Deilur Bríetar og Pálma smitast yfir á síðu Zöru Lars­son

Eftir að hafa horfið í nokkur ár er Zara Larsson snúin aftur á vinsældarlista með lagið „Midnight Sun“ af samnefndri plötu og hefur hún fylgt henni eftir með tónleikaferðalagi um heiminn. 

Á föstudaginn birti hún færslu á Instagram af litríkum þúsaldarskotnum farða sínum af ferðalaginu og undir myndaröðinni ómaði lagið „Draumalandið“ eftir Bríeti af plötunni Kveðja, Bríet.

„Gella! Þú ert að nota mitt lag! Litla Bríet er að öskra núna,“ skrifaði Bríet í athugasemd við myndina og uppskar fjölda læka frá fólki á borð við Áslaugu Örnu, Magnúsi Jóhanni, Gugusar og Zöru Larsson sjálfri.

Ekki nóg með það heldur svaraði Zara henni líka: „Ég er búin að vera að hlusta svo mikið á þig!!!!! Mikill aðdáandi!!!“ Bríet deildi mynd af svari Zöru í hringrás sinni í morgun og öðru skjáskoti af því að Zara væri byrjuð að fylgja henni á gramminu.

Annað sem vekur athygli á færslunni er að pródúsentinn Ásgeir Orri Ásgeirsson, sem er þekktastur sem einn þriggja meðlima StopWaitGo, skrifar ummæli við færslu Zöru. 

„Þetta lag er skrifað og framleitt af @palmiragnar ✍🏻💪🏼 Þú ættir að heyra í honum! 🎉,“skrifar hann og taggar bróður sinn, Pálma Ragnar Ásgeirsson, sem starfaði náið með Bríeti um árabil og hefur jafnframt unnið mikið með Friðriki Dór, Glowie og Diljá Pétursdóttir.

Hársnyrtirinn Íris Lóa Eskin, sem hefur séð um hárið á Bríeti frá því hún byrjaði á bransanum, sá sér skylt að svara Ásgeiri og leiðrétta hann örlítið: „@asgeirorri, þú meinar skrifað af Bríeti og framleitt af honum ❤️❤️❤️❤️❤️❤️❤️“

Bríet og Pálmi unnu náið saman frá 2018 til 2022 og gáfu út á því tímabili hátt í tuttugu lög sem þau sömdu í sameiningu. Þar á meðal eru öll lögin nema eitt af plötunni Kveðja, Bríet, öll lögin af stuttskífunni 22.03.99 og nokkrar smáskífur. Þar eru Bríet og Pálmi bæði skráð sem textahöfundar og Pálmi skráður sem framleiðandi.

Heimildir Vísis herma að þau hafi nú stefnt hvort öðru fyrir dómstólum vegna ósættis um höfundarrétt áðurnefndra laga. Málið hefur verið tekið fyrir þrisvar í Héraðsdómi Reykjavíkur og verður næst tekið fyrir miðvikudaginn 11. mars. Ekki liggur fyrir hvenær aðalmeðferð málsins hefst.