Liðið sem getur ekki unnið vítaspyrnukeppni

Arsenal skoraði úr öllum fjórum spyrnum sínum í gær og vörslur Davids Raya frá Brasilíumönnunum Wendell og Galeno tryggði Arsenal 4-2 sigur og sæti í næstu umferð.

Um er að ræða áttundu vítaspyrnukeppnina í röð sem Porto tapar, árangur sem teygir sig aftur um áratug.

Það hefur því ekki reynst Porto heillavænlegt að fara í vítaspyrnukeppni undanfarin ár og þessi árangur eltir liðið þrátt fyrir að fimm ár séu frá þeirri síðustu sem liðið tók þátt í.

Liðið vann báðar bikarkeppnirnar í Portúgal á síðasta ári, og unnu þar leiki sína í venjulegum leiktíma eða eftir framlengingu.

Arsenal batt enda á erfitt gengi sitt í 16-liða úrslitum Meistaradeildarinnar í gær en komst í fyrsta sinn í 8-liða úrslit í 14 ár. Liðið hafði tapað sex einvígjum í röð á þessu stigi keppninnar fyrir sigurinn í gær.

16-liða úrslit Meistaradeildarinnar klárast í kvöld. Inter sækir Atlético Madrid heim með 1-0 forystu eftir sigur á San Siro í fyrri leiknum.

Borussia Dortmund tekur á móti PSV Eindhoven en liðin gerðu 1-1 jafntefli í Hollandi.

Báðir leikir byrja klukkan 20:00. Leikur Inter og Atlético verður í beinni á Vodafone Sport en Dortmund og PSV á Stöð 2 Sport 2.