Fé­lagið hans Birkis Bjarna gjald­þrota

Brescia gat ekki staðið við sitt við lok leiktíðar og hefur lýst sig gjaldþrota. Það þýðir um leið að félagið, sem var í B-deildinni, missir sæti sitt í ítölsku deildarkeppninni. Aftonbladet segir frá.

Birkir Bjarnason var með samning við félagið út júní en hann kom til Brescia í ágúst 2023 og hafði einnig spilað með liðinu í byrjun árs 2020.

Birkir spilaði 27 deildarleiki með Brescia á nýloknu tímabili og skoraði í þeim fjögur mörk.

Margir frægir leikmenn hafa líka spilað með Brescia, leikmenn eins og Roberto Baggio, Andrea Pirlo, Alessandro Altobelli, Luca Toni og Pep Guardiola.

Brescia skuldar þrjár milljónir evra, 434 milljónir króna, og þurfti að borga skuldina í síðasta lagi á föstudaginn.

Eigandinn, hinn 68 ára gamli Massimo Cellino, neitar að greiða skuldir félagsins.

Það fór því svo að félagið átti ekki fyrir skuldum sínum og var lýst gjaldþrota.

Cellino, átti einu sinni Leeds United, en hann hefur verið eignandi Brescia frá árinu 2017.

Stuðningsmenn Brescia eru honum mjög reiðir og söfnuðust saman fyrir utan höfuðstöðvar félagsins til að mótmæla Cellino.