Fyrsta vindmyllulestin um Suður­land í nótt

Hann sagði einn spaða um 68 metra langan og á trukknum um 80 metra. Fyrsta skipið með spaða hafi komið 20. apríl og frá þeim tíma hafi fjögur skip til viðbótar komið til landsins. Í kvöld leggi af stað fimm trukkar úr Þorlákshöfn með spaðana og upp á hálendi.

„Þetta er einn þriðji hluti af vindmyllunni,“ segir Sigurgeir Björn Geirsson, yfirverkefnastjóri vindmyllugarðs Landsvirkjunar við Vaðölduver, en rætt var við hann í kvöldfréttum Sýnar.

Hann segir þrjár nætur þurfa til að flytja heila vindmyllu til Vaðölduvers. Flutningarnir fari fram sex kvöld vikunnar og það eigi að flytja alls fjórtán vindmyllur á staðinn. Flutningarnir muni því taka sjö til tíu vikur og svo aftur næsta sumar.

Alls 28 vindmyllur

Fjórtán vindmyllur verða fluttar á þessu ári og aðrar fjórtán á því næsta, samtals 28 vindmyllur. Áætlað er að Vaðölduver verði komið í fullan rekstur seinni hluta árs 2027.

Samkvæmt upplýsingum frá Landsvirkjun um flutningana er flutningsleiðin um fimm sveitarfélög: Ölfus, Árborg, Flóahrepp, Ásahrepp og Rangárþing ytra.

„Lestin leggur af stað í nótt,“ segir Sigurgeir og að lögreglan muni stýra umferð og er áætlað að flutningarnir, sem eru 130 kílómetrar, taki um fjórar klukkustundir og því ekið á aðeins um 30 til 50 kílómetra hraða. Það taki lengri tíma að fara í beygjur, hringtorg og önnur þröng svæði.

Hann segir hægt að vaka eftir þeim í nótt en aðeins verði ekið í gegn og ekkert stoppað. Hann segir búið að undirbúa flutningana með fjölda aðila og þau séu tilbúin að takast á við þessa áskorun í nótt sem sé einn stærsti liðurinn í því að koma vindorkuverinu upp. Nánari upplýsingar um flutningana er að finna hér.