Ís­lensku íþróttaugna­blikin: „Hann var búinn að flauta“

Augnablikin telja fimmtán þætti þar sem víða verður komið við sögu. Um er að ræða snarpa þætti þar sem persónur og leikendur í mörgum af stærstu augnablikum í íþróttasögu rifja þau upp og ræða áhrif þeirra.

Fyrstu tveir þættirnir fara í loftið klukkan 19:00 á Sýn Sport Ísland á morgun, mánudag. Þættirnir verða einnig aðgengilegir í sitt hvoru lagi á efnisveitu Sýnar Sports.

Framvegis verða þættirnir svo sýndir næstu sex sunnudagskvöld.

Framleiðendur þáttanna eru þeir Garðar Örn Arnarson, Sigurður Már Davíðsson og Ingvi Þór Sæmundsson.

Fyrstu tveir þættirnir nefnast „Draugamarkið í Eyjum“ og „Stjarna verður til.“

Í fyrri þættinum er fjallað um mark sem var dæmt af Tómasi Inga Tómassyni í úrslitaleik ÍBV og ÍA um Íslandsmeistaratitilinn í fótbolta karla 2001. Eyjamenn urðu ekki Íslandsmeistarar og dómurinn þótti mjög umdeildur.

Í seinni þættinum er kastljósinu beint að sigurmarki Lovísu Thompson, þá fimmtán ára, í fjórða leik Stjörnunnar og Gróttu í einvíginu um Íslandsmeistaratitilinn í handbolta kvenna 2015. Markið tryggði Gróttu sinn fyrsta Íslandsmeistaratitil í sögunni.

Í spilaranum hér fyrir ofan má sjá brot úr Draugamarkinu í Eyjum.