Segja reykingalög í Danmörku líkleg til að skapa sundrungu

Vinnueftirlitið í Danmörku hefur þegar fengið 23 ábendingar um brot á lögum reykingabann á veitingahúsum, tveimur vikum eftir að bannið tók gildi í landinu.

Fram kemur á vef Jótlandspóstsins að eftirlitið fylgi ábendingunum eftir með heimsóknum en nokkur óánægja er meðal veitingamanna með bannið. Haft er eftir formanni Samtaka veitingamanna í Danmörku, að lögin séu líkleg til að skapa sundrungu meðal veitingamanna og að þeir muni tilkynna um brot keppinautanna. Lögin um reykingabann ná aðeins til veitingastaða sem eru yfir 40 fermetrar að stærð og bendir formaðurinn á að slík mismunun sé ávísun á óeiningu.