Blaða­manna­fundur Þor­steins: Erum ein af topp átta þjóðum í Evrópu

Þorsteinn sagðist vera ánægðastur með sigurinn í dag þegar hann var spurður að því hvað hann væri ánægðastur með. Hann sagði að það væru ekki öll lið sem næðu að vinna Þýskaland 3-0 og kvaðst hann mjög stoltur af liðinu sínu. Hann gat ekki lýst tilfinningunni þegar Sveindís Jane Jónsdóttir skoraði þriðja markið en hann sagði að hún hefði verið mjög góð.

Hann var spurður að því hver hugmyndin hafði verið með því að breyta liðinu byrjunarliðinu eins og hann gerði fyrir leik.

„Í raun og veru var hugmyndin mjög einföld. Ég var að hugsa um að við ættum tvo leiki og fjóra leikmenn á gulu spjaldi og þar á meðal Guðrúni og Hlín. Ég var að hugsa um báða bakverðina mína sem voru báðar á spjaldi. Ég myndi þá leysa það með því að Natasha myndi spila báða leikina í vinstri bakverði ef önnur hvor, Guðrún eða Guðný myndu fara í bann í þessum leik. Ég hugsaði það síðan að ég þyrfti á Hlín að halda í seinni leiknum. Hún er búin að vera sjóðandi í sænsku deildinni og ég taldi það að hún yrði mikilvægur hlekkur í seinni leiknum og hún var á gulu spjaldi líka. Ég var með varnaglann á því að við værum að fara í úrslitaleik á móti Póllandi.“

„Natasha var alveg frábær og gerði allt sem hún átti að gera. Hún var alltaf partur af hópnum þegar hún meiðist en kemur aftur inn í þetta núna þegar hún er orðin heil og stóð sig frábærlega. Ég er í raun og veru stoltur af öllu liðinu fyrir vinnuframlagið þeirra og hvað þær lögðu í þetta.“

Stærsti sigurinn

Þorsteinn var spurður að því hvort þetta hafi verið stærsti sigurinn á hans ferli.

„Þetta er náttúrlega stærsti sigurinn. Ég veit ekki hverjir hafa unnið Þýskaland 3-0 og bara frábært að vinna leikinn. Við vinnum leikinn og komum okkur beint á EM og erum ein af átta þjóðum sem koma sér beint á EM. Það er afrek, risa afrek fyrir kvenna knattspyrnuna, því hin leiðin er erfið. Við hefðum getað lent á móti Englandi eða Svíþjóð eftir því hvernig riðillinn hjá þeim hefði þróast. Það var ekki það sem við vildum og ætluðum okkur þessa leið.“

„Við vissum það hinsvegar að úrslitaleikirnir yrðu á móti Austurríki og að við yrðum að vinna Pólland úti. Það var þannig séð að ég lagði þetta upp þannig að við myndum vinna Þýskaland en vorum með varnaglann að geta unnið Þýskaland.

Stelpurnar eiga skilið þennan áhorfendafjölda

Þorsteinn taldi að aðstæðurnar hefðu verið draumaaðstæður og að Þjóðverjarnir hefðu átt í talsverðu brasi með vindinn. Hann sneri tali sínu síðan að áhorfendafjöldanum en 5243 lögðu leið sína á völlinn í dag og studdu liðið allan tímann.

„Það er frábært að hafa alla þessa stuðningsmenn. Svona á þetta að vera, þessi fjöldi áhorfenda á að vera á þessum leikjum. Við erum eitt af topp átta liðunum í Evrópu og það er bara afrek í fótbolta. Það kemur náttúrlega meiri stemmning með meiri fjölda og meiri læti.“

Þorsteinn var spurður að því hvort hann væri að gera sér grein fyrir því að þetta gæti verið stærsti sigurinn í sögu landsliðsins og að hann væri þjálfarinn. Hann kvaðst vera stoltur að því en sagði að hann myndi kannski meira njóta þess í ellinni. Hann sagði einnig að það væri líklegt að hann myndi horfa til baka og vera stoltur af þessum leik og stoltur af stelpunum.

Hvað hafði breyst á milli leikjanna gegn Þýskalandi?

„Það er bara þróun í liðinu. Leikurinn gegn Þýskalandi úti var fínn fyrsta hálftímann og við gerðum góða hluti þar og vorum að valda þeim vandræðum en svo herjuðu þær á okkur og gerðu okkur erfitt fyrir. Við verðum bara að halda áfram að gera það sem við gerum og hafa trú á okkur inn á vellinum og njóta þess að spila.“

Hjálpar að eiga leikmenn í bestu deildunum

Þorsteinn taldi það náttúrlega hjálpa landsliðinu að vera með stelpur í sterkustu deildunum í Evrópu.

„Það er náttúrlega tröppugangur í þessu. Leikmenn taka skref á sínum ferli og það hjálpar okkur alltaf þegar leikmenn eru að taka skref upp á við. Það kemur líka inn í landsliðið þegar leikmenn eru að taka skref fram á við og fara í betri deildir þá hjálpar það okkur alltaf.

Verkefni næstu sólarhringa

Í lokin var Þorsteinn spurður að því hvernig hann ætlaði að koma stelpunum niður á jörðina fyrir næsta verkefni sem verður á þriðjudaginn gegn Póllandi og hvort það væri ekki erfitt að byrja ekki að hugsa um Sviss á næsta ári.

„Það er verkefni næstu sólarhringa að koma þeim niður á jörðina. Við verðum hérna heima á morgun og förum ekki út fyrr en á sunnudaginn. Það er æfing og fundur í fyrramálið en svo fá þær gott frí og þurfa ekki að mæta á hótelið fyrr en um kvöldið. Þær geta því að njóta tíma með fjölskyldunni og njóta þess að vera til. Ég hef engar áhyggjur af því að leikmenn komi sér ekki niður á jörðina og við þurfum á því að halda að koma þeim niður á jörðina. Það má líka nota þetta því þú hefur blússandi sjálfstraust eftir þetta.“

„Þetta er svona beggja blands hvernig þú ætlar að nálgast þetta. Ég er svo að fara að hitta Davíð Snorra sem horfði á Austurríki-Pólland. Ég fæ mér örugglega eitthvað gott með því í kvöld. Fundur í fyrramálið og svo förum við yfir það hvernig við tökum á Póllandi á þriðjudaginn.“

„Það er örugglega erfitt já að fara ekki strax að hugsa um Sviss á næsta ári. Það er frábær tilhugsun að vera að fara til Sviss og vera gera sér grein fyrir því að við höfum náð markmiðum okkar þegar dregið var í riðilinn. Það er stórkostleg tilfinning að vera kominn á mótið og að það er ár í þetta. Við fáum ágætis undirbúning, æfingarleiki í haust og svo Þjóðardeildina næsta vor. Fáum fullt af leikjum og þetta er mjög góð tilhugsun.“