Frum­varp um far­þega­lista sam­þykkt

Frá þessu greinir Þorbjörg Sigríður Gunnlaugsdóttir dómsmálaráðherra á Facebook. Á vef Alþingis segir að 55 hafi greitt atkvæði með frumvarpinu og enginn gegn því. Átta hafi verið fjarverandi. 

Lögin tryggja að íslensk yfirvöld fái nú afhentar upplýsingar um alla farþega sem koma til landsins.  Dómsmálaráðherra segir lögin mikilvægan lið í að taka fastar á skipulagðri brotastarfsemi. 

„Fjölgun hryðjuverka og alvarlegra glæpa þvert á landamæri eykur enn frekar mikilvægi greininga á farþegaupplýsingum við löggæslueftirlit á landamærunum,“ segir í færslu Þorbjargar. 

Hún segir að farþegaupplýsingarnar verði nýttar af lögreglu og af tollyfirvöldum og öðrum yfirvöldum á landamærum. Við áhættugreiningu á upplýsingunum geti lögregla og tollyfirvöld beint sjónum sérstaklega að þeim farþegum sem hætta er talin stafa af.

Áhættugreining farþegaupplýsinga auki öryggi flugfarþega en ekki síst almennra borgara í landinu.

Greining farþegaupplýsinga efli þannig getu löggæsluyfirvalda til að koma í veg fyrir og koma upp um afbrot af hvers kyns tagi, þar á meðal hryðjuverk og skipulagða brotastarfsemi.