Heimaleikurinn með enn önnur verð­launin í Glasgow

Heimaleikurinn, í leikstjórn Smára Gunnarssonar og Loga Sigursveinssonar, hlaut áhorfendaverðlaun Glasgow Film Festival í gærkvöldi. Um er að ræða aðalverðlaun hátíðarinnar.

Afrekið hefur vakið mikla athygli og er meðal annars greint frá því af BBC. Heimaleikurinn er heimildarmynd sem segir frá fljótfærnri tilraun Kára Viðarssonar til að uppfylla draum föður síns; að safna í lið heimamanna til að spila langþráðan vígsluleik á fótboltavelli sem faðirinn lét byggja á Hellissandi 25 árum áður.

Heimaleikurinn var tilnefnd til áhorfendaverðlauna í Glasgow ásamt sjö öðrum myndum á stjörnum prýddri hátíðinni. Myndin var eina heimildarmyndin í flokki tilnefndra en meðal þeirra kvikmynda sem einnig voru tilnefndar var nýjasta mynd Viggo Mortensen The Dead don't Hurt.

Hæsta einkunn í sögu hátíðarinnar

Leikstjórarnir Smári Gunnarsson og Logi Sigursveinsson gengu rauða dregilinn og sátu fyrir svörum eftir sýningarnar. Stjörnur myndarinnar úr liði Reynis á Hellissandi fylgdu myndinni einnig eftir, skoskum kvikmyndagestum til mikillar gleði.

Heimaleikurinn var sýnd fyrir fullu húsi tvisvar í Glasgow og skipuleggjendur hátíðarinnar tilkynntu að áhorfendur hefðu samanlagt gefið myndinni 4.8 af 5 í einkunn, hæstu einkunn sem þau hafa séð í tuttugu ára sögu hátíðarinnar sem er ein sú stærsta á Bretlandseyjum.

Myndin hefur notið mikilla vinsælda á kvikmyndahátíðum víða en um er að ræða þriðju áhorfendaverðlaunin sem myndin hlýtur. Síðast hlaut hún verðlaun á stærstu kvikmyndahátíð Norðurlanda í september síðastliðnum. áður hafði hún unnið áhorfendaverðlaun Skjaldborgarhátíðarinnar. Þá hefur hún unnið til dómnefndarverðlauna á alþjóðlegu heimildarhátíðinni í Búdapest.