Kínverjar reyna að róa Japani

Kínverjar reyndu í dag að róa Japani yfir mikilli hervæðingu sinni, á fundi varnarmálaráðherra landanna. Meðal annars varð að samkomulagi að kínverskt herskip heimsækti Japan og er það í fyrsta skipti í sögu landanna. Kínverjar hafa stóraukið framlög til hermála undanfarin ár, og Japanir hafa af því áhhyggjur.

Mikil fjölgun kennslukvenna í framhaldskólum

Konum við kennslu í framhaldsskólum hefur fjölgað um 40 prósent á aðeins sex ára tímabili samkvæm ttölum Hagstofunnar. Þar kemur fram að konur hafi verið rúmur helmingur starfsmanna á síðasta skólaári eða rúm 52 prósent en þær voru tæp 46 prósent skólaárið 2000-2001.

Yfirsáust tíu þúsund evrur

Þjófur sem sem stal skjalatösku í Dusseldorf í gær, tók ekki eftir því að í henni voru tíu þúsund evrur, eða rúmar 860 þúsund krónur, og henti henni. ,,Ég gæti trúað að hann yrði svekktur þegar hann kemst að því" sagði talsmaður lögreglu í borginni.

Á annað þúsund mótmælir nýju miðbæjarskipulagi á Selfossi

Á annað þúsund manns hafa undirritað mótmæli gegn nýju miðbæjarskipulagi á Selfossi, að sögn Guðmundar Sverrissonar formanns Miðbæjarfélagsins, í viðtali við Suðurland.is. Frestur til að skila inn athugasemdum rennur út í dag.

Breytt landslag stjórnmála rætt á fundi VG

Flokksráðsfundur Vinstrihreyfingarinnar - græns framboðs verður haldinn á Hótel Flúðum föstudaginn 31. ágúst og laugardaginn 1. september. Katrín Jakobsdóttir setur fundinn klukkan 17. Steingrímur J. Sigfússon fer yfir hlutverk Vinstri grænna í breyttu landslagi íslenskra stjórnmála.

Bíll í sjóinn í Hafnarfjarðarhöfn

Kafarar frá Slökkviliði höfuðborgarsvæðisins voru kallaðir að Hafnarfjarðarhöfn rétt eftir klukkan tíu í kvöld en mannlaus bíll hafði farið í sjóinn. Bíllinn hafði runnið niður sjósetningar ramp við Fornubúðir og farið á kaf. Að sögn vaktstjóra hjá slökkviliðinu gekk vel að ná bílnum á þurrt land en verkinu lauk nú fyrir skömmu síðan.

Mætti á löggustöð til að tilkynna um tjón og var handtekinn

Karlmaður á þrítugsaldri var handtekinn á lögreglustöðinni í Breiðholti í gær en þangað kom maðurinn til að tilkynna um tjón sem hann hafði orðið fyrir. Maðurinn reyndist í annarlegu ástandi og var hann umsvifalaust handtekinn fyrir að aka undir áhrifum fíkniefna.

Úr fötunum eða ég sprengi

Alríkislögreglan í Bandaríkjunum rannsakar nú ránstilraunir sem framdar hafa verið að undanförnu í nokkrum fylkjum. Ránið fer þannig fram að maður hringir í banka og verslanir og segir að sprengja sé á staðnum. Hann hótar að sprengja verði ekki orðið við kröfum hans um peninga og að allir viðstaddir klæði sig úr fötunum.

Guðlaugur Þór segir íslenska lyfjamarkaðinn ekki virka sem skyldi

Guðlaugur Þór Þórðarson, heilbrigðisráðherra átti í gær og fyrradag fundi með tveimur framkvæmdastjórum Evrópusambandsins. Guðlaugur hitti þá Günter Verhaugen sem fer með lyfjamál og Makros Kyprianou, sem fer með heilbrigðismálin fyrir hönd framkvæmdarstjórnarinnar. Fundirnir fóru fram í Brussel.

Geislasverð Loga fer í geimferð

Megi ,,Mátturinn" vera með geimferjunni Discovery og þeim sjö geimförum sem um borð verða í ferð þeirra að Alþjóðlegu geimstöðinni í október. Því með í för verður geislasverðið sem Logi Geimgengill notaði í Stjörnustríðs myndinni Endurkoma Jedi-riddarans.

12 Kóreumenn lausir úr prísund sinni

Talíbanar í Afganistan hafa nú sleppt 12 af þeim 19 Suður-Kóreumönnum sem þeir hafa haft í gíslingu undanfarnar vikur. Gíslunum var sleppt lausum í þremur hópum á mismunandi tímum í dag. 10 konum og tveimur mönnum hefur verið sleppt.

Rúta brann til kaldra kola í Súðavoginum

Eldur kom upp í rútu á bílaplani í Súðavogi 7 nú fyrir stundu. Slökkviliðsmenn voru kallaðir á vettvang og hafa þeir að ráða niðurlögum eldsins. Ekkert er vitað um eldsupptök að svo stöddu.

Ingibjörg Sólrún boðar mjúka utanríkisstefnu

Framlag Íslendinga á alþjóðavettvangi verður í framtíðinni í formi sérfræðinga en ekki vopnaðra sveita. Ingibjörg Sólrún Gísladóttir utanríkisráðherra boðar "mjúka" utanríkisstefnu og varnarstefnu sem byggi á samráði allra stjórnmálaflokka. Þetta kom fram á ráðstefnu sem haldin var í dag.

Steingrímur segir að fresta verði gildistöku vatnalaga

Endurskoðun á vatnalögunum sem eiga að taka gildi 1. nóvember næstkomandi fer nú fram í iðnaðarráðuneytinu. Í fréttum RUV sagði að kannað sé sérstaklega að vatn verði ekki séreign. Steingrímur J. Sigfússon, segir höfuðatriði að gildistöku lagana verði frestað. Engin leið sé að laga þau til áður en nóvember gengur í garð.

Starfsmenn Arnarfells ekki ólöglegir í landinu

Erlendu starfsmennirnir sem lentu í rútuslysinu síðastliðinn sunnudag teljast ekki ólöglegir í landinu þótt þeir séu ekki skráðir hjá Vinnumálastofnun, segir forstjóri Útlendingastofnunar. Þeir hafi verið hér á landi skemur en þrjá mánuði og megi því vera dvalar-og atvinnuleyfislausir þann tíma.

Þurfti að flýta greiðslum til Arnarfells svo tímaáætlun stæðist

Landsvirkjun þurfti að flýta greiðslum til verktakafyrirtækisins Arnarfells í sumar vegna bágs fjárhags. Stjórn Landsvirkunar hefur fjallað um fjárhagsstöðu Arnarfells að undanförnu og telur að fyrirtækið standi nú í skilum við alla lánadrottna sína.

Einföld lagasetning dygði

Einföld lagasetning dygði til að hindra fyrirtæki í að rukka fólk um seðilgjöld, segir Hörður Einarsson hæstaréttarlögmaður sem kærði útskriftargjald Símans til Eftirlitsstofnunar EFTA, í fyrra. Hvorki Kaupþing né Glitnir vilja gefa upp hversu mikið þeir hafa rukkað í seðilgjöld af viðskiptavinum.

Ástæðulaus ótti vísindamanna

Ástæðulaus ótti, segir upplýsingafulltrúi Landsvirkjunar, um áhyggjur jarðvísindamanna af skjálftavirkni og leka við fyrirhugaðarar virkjanir í Þjórsá..Hann segir að nokkur þúsund ára þéttur sandbotn muni varna leka í farvegi árinnar.

Eru að ná tökum á eldunum

Allt útlit er fyrir að slökkviliðsmenn í Grikklandi nái tökum á skógareldum sem logað hafa í suðurhluta landsins. Í nótt tókst að slökkva um tug elda á Pelópsskaga og loga eldar á tuttugu og fimm stöðum. Hugsanlega verður búið að ráða niðurlögum allra eldanna í kvöld, en vind hefur lægt. Að minnsta kosti secxtíu og fjórir hafa látið lífið af völdum eldanna og yfir þrjú þúsund hafa misst heimili sín.

Bush varar við kjarnorkuhelför

George Bush Bandaríkjaforseti varaði við því að kjarnorkuhelför vofði yfir Mið-Austurlöndum ef Íranar smíðuðu kjarnorkuvopn. Hann sagði Bandaríkjamenn muna bregðast við þessari hættu áður en það væri of seint.

Gekk í skrokk á dómara og braut þrjú rifbein

Markmaður í utandeildarliði Gym 80 í knattspyrnu réðst á dómara eftir leik liðsins í gær og gekk svo í skrokk á honum að þrjú rifbein brotnuðu. Þetta er sami maðurinn og réðst á Eið Smára Guðjohensen í miðbænum í sumar.

Ráðherrar bera ábyrgð á Grímseyjarferjumáli

Formaður Framsóknarflokksins segir að núverandi fjármálaráðherra og fyrrverandi samgönguráðherra beri ábyrgð í málefnum Grímseyjarferjunnar. Hann telur að forsætisnefnd eigi að ræða málið og nefndin og Alþingi verði að ræða stöðu forseta Alþingis í þeim efnum.

Ódýrustu lyf á Íslandi eru seld á Akranesi

Ólafur Adolfsson, lyfsali í Apóteki Vesturlands á Akranesi er óhress með apótekið Lyf og heilsu sem hann segir skrúfa niður verð á algengum lyfjum. Hann fullyrðir að nú um stundir séu ódýrustu lyf landsins fáanleg á Akranesi og tekur dæmi af magalyfi sem lækkaði um 70 prósent skömmu eftir að hann opnaði sína verslun.

Félags- og tryggingamálanefnd fjalli um erlenda verkamenn

Ögmundur Jónasson, fulltrúi Vinstri - grænna í félags- og tryggingamálanefnd, hefur óskað eftir því við formann nefndarinnar, Guðbjart Hannesson, Samfylkingunni, að nefndin verði kölluð saman hið fyrsta til þess að fjalla um erlenda verkamenn og réttarstöðu þeirra í ljósi fréttaflutnings undanfarna daga.

Viðbjóðslegar myndir bjarga lífi

Svört lungu, æxli og lík reykingamanna eru meðal þess sem mun blasa við breskum reykingamönnum í lok ársins 2009. Heilbrigðisyfirvöld í Bretlandi kynntu í dag ný lög um merkingar á tóbaksumbúðum. Í stað skrifaðra viðvarana verða nú settar myndir af öllum þeim hryllingi sem neysla tóbaks getur haft í för með sér.

Rúna Hauksdóttir nýr formaður Lyfjagreiðslunefndar

Guðlaugur Þór Þórðarson, heilbrigðisráðherra, hefur skipað Rúnu Hauksdóttur Hvannberg, formann Lyfjagreiðslunefndar frá og með næstu mánaðamótum. Hún tekur við af Páli Péturssyni, fyrrverandi ráðherra, sem lætur af störfum sökum aldurs sem formaður og starfsmaður nefndarinnar.

Lykillinn sem hefði getað bjargað Titanic

Lykill sem hugsanlega hefði getað forðað Titanic frá því að sigla á ísjakann verður seldur á uppboði í Bretlandi í næsta mánuði. Lykillinn gekk að hirslu sem geymdi sjónauka fyrir útsýnistunnu skipsins. Skipverji sem var á útkíkki þegar Titanic sigldi á borgarísjakann sagði fyrir sjórétti að ef þeir hefðu haft sjónauka hefur þeir séð jakann það mikið fyrr að þeir hefðu getað sveigt frá honum.

Dómnefnd fyrir Kvosina skilar vonandi tillögum í næstu viku

Vonast er til þess að dómnefnd sem fer yfir tillögur að nýju skipulagi í Kvosinni í kjölfar brunans í miðbænum í vor skili niðurstöðu í næstu viku. Eins og fram hefur komið í fréttum bíða eigendur húsanna að Austurstræti 22 og Lækjargötu 2, sem skemmdust mikið í brunanum, eftir því hvað kemur út úr hugmyndasamkeppni um enduruppbyggingu í Kvosinni áður en þeir taka ákvörðun um uppbyggingu.

Þrír drepnir í skotárás í Bretlandi

Þrír voru skotnir til bana og tveir særðir í skotárás í Hertfordshire í Bretlandi í gærkvöldi. Þriggja ára stúlka fannst ómeidd í húsinu, og er talið að hún hafi orðið vitni að árásinni.

Dónaskapur að láta íbúana ekki vita af heræfingunni

Einar Örn Thorlacius sveitarstjóri Hvalfjarðarsveitar segir að hvorki sveitarstjórn, íbúar né lögregla í Hvalfirði hafi verið látin vita af sprengjueyðingaræfingunni Northern Challenge sem hófst í gærmorgun. „Þetta er hreinn dónaskapur að senda okkur ekki einu sinni fax eða tölvupóst um að þetta stæði til," segir Einar Örn.

Þörf á fleiri almenningsalernum í miðbænum

Starfshópur um málefni almenningssalerna í borginni hefur komist að þeirri niðurstöðu að bæta þurfi við fimm nýjum salernum í miðborg Reykjavíkur, þar á meðal í Hljómskálagarð og við Austurvöll. Þá leggur starfshópurinn til að merkja þurfi betur og kynna nokkur velbúin salerni sem eru þegar í miðborginni. Farið var yfir niðurstöðu starfshópsins á fundi umhverfisráðs í gær.

Voffi erfir mest

Hóteldrottningin og milljarðamæringurinn Leona Helmsley - betur þekkt sem ,,the Queen of Mean" - sem lést í síðustu viku, ánafnaði hundinum sínum 12 milljónum Bandaríkjadala. Þá sagði í erfðaskrá hennar að hundurinn skildi jarðarður við hlið hennar og eiginmannsins í fimm stjörnu lúxus-grafhvelfingu þeirra.

Deilt um hvort svæði séu afmörkuð til hvalaskoðana

„Þetta er áberandi versta sumarið og við höfum séð mun færri hrefnur bæði á Faxaflóa og við Húsavík en undanfarin ár," segir Ásbjörn Björgvinsson, formaður Hvalaskoðunarsamtaka Íslands. Samtökin sögðu í tilkynningu í dag að tugir hrefna hefðu verið skotnir innan hvalaskoðunarsvæða þrátt fyrir loforð stjórnvalda um hið gagnstæða en Gunnar Bergmann Jónsson, framkvæmdastjóri Félags hrefnuveiðimanna, kannast ekki við að ákveðið hafi verið með formlegum hætti að skipta svæðum sérstaklega milli hvalveiðimanna og hvalaskoðunarmanna.

Öflugasti her skæruliða í Írak leggur niður vopn

Shía klerkurinn Moqtada al-Sadr hefur skipað Mehdi her sínum að hætta öllum hernaðaraðgerðum í írak í sex mánuði. Þetta eru miklar fréttir því Bandaríkjamenn líta á Mehdi herinn sem mestu ógnina gegn friði og öryggi í Írak. Þessi her er enda öflugastur og best vopnaður af þeim fylkingum sem berjast gegn veru erlendra hermanna í Írak.

Tíu sjávarútvegsfyrirtæki með helming af kvótanum

Fiskistofa hefur gefið út skiptingu á kvótanum fyrir næsta fiskveiðiár sem hefst nú 1. september. Í ljós kemur að tíu stærstu sjávarútvegsfyrirtækin ráða nú yfir 49% eða rétt tæpum helming af heildarkvótanum. Af þeim er HB Grandi langstærstur með rúmlega 10% af kvótanum eða sem nemur 30.000 þorskígildistonn.

Hershöfðingi rekinn eftir morð á rússneskum hermanni

Varnarmálaráðherra Rússlands hefur rekið hershöfðingja sem stjórnaði herstöð þar sem drukknir foringjar börðu ungan óbreyttan hermann til bana. Ill meðferð á ungum hermönnum er landlæg í rússneska hernum. Fjölmörg dæmi eru um að þeir lifi hana ekki af. Átján mánaða herskylda er í Rússlandi og ungir menn gera allt sem þeir geta til þess að komast hjá henni.

Bæjarstjóraskipti í Mosfellsbæ á föstudag

Á föstudag verða bæjarstjóraskipti hjá Mosfellsbæ, þegar Ragnheiður Ríkharðsdóttir hættir sem bæjarstjóri Mosfellsbæjar eftir rétt rúmlega fimm ára starf, en eins og kunnugt er var Ragnheiður kjörinn alþingismaður í alþingiskosningunum síðast liðið vor. Við starfinu tekur Haraldur Sverrisson bæjarfulltrúi.

Garðar Hólm ætlar að verða söluhæstur hjá Remax í Evrópu

Garðar Hólm sölufulltrúi hjá Remax Center var annar söluhæstur hjá Remax-fasteignasölunum í Evrópu á sameiginlegum lista sem gefinn var út í apríl. Listinn er gefinn út á tveggja mánaða fresti en í júní hafði Garðar færst niður um nokkur sæti.

Segja reykingalög í Danmörku líkleg til að skapa sundrungu

Vinnueftirlitið í Danmörku hefur þegar fengið 23 ábendingar um brot á lögum reykingabann á veitingahúsum, tveimur vikum eftir að bannið tók gildi í landinu.

Geimfarinn ber við tímabundinni geðveiki

Lögfræðingar geimfarans Lisu Nowak hyggjast bera við tímabundinni geðveiki þegar hún mál hennar verður tekið fyrir í næsta mánuði. Nowak, sem er 44 ára gömul gift þriggja barna móðir, var ákærð fyrir tilraun til mannráns, líkamsáras og þjófnað.

Segja vísindaveiðar hafa verið stundaðar innan hvalaskoðunarsvæða

Hvalaskoðunarsamtök Íslands skora á Kristján Möller, ráðherra ferðamála, og Össur Skarphéðinsson, tilvonandi ferðamálaráðherra, að hlutast til um að ákvörðun sjávarútvegsráðherra um að gefa út kvóta til hrefnuveiða fyrir innanlandsmarkað verði endurskoðuð. Samtökin segja vísindaveiðar hér við land hafa skaðað hvalaskoðun til landsins og veiðar hafi verið stundaðar innan hvalaskoðunarsvæða.

Missti meðvitund í hörðum árekstri á Dalvegi

Ökumaður slasaðist alvarlega og missti meðvitund í hörðum árkestri tveggja bíla á Dalvegi um klukkan hálf níu í morgun. Hinn slasaði var auk þess fastur í bílflakinu og þurftu björgunarmenn frá slökkviliðinu að beita klippum til að ná honum út.

Danskir sjómenn komnir heim eftir 83 daga í gíslingu

Fimm danskir sjómenn af skipinu Danica White eru nú komnir heim aftur eftir að hafa verið í gíslingu sjóræningja í Sómalíu í 83 daga. Útgerð skipsins er sögð hafa greitt um 100 milljónir króna fyrir að fá þá lausa. Sjóræningjar réðust á skipið undan austurströnd Sómalíu fyrr í sumar og færðu það til hafnar.

Segir ökutækjatryggingu greiða sjúkrakostnað vegna rútuslyss

Ökutækjatrygging rútunnar sem keyrði út af veginum í Bessastaðabrekku í Fljótsdal síðastliðinn sunnudag greiðir sjúkrakostnað þeirra 15 erlendu starfsmanna sem slösuðust í rútuslysinu.

Risaskjaldabaka síðast við Íslandsstrendur fyrir 44 árum

Sá fáheyrði atburður varð í Garðsjó við Reykjanes í gær, að hvalaskoðendur sáu risaskjaldböku þar á sundi. Sjónarvottar telja að hún hafi verið allt að hálfur annar metri að lengd og var hún umkringd höfrungum.