Gerir hand­stöðu­æfingar komin 27 vikur á leið

Anníe verður ekki með á þessu CrossFit tímabili en hún heldur sér samt sem áður áfram í góðri æfingu.

Ekki nóg með að Anníe geri hinar ýmsu æfingar í lyftingasalnum eins og að hjóla og lyfta þá er hún enn að gera handstöðuæfingar komin meira en sex mánuði á leið.

Anníe setti inn myndband af æfingum sem má sjá hér fyrir neðan. Þar vakti sérstaka athygli að hún er að gera handstöðuæfingar komin 27 vikur á leið.

„Ég giska á það að öllum ófrískum konum líði eins og þær sé léttar og liprar en grínlaust þá er ég svo ánægð með að líða svona vel þegar ég er að hreyfa mig. Ég trúi því að þú eigir að hreyfa þig þegar þú ert ófrísk á meðan þér líður vel líkamlega,“ skrifaði Anníe.

Hún segir að sér og bumbubúanum líði mjög vel þegar hún sé að æfa.