Úlfarnir lítil fyrir­staða fyrir Rauðu djöflana

Manchester United er komið upp í 6. sæti ensku úrvalsdeildarinnar eftir öruggan sigur á botnliði Wolves í kvöld, 1-4.

United var mun sterkari aðilinn í leiknum en staðan í hálfleik var jöfn, 1-1, eftir að Jean-Ricner Bellagarde jafnaði í uppbótartíma fyrri hálfleiks. 

Bruno Fernandes hafði komið gestunum yfir á 25. mínútu eftir slæm mistök í vörn heimamanna.

United byrjaði seinni hálfleikinn af miklum krafti og á 51. mínútu náði liðið forystunni á ný þegar Bryan Mbeumo skoraði af stuttu færi eftir sendingu Diogos Dalot.

Á 62. mínútu átti Fernandes góða sendingu inn fyrir vörn Úlfana á Mason Mount sem skoraði sitt annað mark í síðustu þremur leikjum.

Átta mínútum fyrir leikslok gerði Fernandes svo annað mark sitt og fjórða mark United úr vítaspyrnu sem dæmd var á Yerson Mosquera fyrir að handleika boltann inni í teig.

United er nú með 25 stig í 6. sæti deildarinnar en Wolves er rótfast við botninn með sín tvö stig. Úlfarnir eru þrettán stigum frá öruggu sæti og hafa aðeins skorað átta mörk í fimmtán leikjum.