1,8% atvinnuleysi í ágúst

Í ágústmánuði síðastliðnum voru skráðir 65.550 atvinnuleysisdagar á landinu öllu sem jafngilda því að 2.851 manns hafi að meðaltali verið á atvinnuleysisskrá í mánuðinum. Þessar tölur jafngilda 1,8 prósenta atvinnuleysi, en áætlaður mannafli á vinnumarkaði samkvæmt áætlun ffnahagsskrifstofu fjármálaráðuneytis í ágúst 2005 er 156.683.

Fylgjast með hundruðum í Bretlandi

Bresk yfirvöld fylgjast með hundruðum manna til þess að reyna að koma í veg fyrir að hryðjuverkaárásir verði gerðar aftur í landinu. Frá þessu greindi Charles Clarke, innanríkisráðherra Bretlands, í dag þegar hann kom fyrir þingnefnd sem fjallar um eftirmál hryðjuverkaárásanna á Lundúnir í júlí.

Kallaði á frekari brottflutning

Mahmoud Abbas, forseti Palestínu, ítrekaði í dag þá kröfu Palestínumanna að Ísraelar yfirgæfu landnemabyggðir á Vesturbakkanum og í Austur-Jerúsalem, daginn eftir að 38 ár hersetu Ísraela á Gasaströndinni lauk.

Líst illa á nafnið Greyhound-búðir

Eigendur Greyhound-rútufyrirtækisins í Bandaríkjunum hafa beðið fangelsismálayfirvöld í Louisiana að hætta að kalla rútustöð fyrirtækisins í New Orleans Greyhound-búðirnar. Stöðinni var á dögunum breytt tímabundið í fangelsi þar sem meðal annars glæpamenn, sem nýttu sér neyðina eftir yfirreið fellibylsins Katrínar, voru geymdir.

Fjárstuðningur við Bandaríkin

Íslenska ríkið mun veita Bandaríkjamönnum hálfa milljón dala, 31 milljón króna, í fjárhagsaðstoð til enduruppbyggingar í þeim ríkjum sem verst urðu úti í fellibylnum Katrínu. Þetta var ákveðið á fundi ríkisstjórnarinnar í gær.

Íslandsmiðill og Tengir fá boltann

Magnús Ragnarsson, framkvæmdastjóri Íslenska sjónvarpsfélagsins, segir að engin beiðni liggi fyrir frá Digital Ísland um dreifingu á Enska boltanum. "Komi sú beiðni getum við óskað þess að okkar myndlykill verði notaður."

Rökleysa og þvættingur

Samtök myndrétthafa á Íslandi eru harðorðir vegna niðurstöðu lögmanns Neytendasamtakanna um áskriftir að SKY sjónvarpsstöðvunum á Íslandi þar sem kemur fram að Íslendingar sem hafi slíka áskrift séu ekki að brjóta gegn reglum.

Ódýrari netsími

Hive býður nú viðskiptavinum sínum upp á símaþjónustu til útlanda með nettækni. "Hive netsími er fyrsta skref okkar inn á símamarkaðinn með því að bjóða útlandasímtöl til viðskiptavina á um það bil fjórðung af því verði sem hefur verið við lýði," segir Arnþór Halldórsson, framkvæmdastjóri Hive. 

Samið við Eimskip um Herjólf

Samningaviðræður um rekstur Vestmannaeyjaferjunnar Herjólfs eru að hefjast. Samið verður við Eimskip sem átti lægstu tilboðin. Samskip, sem nú rekur Herjólf, átti næst lægstu tilboðin. Frávikstilboðum Samskipa var vísað frá. Ferðum Herjólfs fjölgar verulega.

Axlar ábyrgð á seinagangi

George Bush Bandaríkjaforseti sagðist í dag axla ábyrgð á þeim seinagangi sem alríkisstjórnin hefði sýnt í kjölfar þess að fellibylurinn Katrín reið yfir suðurströnd Bandaríkjanna. Þá sagði hann enn fremur að Katrín hefði afhjúpað alvarleg vandamál varðandi viðbragðsgetu stjórnsýslunnar á öllum stigum við náttúruhamförum og sagðist taka ábyrgð á því að alríkisstjórnin hefði ekki sinnt starfi sínu sem skyldi.

Ekki öflugt öryggistæki fyrir alla

Það skiptir máli við hvaða símafyrirtæki Íslendingar skipta með tilliti til þess hvort GSM-síminn sé öflugt öryggistæki eða ekki. Neyðarlínan getur einungis staðsett þann sem hringir, samstundis og með nokkurri nákvæmi ef um er að ræða viðskiptavin Símans.

Huga þarf að fjöldaútkalli kafara

Jónas Hallsson yfirlögregluþjónn í Reykjavík segir lögreglu, slökkvilið og björgunarsveitir vel skipaðar köfurum til að bregðast við slysum á eða í vatni.

Morðmáli frestað á ný

Mál parsins sem grunað er um að hafa myrt Gísla Þorkelsson, 54 ára gamlan athafnamann, í Jóhannesarborg í Suður-Afríku í sumar, var tekið fyrir í dómi í Boksburg í gær og frestað fram í næsta mánuð.

Með nauðgunarlyf í plasthylkjum

Tveir 25 ára gamlir menn voru dæmdir í mánaðarfangelsi og til að sæta upptöku á rúmum fimmtán grömmum af amfetamíni, tæpu grammi af kókaíni og 38 millilítrum af smjörsýru. Dómurinn, sem var kveðinn upp í Héraðsdómi Suðurlands, var skilorðsbundinn í þrjú ár.

Leggur fram fé vegna Katrínar

Ríkisstjórn Íslands ætlar að leggja fram 31 milljón króna í fjársöfnun fyrir fórnarlömb fellibylsins Katrínar. Peningarnir verða lagðir í sjóð sem George Bush eldri og Bill Clinton, fyrrverandi Bandaríkjaforsetar, stýra.

Leita á 30 hektara svæði í sjó

Sjávarbotninn á leitarsvæðinu vegna skemmtibátsins sem fórst á Viðeyjarsundi um helgina mun víðast hvar auðveldur yfirferðar þó á honum séu einnig erfið svæði. Leit heldur áfram í dag, sem og rannsókn á tildrögum slyssins.

Bændur mega áfram marka fé

Ekki verður hætt að marka fé þrátt fyrir gildistöku nýrrar reglugerðar um búfjármerkingar, en hún gerir ráð fyrir því að sauðfjárbændur og kúabændur merki gripi sína með nýjum plastmerkjum. Sauðfjárbóndi sem blaðið hafði tal af óttaðist að með nýjum merkjum myndi þúsund ára hefð um mörkun fjár leggjast af.

Vilja sektarúrskurð ómerktan

Þingfest voru í gærmorgun mál olíufélaganna Skeljungs og Olís á hendur samkeppnisyfirvöldum í Héraðsdómi Reykjavíkur. Í júní var þingfest sambærilegt mál Kers. Stefnur félaganna eru keimlíkar, en þau vilja freista þess að fá felldan úr gildi úrskurð áfrýjunarnefndar samkeppnisyfirvalda um samráð þeirra.

Verðbólga þurrkar út launahækkun

Verðbólgan hefur þurrkað út þriggja prósenta launahækkun sem almennir kjarasamningar tryggðu launþegum um síðustu áramót.

Höfundur og útgefandi deila

Tekist var á um tryggingar hjá Sýslumanninum í Reykjavík í gær vegna lögbannsbeiðni á bókina Fiskisagan flýgur frá Skruddu. Kristinn H. Benediktsson ljósmyndari, annar höfunda bókarinnar, fór fram á lögbannið þar sem hann taldi brotið á höfundarrétti sínum í frágangi mynda í bókina.

Verkamannaflokkurinn langstærstur

Verkamannaflokkurinn er langstærsti flokkurinn á norska stórþinginu eftir kosningarnar í gær, fékk tæpan þriðjung atkvæða og 61 þingmann kjörinn. Næstur honum kemur Framfaraflokkurinn með 22 prósent og 38 þingmenn kjörna. Skipting þingsæta er afgerandi, núverandi stjórnarandstöðu í hag, hún fékk 87 þingmenn á móti 82 þingmönnum borgaraflokkanna.

Tekist á í Baugsmáli

Saksóknari fór fram á það við aukaþinghald í Baugsmálinu í dag að öll fjörutíu ákæruatriðin yfir sakborningum myndu standa. Verjendur telja hins vegar ekkert annað í stöðunni en að vísa ákærunum frá enda hafi dómarar bent á annmarka á þeim.

Guðmundur Kjærnested jarðsettur

Útför Guðmundar Kjærnested, fyrrverandi skipherra hjá Landhelgisgæslunni, var gerð frá Hallgrímskirkju í dag. Gamlir starfsfélagar Guðmundar, skipherrar, flugmenn, vélstjórar og loftskeytamenn, báru kistu hans úr kirkju. Sjö starfsmenn Landhelgisgæslunnar stóðu heiðursvörð við útförina, en Guðmundur varð þjóðhetja fyrir framgöngu sína í þorskastríðunum við Breta 1972 og 1975. Hann varð 82 ára.

Tekst ekki að ljúka hringvegi

Þrátt fyrir að 15 milljörðum króna af Símapeningum eigi að verja til vegamála á næstu fimm árum tekst ekki að ljúka malbikun hringvegarins. Samkvæmt langtímaáætlun til ársins 2014 á heldur ekki að klára hringinn fyrir þann tíma og virðist sem enn muni líða minnst áratugur þar til þau tímamót verða.

Fær enga aðstoð frá kerfinu

Kristinn Rúnar Magnússon, sem er 26 ára, var sleginn í götuna í hópslagsmálum fyrir sjö árum með skelfilegum afleiðingum. Hann hefur verið 75 prósent öryrki síðan og býr enn í foreldrahúsum. Móðir hans segir að enginn vilji aðstoða þau og hjálpa honum að standa á eigin fótum. Hún segir kerfið hafa brugðist og að álagið á fjölskylduna sé hræðilegt.

Vilja ekki sameiningu bæjarfélaga

Samtökin Áfram, sem verið er að stofna á Norðurlandi, hvetja landsmenn til að hafna sameiningu sveitarfélaga í kosningum eftir mánuð. Þau telja ótækt að ekki sé ákvæði í lögum um að hægt sé að snúa til baka og skilja sveitarfélög í sundur.

Innbrotsþjófur enn ófundinn

Ekki hefur enn tekist að hafa hendur í hári þess sem braust inn í tölvuverslun í Bæjarlind í Kópavogi um fimmleytið í morgun. Stolin traktorsgrafa var notuð við verknaðinn og dyr og stór sýningargluggi voru brotin með afturskóflunni til að komast inn í verslunina. Að sögn lögreglunnar í Kópavogi var nokkrum fartölvum stolið, en ekki er útilokað að fleira hafi verið tekið.

Þriðji ferðamaðurinn út í geim

Það er að fá alveg nýja merkingu að segjast ætla að "skreppa í sólina". Þriðji geimferðamaðurinn leggur af stað í ferð til alþjóðlegu geimstöðvarinnar 1. október. Bandaríski vísindamaðurinn Gregory Olsen greiðir jafnvirði þrettán hundruð milljóna króna fyrir farmiðann - báðar leiðir auðvitað.

Chirac mættur til vinnu

Jacques Chirac Frakklandsforseti stýrði í gær fyrsta ríkisstjórnarfundinum frá því hann þurfti að leggjast inn á sjúkrahús þann 2. september síðastliðinn, vegna kvilla sem læknar kölluðu "minni háttar æðatruflun" sem hamlaði honum sjón. Ráðherrar í stjórninni sögðu forsetann hafa virst hinn hressasti.

NATO geri meira í Afganistan

Varnarmálaráðherrar aðildarríkja Atlantshafsbandalagsins hertu í gær á undirbúningi að því að bandalagið víkkaði út starfssvið friðargæslusveita þess í Afganistan - sem Íslenska friðargæslan á aðild að - til alls landsins. Það gæti gert Bandaríkjamönnum kleift að kalla þúsundir hermanna heim.

Segja olíuverð kalla á alþjóðaátak

Leiðtogar Evrópuríkja kölluðu í gær eftir samstilltum aðgerðum til að hafa hemil á olíuverðshækkunum. Breski fjármálaráðherrann hvatti OPEC, samtök olíuútflutningsríkja, til að auka framleiðsluna og franski forsetinn bað olíufyrirtækin um að lækka eldsneytisverð og auka fjárfestingar í rannsóknum á endurnýjanlegum orkugjöfum.

Stjórnlausar gripdeildir á Gaza

Palestínska lögreglan mátti sín lítils er múgur Palestínumanna stundaði gripdeildir í yfirgefnum landtökubyggðum gyðinga á Gaza-svæðinu í gær. Meðal annars var öllu verðmætu stolið úr fjölda gróðurhúsa sem bandarískir gyðingar höfðu keypt og fært í umsjá palestínsku heimastjórnarinnar, með það fyrir augum að Palestínumenn gætu nýtt þau áfram.

Sakar Tímosjenkó um misbeitingu

Viktor Jústsjenkó, forseti Úkraínu, sakaði í gær fyrrverandi bandamann sinn í "appelsínugulu byltingunni", Júlíu Tímosjenkó, um að hafa misnotað stöðu sína sem forsætisráðherra til að telja lánardrottna orkufyrirtækis, sem hún eitt sinn veitti forstöðu en er nú gjaldþrota, á að láta skuldirnar niður falla.

Lítil von um samþykkt umbóta á SÞ

Í höfuðstöðvum Sameinuðu þjóðanna var í gær enn unnið hörðum höndum að því að bjarga því sem bjargað yrði af ályktun um umbætur á samtökunum sem vonast er til að leiðtogar aðildarríkjanna 191 muni geta fallist á að samþykkja. Leiðtogafundur SÞ hefst í dag og stendur fram á föstudag.

Tímamót fyrir systurflokk VG

"Úrslitin í Norsku þingkosningunum vekja blendnar tilfinningar þar eð Sósíalíski vinstriflokkurinn, systurflokkur okkar, tapaði talsverðu fylgi," segir Steingrímur J. Sigfússon formaður Vinstri grænna.

Baugsákærur standi allar

Jón H. Snorrason saksóknari hjá efnahagsbrotadeild Ríkislögreglustjóra krafðist þess í Héraðsdómi Reykjavíkur í gær að ákærur í Baugsmálinu yrðu allar látnar standa. Gestur Jónsson verjandi Jóns Ásgeirs Jóhannessonar forstjóra Baugs taldi efni til að vísa málinu frá dómi í heild sinni.

Velferð í ríku landi

Þetta er glæsilegur sigur sem Verkamannaflokkurinn vann," segir Ingibjörg Sólrún Gísladóttir formaður Samfylkingarinnar. "Flokkurinn býður upp á skýran valkost með meirihlutastjórn á vinstrivængnum og hefur auk þess aftur náð vopnum sínum. Hann var nokkuð klofinn um tíma en kemur nú fram sem ein heild með sterka ásýnd."

Stjórnarmyndunarviðræður í Noregi

Kjell Magne Bondevik fráfarandi forsætisráðherra hefur tilkynnt Haraldi Noregskonungi að hann ætli að segja af sér eftir að vinstrabandalag Verkamannaflokksins, Sósíalíska vinstriflokksins og Miðflokksins náðu meirihluta á norska Stórþinginu í þingkosningunum á mánudag.

Kólumbískar fjölskyldur setjast að

Þrjár kólumbískar fjölskyldur komu hingað til lands síðastliðinn föstudag á vegum Flóttamannahjálpar Sameinuðu þjóðanna en Reykjavíkurdeild Rauða kross Íslands hjálpar fólkinu við að laga sig að íslensku samfélagi. Þórir Guðmundsson er sviðsstjóri útbreiðslusviðs Rauða kross Íslands.

Íslandsmet í hópknúsi

Flestir mennta- og fjölbrautarskólar pína nýnema sína og niðurlægja með ýmsum hætti í svokölluðum busavígslum. Verzlunarskóli Íslands hefur þó mun kærleiksríkari hefðir eins og sannaðist í gær en þá busuðu þeir nýnemana með því að bjóða þeim pylsu og kók í Fjölskyldu- og húsdýragarðinum.

Norðmenn vilja styrkja tengslin

Íbúar Vestur-Noregs hafa mikinn áhuga á að styrkja tengslin við Íslendinga og leggja sveitarfélög þar nú fjármuni í að byggja upp menningartengda ferðaþjónustu, byggða á sameiginlegri sögu frændþjóðanna.

Hóta árásum á Melbourne og LA

Liðsmenn al-Qaida hóta árásum á Los Angeles og Melbourne í Ástralíu á næstunni. Hótunin kom fram á myndbandi sem birtist á sjónvarpsstöðinni ABC í gær, 11. september. Talið er að maðurinn sem komi fram á myndbandinu sé bandarískur al-Qaida liði sem áður hefur komið fram á myndbandsupptökum þar sem samtökin hóta árásum.

Ákveðið með frekari leit í dag

Maðurinn sem saknað er eftir að skemmtibátur steytti á Skarfaskeri er enn ófundinn. Ákveðið verður með frekari leit með morgninum. Í gær leitaði fjöldi fólks mannsins. Björgunarskip sigldu um sundin og björgunarsveitarmenn gengu fjörur, allt frá Gróttu að Kjalarnesi. Þá leitaði fjöldi fólks á tugum smábáta á sundunum fyrir utan Reykjavík.

Ráða í fyrsta sinn yfir landsvæði

Ísraelski herinn er farinn frá Gasaströndinni eftir 38 ára samfellda hersetu. Fimm þúsund hermenn hafa týnst burt frá svæðinu í nótt og síðasti bíllinn yfirgaf svæðið nú í morgunsárið. Þar með hafa Palestínumenn í fyrsta sinn full yfirráð yfir skilgreindu landsvæði.

Yfirburðarsigur flokks Koizumis

Frjálslyndi lýðræðisflokkurinn í Japan, flokkur Koizumis forsætisráðherra, vann yfirburðarsigur í þingkosningunum þar í landi í gær. Stjórnarflokkarnir hafa nú tvo þriðju hluta þingsæta í neðri deild þingsins og geta því keyrt mál í gegnum þingið sýnist þeim svo án afskipta efri deildarinnar. Frjálslyndi lýðræðisflokkurinn hefur verið áratugi við völd í Japan.