Taprekstur eykst ár frá ári

Ríkisútvarpið eyddi tæpum hálfum milljarði umfram heimildir á hálfs árs tímabili í fyrra. Taprekstur stofnunarinnar hefur margfaldast á tveimur árum. Þingmenn spurðu í dag hvað hefði verið að gerast í útvarpinu. Menntamálaráðherra var gagnrýndur fyrir að leyna upplýsingum um fjárhagsstöðu stofnunarinnar í dag.

Telur þörf á lagabreytingum vegna barnaníðinga

Forstjóri Barnaverndarstofu telur þörf á að breyta lögum svo hægt sé að fylgjast betur með barnaníðingum sem líklegir eru til að brjóta af sér á ný. Lögreglan rannsakar játningar Ágústs Magnússonar í Kompás þar sem hann sagðist hafa framið fleiri brot en hann hefur verið dæmdur fyrir.

Lýst eftir karlmanni á fimmtugsaldri

Lögreglan á höfuðborgarsvæðinu lýsir eftir Sigurði Hólm Sigurðssyni. Sigurður er 43 ára, grannvaxinn og stuttklipptur. Hann er 184 cm á hæð.

Norðurskautsverkefni styrkt

Samstarfsnefnd Norrænu ráðherranefndarinnar hefur samþykkt að styrkja 22 Norðurskautsverkefni. Í fréttum Norrænu ráðherranefndarinnar segir að styrkirnir nemi liðlega 80 milljónum íslenskra króna.

Beirút lömuð vegna óeirða

Beirút, höfuðborg Líbanons, er nærri lömuð vegna óeirða sem þar hafa geisað síðan í nótt. Mörg þúsund mótmælendur hafa lagt niður vinnu í Beirút og víðar og krefjast þess að ríkisstjórnin segi af sér svo hægt verði að kjósa nýtt þing. Stjórnvöld segja þetta tilraun Hizbollah til valdaráns.

Þjófar mikið á ferðinni

Nokkuð hefur verið um innbrot á höfuðborgarsvæðinu í dag og í nótt. Brotist var inn í hús í Mosfellsbæ og þaðan stolið tölvum, tölvuskjáum, fartölvu og myndavél. Ekki er vitað hvort einn eða fleiri þjófar hafi þar verið á ferð en talið er að þeir hafi farið inn um glugga.

Vantar hermenn í fleiri stríð

Bandarískir hershöfðingjar hafa af því nokkrar áhyggjur að Írak og Afganistan hafi dregið úr getu heraflans til þess að berjast á nýjum vígstöðvum. Yfirhershöfðingi landgönguliðsins sagði í yfirheyrslu hjá þingnefnd að þeir hefðu skoðað aðrar hernaðaráætlanir, og hefðu áhyggjur af því að þar skorti getu á sumum sviðum.

Haraldur Johannessen þarf að víkja sæti

Hæstiréttur Íslands úrskurðaði í dag að Haraldur Johannessen, ríkislögreglustjóri, skuli víkja sæti við rannsókn á meintum skattalagabrotum Baugsmanna.

Segolene Royal biðst vægðar

Segolene Royal, forsetaframbjóðandi sósíalista í Frakklandi, bað fjölmiðla í dag um að hætta að hnýsast í einkalíf sitt. Fjölmiðlar hafa undanfarið fjallað mikið um meintan ágreining hennar og sambýlismanns hennar Francois Hollande, sem er formaður Sósíalistaflokksins og gerði sér sjálfur vonir um að verða í framboði til forseta. Litlar líkur eru á að fjölmiðlar verði við óskum hennar.

Í hár saman út af tölvuleikjum

Óhófleg tölvunotkun hefur valdið vandræðum á heimilum í höfuðborginni. Á vef lögreglunnar er sagt frá heimsókn lögreglumanna á höfuðborgarsvæðinu að ónefndu húsi í gær þar sem fjölskyldan var komin í hár saman vegna tölvunotkunar unglingspilta á heimilinu.

Vatnajökulsþjóðgarður verður stærsti þjóðgarður Evrópu

Jónína Bjartmarz umhverfisráðherra mælti í dag fyrir frumvarpi um stofnun Vatnajökulsþjóðgarðs á Alþingi. Garðurinn verður stærsti þjóðgarður Evrópu ef frumvarpið nær fram að ganga.

Ítalskur ráðherra krefst hermanna heim frá Afganistan

Ráðherra græningja í samsteypustjórn Romanos Prodis, á Ítalíu, hefur hótað uppreisn í ríkisstjórninni vegna ítalskra hermanna í Afganistan. Hann krefst þess að gerð verði tímaáætlun um heimkvaðningu þeirra. Ítalir hafa þegar kallað hermenn sína heim frá Írak, en Prodi var á móti því stríði. Hann segir aftur á móti að hermennirnir í Afganistan tilheyri friðargæslusveitum, og það sé allt annar handleggur.

Þrjátíu og níu vilja forstjórastólinn hjá Umhverfisstofnun

Þrjátíu og níu sóttu um starf forstjóra Umhverfisstofnunar en umsóknarfresturinn rann út í gær. Davíð Egilsson er núverandi forstjóri stofnunarinnar.

Samstaða um að bregðast við ólöglegum netfjárhættuspilum

Samstaða var um það á Alþingi í dag að bregðast þyrfti við auglýsingum um fjárhættuspil sem birst hefðu í fjölmiðlum á undanförnum vikum og fjárhættuspilum á Netinu en jafnframt að málið væri snúið og því ekki auðvelt að koma böndum á slíka starfsemi.

Forseti Ísraels ákærður fyrir nauðgun

Forseti Ísraels, Moshe Katsav, verður ákærður fyrir nauðgun og önnur kynferðisbrot gegn fjórum konum í starfsliði hans. Dómsmálaráðuneyti Ísraels sendi frá sér yfirlýsingu þess efnis, í dag. Forsetinn hefur neitað allri sök.

RÚV-frumvarpið samþykkt á Alþingi

Frumvarp um Ríkisútvarpið ohf var samþykkt á Alþingi laust eftir klukkan þrjú með 29 atkvæðum stjórnarliða gegn 21 atkvæðum stjórnarandstöðu í kjölfar háværra umræðna um fjárhagsstöðu stofnunarinnar.

Miðstöð munnlegrar sögu komið á fót

Miðstöð munnlegrar sögu verður opnuð við hátíðlega athöfn í Þjóðarbókhlöðunni á föstudaginn kemur. Eftir því sem fram kemur í tilkynningu mun miðstöðin beita sér fyrir söfnun, varðveislu, rannsóknum og miðlun á munnlegum heimildum, það er hinu talaða máli, sem snerta sögu lands og þjóðar.

Kaþólska kirkjan vill undanþágu frá hommalögum

Kaþólska kirkjan í Bretlandi segist kunna að loka ættleiðingarskrifstofum sínum ef hún verður neydd til þess, með nýjum lögum, að leyfa samkynhneigðum pörum að ættleiða börn. Löggjöf sem bannar mismunun samkynhneigðra tekur gildi í apríl. Um 4000 börn bíða þess á ættleiðingarstofum kirkjunnar að fá nýja foreldra.

Fáir ungar komust á legg

Fáir ungar fuglanna á Tjörninni í Reykjavík komust á legg á síðasta ári. Aðeins grágæsir komu upp ungum sínum affallalítið.

Rafmagn komið aftur á Snæfellsnesi

Viðgerð á háspennulínu er lokið og er rafmagn komið aftur á Arnarstapa og Hellnum á Snæfellsnesi. Rafmagn fór af svæðinu snemma í morgun og hefur viðgerð staðið yfir frá því á ellefta tímanum.

Tap RÚV um 420 milljónir á fyrri helmingi ársins 2006

Menntamálaráðherra var harðlega gagnrýndur við upphaf þingfundar fyrir að svara því fyrst í dag hver fjárhagsstaða Ríkisútvarpssins væri og var bent á að skuldir RÚV frá 1. janúar til 30. júní í fyrra hefðu nemið 420 milljónum króna og að uppsafnaðar skuldir stofnunarinnar væru 5,2 milljarðar króna.

Draumastúlkurnar fengu flestar tilnefningar til Óskarsverðlauna

Kvikmyndin Draumastúlkurnar eða Dreamgirls hlaut flestar tilnefningar til Óskarsverðlauna í ár eða átta. Tilnefningarnar voru kynntar í Beverly Hills í Bandaríkjunum í dag. Kvikmyndin Babel hlaut sjö tilnefningar.

Ólafur Ragnar þiggur sæti í Þróunarráði Indlands

Ólafur Ragnar Grímsson, forseti Íslands, hefur þegið sæti í Þróunarráði Indlands. Ráðinu er ætlað að móta tillögur um hvernig Indverjar geta styrkt efnahagslíf sitt og velferð þjóðarinnar án þess að umhverfi bíði varanlegt tjón af eða að gæðum náttúrunnar verði stefnt í hættu.

Vantrú á Bandaríkin vex um allan heim

Óeirðir í Líbanon

Mörg þúsund Líbanar hafa lamað nær alla Beirút og lokað af hluta hennar. Stjórnarandstæðingar hafa lagt niður vinnu víða um Líbanon og ætla sér að steypa ríkisstjórn landsins með góðu eða illu.

Hrant Dink borinn til grafar í Istanbúl

Mikill viðbúnaður var í Istanbúl í dag þegar tugþúsundir manna söfnuðust saman á götum úti til að berja augum kistu blaðamannsins Hrants Dink sem borinn var til grafar í dag. Dink var skotinn til bana á föstudaginn.

Nærri því étinn af hákarli

Rúmlega fertugur Ástrali liggur þungt haldinn á sjúkrahúsi í heimalandi sínu eftir að þriggja metra langur hákarl réðst á hann undan austurströnd landsins í morgun. Maðurinn var við köfun þegar hákarlinn réðist á hann og beit um höfuð hans. Tókst manninum með snarræði að pota í auga hákarlsins sem losaði um tak sitt og spýtti nánast kafaranum út úr sér.

Hvetja til laga um hámarkslosun gróðurhúsalofttegunda

Forstjórar níu af stærstu fyrirtækjum Bandaríkjanna, þeirra á meðal Alcoa, skora á Bush Bandaríkjaforseta að setja lög um hámarkslosun gróðurhúsalofttegunda og verndun andrúmsloftsins. Forsetinn flytur árlega stefnuræðu sína í nótt og búist er við að umhverfismál beri þar á góma.

Beita þveröfugri aðferð við Akureyringa

Borgaryfirvöld í Reykjavík ætla að beita þveröfugri hagfræði við bæjaryfirvöld á Akureyri til að lokka fleiri farþega upp í strætisvagna sína. Með fjölgun farþega að markmiði hafa Akureyringar fellt fargjöldin niður en til að ná sama markmiði ætla Reykvíkingar að hækka sín fargjöld til muna.

Snjóflóðahætta utan þéttbýlis

Snjóflóðahætta getur verið utan þéttbýlis víða á landinu og féll eitt á Súðavíkurveg um miðnætti, skammt frá gamla þorpinu, sem eyddist í snjóflóðinu mikla fyrir rúmum áratug.

Hvalkjöt í hundamat

Birgðir af illseljanlegu hvalkjöti hafa hlaðist upp í Japan og hafa aukist um tvö þúsund tonn á tveimur árum. Greenpeace telur að með þessu séu brostin öll rök fyrir hvalveiðum Íslendinga. Benda samtökin á að Japanar séu farnir að nota hvalkjöt í hundamat.

Játningar kynferðisbrotamanns rannsakaðar

Játning Ágústs Magnússonar í Kompási á sunnudag, þar sem hann segir fórnarlömb sín hafa verið fleiri en hann var dæmdur fyrir, verður tekin til rannsóknar að sögn lögreglu. Ritstjóri Kompáss mætir í skýrslutöku hjá lögreglu eftir hádegi vegna þáttarins.

Ljóðstafur Jóns úr Vör afhentur

Guðrún Hannesdóttir bar sigur úr bítum í hinni árlegu Ljóðasamkeppni Jóns úr Vör 2007, en úrslitin voru kunngjörð Salnum í Kópavogi í fyrradag.

Fyrirtæki undir smásjá Neytendasamtakanna til 1. mars

Dæmi eru um matvörur sem hafa hækkað um þrjátíu og fimm prósent í janúar samkvæmt nýrri verðlagsvakt sem Neytendasamtökin settu upp á heimasíðu sína í gær. Fyrirtæki verða undir smásjá samtakanna segir formaðurinn sem hefur fulla trú á að lækkun virðisaukaskatts fyrsta mars skili sér til fólksins í landinu.

Álit umheimsins á Bandaríkjunum minnkar

Álit bæði innanlands og utan á utanríkisstefnu Bandaríkjamanna fer þverrandi samkvæmt skoðanakönnun sem breska ríkisúrvarpið hefur látið gera. Leitað var svara hjá 25 þjóðum og voru þrír fjórðu aðspurðra óánægðir með hvernig Bandaríkjamenn tækju á ástandinu í Írak.

Eþíópískir hermenn á förum frá Sómalíu

Eþíópískir hermenn eru byrjaðir að yfirgefa Sómalíu fjórum vikum eftir að þeir komu inn í landið til að hjálpa stjórnarhernum að hrekja burt uppreisnarhreyfinguna Íslamska dómstólaráðið. Eþíópískur hershöfðingi tilkynnti þetta í dag við athöfn þar sem stríðsherrar skiluðu vopnum sínum.

GSM-samband komið í lag á höfuðborgarsvæðinu og Akureyri

Ekki eiga lengur að vera truflanir a GSM-símasambandi hjá Vodafone á höfuðborgarsvæðinu og Akureyri en enn eru truflanir á Suðurlandi. Truflananna varð vart í morgun en einnig voru truflanir á fastlínusambandi hjá nokkrum fyrirtækjum á höfuðborgarsvæðinu. Ástæða bilunarinnar var slitinn ljósleiðari.

Frakkar sagðir of sigurvissir

Franskir miðlar fara hörðum orðum um frammistöðu Frakka í landsleiknum gegn Íslendingum á heimsmeistaramótinu í handknattleik í gær. Þar segir að fall Evrópumeistaranna hafi verið hátt enda tapaði liðið með átta mörkum fyrir Íslandi. Frakkarnir hafi einfaldlega verið of sigurvissir eftir stórsigra á Áströlum og Úkraínumönnum.

Sálfræðingur skoðar frumskógarkonuna

Spænskur sálfræðingur er á leið til Kambódíu til að skoða konu sem margir telja að hafi gengið sjálfala í frumskóginum í tæpa tvo áratugi. Fjölskyldan segist þekkja aftur stúlku sem hvarf fyrir 19 árum. Efasemdarmenn segja hins vegar að stúlkan hafi líklega ekki dvalist í frumskóginum svo lengi og sé hugsanlega geðsjúk.

Deilur um ísbjarnaveiðar á Grænlandi

Gert Ignatiussen, sem á sæti í bæjarstjórnin Tasiilaq á Grænlandi, hefur gagnrýnt opinberlega kvóta til ísbjarnaveiða fyrir Austur-Grænland. Álítur hann að kvótinn, sem telur 50 dýr á ári, sé full rýr fyrir byggðarlög þessa svæðis þar sem tekjumöguleikar séu færri en sunnar á landinu.

Fallið frá gæsluvarðhaldskröfu yfir manni vegna bruna

Lögreglan á Selfossi féll í gær frá kröfu sinni um að þriðji maðurinn yrði úrskurðaður í gæsluvarðahald í tengslum við eldsvoða í parhúsi í Þorlákshöfn um helgina. Að sögn lögreglu þróaðist málið á þann veg í dag að ekki þurfti að fara fram á gæsluvarðhald yfir manninum.

Fangar dvöldu í Byrginu

Fangar dvöldu í Byrginu á meðan það starfaði og gátu þeir valsað þar inn og út eftir því sem greint var frá í fréttum Ríkisútvarpsins í kvöld. Þar var rætt við Erlend Baldursson hjá Fangelsismálastofnun sem sagði að um 30 fangar hefðu fengið að afplána þar hluta dóms síns.

Byssum stolið úr sumarbústað í Meðalfellslandi

Lögreglan á Selfoss leitar nú þjófs eða þjófa sem brutust inn í sumarbústað í Meðalfellslandi við Þingvallavatn og höfðu á brott með sér eitthvað af þýfi, þar á meðal tvö skotvopn.

Sprenging á skrifstofum Al Arabiya á Gasa

Sprenging varð á skrifstofum arabísku sjónvarpsstöðvarinnar Al Arabiya á Gasaströndinnni í gær. Töluvert tjón varð á innanstokksmunum en enginn var í húsinu þegar sprengingin varð. Ekki liggur fyrir hvað olli sprengingunni en aðalfréttastjóri stöðvarinnar í Dubai greindi frá því að stöðin hefði áður fengið hótanir.

Paris Hilton fær skilorðsbundinn dóm fyrir ölvunarakstur

Dekurdrósin Paris Hilton, einn af erfingjum Hilton-hótelkeðjunnar, var í dag dæmd í þriggja ára skilorðsbundið fangelsi eftir að hún viðurkenndi að hafa ekið undir áhrifum áfengis. Hún var jafnframt sektuð um 390 dollara, rúmlega 27 þúsund krónur fyrir athæfið.