fimm til sex erlendir ferðamenn stöðvaðir vegna hraðaksturs á hverjum degi. Flestir kjósa að greiða sektina á staðnum.

Mikið um sinubruna á höfuðborgarsvæðinu

Óvenjumikið hefur verið um sinubruna á höfuðborgarsvæðinu síðastliðinn sólarhring. Gróður er víða þurr og eldur fljótur að breiðast út. Slökkvilið höfuðborgarsvæðisins vill koma þeim tilmælum til fólks að það fari varlega með eld í náttúrunni.

Trefjaplast í stað þorsks?

Norskur útgerðarmaður með áratugareynslu segir Íslendinga ekki þurfa að örvænta vegna niðurskurðar á kvóta. Hann segir að Íslendingar ættu heldur að nota tækifærið til þess að reyna að ná fram aukinni hagkvæmni í útgerð og fiskveiðum.

Lá í tuttugu mínútur á réttum kili áður en henni hvolfdi

TF Sif var dregin til lands í nótt og flutt í flugskýli við Reykjavíkurflugvöll til rannsóknar. Vonast er til að upplýsingar úr flugrita hennar varpi ljósi á atburðinn. Sjónarvottar segja að þyrlan hafi verið í um tuttugu mínútur á réttum kili í sjónum áður en henni hvolfdi.

Lúkas ófundinn

Hundurinn Lúkas er enn ekki fundinn en víðtæk leit verður gerð að hundinum á morgun á þeim slóðum þar sem sást til hans ofan við Akureyri í gær.

Vestfirðir verða frístundabyggð ríkra Reykvíkinga á innan við 10 árum

Íbúar eru farnir að flytja frá Flateyri en menn óttast viðvarandi atvinnuleysi á Vestfjörðum í framhaldi af samdrætti í aflaheimildum. Flosi Jakobsson útgerðarmaður í Bolungarvík segir að innan 10 ára verði Vestfirðir frístundabyggð fyrir ríka Reykvíkinga.

Mokveiðist í Þingvallavatni

Þrátt fyrir að veiðin í laxám víða um land hafi verið dræm vegna sumarblíðunnar undanfarnar vikur, þá mokveiðist í þingvallavatni. Nokkrir ákafir veiðimenn á öllum aldri voru þar fyrir skömmu.

Hætta á skógareldum á Íslandi

Nýtt vandamál er að koma upp á Íslandi en hætta er víða á skógareldum á suðvesturlandi sökum langvarandi þurrka. Túnþökur eru víðast hvar ónýtar í borginni og í Breiðholti eru síðustu sílin að drepast í Hólmatjörn.

Jón Ólafsson hyggst selja íslenskt vatn til Bandaríkjanna

Vatnsfyrirtæki Jóns Ólafssonar, athafnamanns hefur gert samning um dreifingu á vatni við Bandaríska fyrirtækið Anheuser Bush sem er stærsta fyrirtækið sem dreifir drykkjarvörum í Bandaríkjunum.

Dagvöruverð lægra nú en árið 2002

Finnur Árnason forstjóri Haga segir að verðlag á dagvöru hafi haldið verulega aftur af verðbólgunni síðustu fimm árin. Finnur segir að matvörur ásamt öðrum dagvörum, hafi lækkað á þessu tímabili og því sé fólk að greiða minna fyrir dagvörukörfuna núna en í febrúar árið 2002.

Getur sótt um undanþágu hjá Heimavarnarráðuneytinu

Dagbjört Rós Halldórsdóttir var rekinn frá Bandaríkjunum fyrir tveimur mánuðum, eftir að hún var handtekinn fyrir hraðakstur. Dvalarleyfi hennar var útrunnið en erfiðleikar voru í hjónabandinu og bandarískur eiginmaður hennar hafði þá um tíma komið sér undan því að skrifa upp á umsókn hennar um græna kortið.

Atvinnuleysi á ekki að vera hagstjórnartæki segir ASÍ

Ólafur Darri Andrason hagfræðingur ASÍ segir hugmyndir framkvæmdastjóra Samtaka atvinnulífsins um að opna vinnumarkaðinn enn frekar til að draga úr verðbólgu benda til að hann vilji nota atvinnuleysi sem hagstjórnartæki. Framundan sé atvinnuleysi vegna loka stóriðjuframkvæmda og aflasamdráttar og óvarlegt sé að kynda enn frekar undir það.

SPRON fyrirhugar breytingar í hlutafélag

Stjórn SPRON samþykkti í dag að undirbúa breytingu sparisjóðsins í hlutafélag og óska eftir skráningu félagsins í Norrænu kauphöllina á Íslandi. Þetta kemur fram í tilkynningu frá SPRON. Breyting sparisjóðsins í hlutafélag verður háð samþykki stofnfjáreigenda og Fjármálaeftirlitsins.

Sviptur leyfi til að ávísa róandi og örvandi lyfjum

Heilbrigðisráðuneytið hefur svipt þekktan geðlækni leyfi til að ávísa róandi og örvandi lyfjum. Leyfissviptingin er að tillögu landlæknis en embættinu hefur borist fjöldi ábendinga um að læknirinn ávísi ekki lyfjum samkvæmt læknisfræðilegum aðferðum.

Reyk lagði frá Járnblendiverksmiðjunni á Grundartanga

Mikinn reyk lagði frá Járnblendiverksmiðjunni á Grundartangi nú síðdegis eftir að viftur sem sjá um að soga reyk frá verksmiðjunni hættu að virka. Aðeins tók nokkrar mínútur að koma viftunum aftur í gang.

Fluttur á slysadeild eftir trampólínslys

Flytja þurfti karlmann á þrítugsaldri á slysadeild um síðustu helgi eftir óhapp á trampólíni. Maðurinn fékk slæma byltu og féll í yfirlið skamma stund. Þá fékk hann einnig skurð á andlitið.

Bára Friðriksdóttir valin í Tjarnaprestakalli

Valnefnd í Tjarnaprestakalli, Kjalarnesprófastsdæmi, ákvað á fundi sínum þann 6. júlí síðastliðinn að leggja til að sr. Bára Friðriksdóttir verði ráðin sóknarprestur í Tjarnaprestakalli. Níu umsækjendur voru um embættið. Embættið veitist frá 1. september 2007.

Tilkynning frá vegagerðinni

Vegna mikilla blæðinga í malbiki á Kræklingahlíð norðan Akureyrar eru vegfarendur beðnir að sýna sérstaka aðgát meðan þetta ástand varir og fylgja fyrirmælum um lækkun á umferðarhraða. Búið er að gera við skemmdir á klæðningu á Þingvallavegi við Grafningsvegamót. Vegfarendur eru þó enn beðnir að sýna aðgát vegna steinkasts.

Þrettán stútar teknir um helgina

Þrettán ökumenn voru teknir fyrir ölvunarakstur í umdæmi lögreglunnar á höfuðborgarsvæðinu um helgina. Þetta voru tólf karlar og ein kona á fimmtugsaldri. Lögreglan stöðvaði sömuleiðis för sex annarra ökumanna í Reykjavík um helgina. Fimm þeirra höfðu þegar verið sviptir ökuleyfi og einn hafði aldrei öðlast ökuréttindi. Þetta voru allt karlmenn.

Nafn mannsins sem lést á Akrafjallsvegi

Maðurinn sem lést í umferðarslysi á Akrafjallsvegi í gær hét Aðalsteinn Davíð Jóhannsson. Hann var 35 ára gamall og bjó á Akranesi. Hann lætur eftir sig eiginkonu og tvö ung börn.

Faðir stúlkunnar vill hjálp barnaverndaryfirvalda

Stúlkunni sem réðst á jafnöldru sína í tívolíinu við Smáralind síðustu viku var vísað úr skóla síðastliðið haust. Hún er á skólaskyldualdri en fékk ekki skólavist síðastliðinn vetur. Faðirinn segist hafa átt viðtöl við barnaverndaryfirvöld í dag og leiti eftir úrræðum á þeirra vegum.

Mikið um innbrot í bíla

Lögreglan á höfuðborgarsvæðinu ítrekar á vefsíðu sinni við vegfarendur að skilja ekki verðmæti eftir í bílum sínum. Sé það óumflýjanlegt er mikilvægt að verðmæti séu ekki í augsýn. Talsvert hefur verið um innbrot í bíla upp á síðkastið. Þjófar virðast meðal annars sækjast eftir geislaspilurum, myndavélum og GPS-tækjum.

Sjúkraflutningamenn vilja ekki Benz

Sjúkraflutningamenn óttast öryggi sitt og farþega í nýjum sjúkrabílum sem keyptir hafa verið til landsins. Í mörg ár hefur Slökkvilið höfuðborgarsvæðisins notað bíla af Econline gerð. Nú hafa hins vegar verið keyptir bílar af gerðinni Benz-Sprinter.