Stórt upp­gjör í vændum í Fram­heimilinu: „Út­kljá málin í eitt skipti fyrir öll“

Í aðalbardaga kvöldsins mætast Hrafn Þráinsson og Bretinn Will Bean í þriðja sinn. Hvorugum hefur tekist að vinna fyrri viðureignir þeirra og hyggjast þeir nú útkljá málin í eitt skipti fyrir öll. Þá snúa meistarar GFN 2 aftur í búrið til að verja beltin sín.

Hákon vill snúa aftur á sigurbraut

Mosfellingurinn Hákon Örn Arnórsson keppir fyrir Reykjavík MMA og hefur á skömmum tíma orðið einn þekktasti áhugamaður landsins í MMA. Hinn 22 ára Hákon á að baki sjö bardaga, fjóra sigra og þrjú töp, þar af tvo sigra með rothöggi.

Hákon hefur aldrei farið auðveldu leiðina á ferlinum og mætt sterkum andstæðingum bæði hér heima og erlendis. Á GFN 2 mætti hann Ali Albazi í titilbardaga og náði meðal annars að slá hann niður í annarri lotu, þótt sigurinn hafi að lokum fallið Albazi í skaut.

Undrabarnið úr Mjölni

Mikael Leó Aclipen verður einnig meðal keppenda. Hinn 23 ára Mikael hefur æft hjá Mjölni frá barnsaldri og er talinn einn öflugasti ungi glímumaður landsins. Hann á að baki fimm sigra og þrjú töp, meðal annars eftir viðureignir við sterka keppendur á Evrópumótum í MMA.

Mikael vann sannfærandi sigur á GFN 2 og heillaði áhorfendur bæði með frammistöðu sinni í búrinu og einlægu viðtali eftir bardagann.

Glacier Fight Night 3 fer fram í Framheimilinu við Úlfarsbraut laugardaginn 3. október. Bardagakvöldið hefst klukkan 19 og miðar fást á Moment.is.

Glacier Fight Night 3 – The Score Will Be Settled.