Tókst ekki verja titilinn í vítaspyrnukeppni

Mikil úrslitaleikjasaga

Liðin hafa leikið úrslitaleiki í sænska bikarnum til skiptis frá því 2018, BK Häcken hefur komist í úrslitaleikinn annað hvert ár, líkt og Malmö sem braut hefðina núna í ár og komst í úrslitaleikinn aftur eftir að hafa orðið bikarmeistari í fyrra.

Liðin mættust því innbyrðis í úrslitaleik. Malmö vann dráttinn og var á heimavelli, í kjörstöðu til að hefna fyrir tapið sem BK Häcken afhenti þeim þegar liðin mættust síðast innbyrðis í úrslitaleik árið 2016.

Stuðningsmenn skáru net

Úrslitaleikurinn hófst reyndar átta mínútum of seint og hann þurfti að stöðva eftir minna en mínútu, vegna þess að stuðningsmenn Malmö skáru gat á öryggisnetið sem var sett fyrir stúkuna. Stuðningsmennirnir höfðu verið með vesen vegna netsins fyrir leik og reynt að færa það, sem frestaði upphafsflautinu.

Pontus Jansson, meiddur leikmaður Malmö, fór til stuðningsmannanna sem skáru á netið og bað þá um að hætta svo leikurinn gæti haldið áfram. Leikurinn hófst því loks, almennilega, rúmum hálftíma á eftir áætlun.

Markalaust jafntefli

Leikurinn sjálfur var langt því að vera jafn fjörugur og allt benti til fyrirfram. Afskaplega fá færi litu dagsins ljós. Malmö var meira með boltann, enda vantaði töluvert marga menn vegna meiðsla í liði BK Häcken, en heimamenn sköpuðu sér lítið.

Daníel Tristan Guðjohnsen, framherja Malmö, var skipt inn á 81. mínútu til að hrista upp í hlutunum en skiptingin hafði ekki tilætluð áhrif.

Slagsmál fyrir framlengingu

Leiknum lauk með markalausu jafntefli og haldið var í framlengingu. Áður en hún hófst urðu slagsmál á hliðarlínunni, þegar Silas Andersen, meiddur leikmaður BK Häcken, fékk dós frá stuðningsmönnum í höfuðið. Silas ætlaði að svara fyrir sig og óð í átt að stúkunni en var stöðvaður af áðurnefndum Pontus Jansson. Þeir tveir rifust um dágóða stund en var síðan vísað af öryggisgæslu inn í búningsherbergi.

Arnór Sigurðsson kom inn af varamannabekk Malmö í seinni hálfleik framlengingar, sem dugði heldur ekki til að skilja liðin að og því var haldið í vítaspyrnukeppni.

Vítaspyrnukeppni

Stressið og þreytan var voru farin að segja til sín eftir langan leik og bæði lið klikkuðu á fyrsta vítaspyrnunni. BK Häcken skoraði hins vegar úr næstu fjórum spyrnum, en Malmö aðeins úr tveimur. Hvorki Arnór né Daníel tóku vítaspyrnu.

BK Häcken stóð því uppi sem sænskur bikarmeistari í fjórða sinn í sögu félagsins, allir titlarnir á síðustu tíu árum.