„Hún á ekki að vera ráð­herra“

Þing kemur saman á morgun, mánudag, eftir jólafrí. Inga Sæland, formaður flokks fólksins hefur gefið út að hún hyggist þá leggja fram vantrausttillögu á hendur Svandísi Svavarsdóttur matvælaráðherra, vegna álits umboðsmanns Alþingis sem kom út í desember. Í álitinu var Svandís sögð hafa brotið lög þegar hún stöðvaði hvalveiðar tímabundið síðasta sumar.

Í samtali við fréttastofu segir Inga að kominn sé tími til að Svandís axli ábyrgð.

„Ég er bara þannig að mér finnst að lögin eigi að gilda yfir okkur öll, sama hvort við erum ráðherrar eða venjulegur almenningur úti á götu. Við fáum ekkert að komast upp með það, það eru alltaf afleiðingar.“

Hún á að axla ábyrgð finnst mér skilyrðislaust. Hún braut lög og hefur ekki sýnt að hún hafi neinn áhuga á því að stöðva þetta dýraníð sem hvalveiðar raunverulega eru.

Inga tekur fram að væntanleg vantraustillaga snúist ekki á neinn hátt um skoðun hennar sjálfrar á hvalveiðum.

„Hún snýst um hreint og klárt lögbrot ráðherra í starfi. Að ganga gegn bæði stjórnarskrá og stjórnsýslulögum og helstu réttarreglum er ámælisvert. Það er kominn tími til að höggva á þennan hnút að ráðherrar taki aldrei ábyrgð á einu né neinu.“

Á ekki von á að tillagan verði felld

Það væri að mati Ingu ekki nóg ef Svnadís hefði stólaskipti við annan ráðherra í ríkisstjórninni, líkt og Bjarni Benediktsson gerði þegar álit umboðsmanns varðandi aðkomu hans að Íslandsbankamálinu kom út í október á síðasta ári.

Hún á ekki að vera ráðherra

Ljóst þykir að stjórnarandstöðuþingmenn muni margir styðja vantraustillöguna, en óljóst er um stjórnarþingmenn. 

„Allir sem ég hef talað við og heyrt í munu styðja vantraustillöguna. Við gerum okkur öll grein fyrir því að þetta er lögbrot,“ segir Inga.

„Það væri vissulega erfitt fyrir nokkurn sem vill láta taka sig alvarlega og tilheyrir löggjafanum, að ætla að verja svona lögbrot. Það lítur ekki vel út.“

Stjórnmálafræðingar hafa sagt að erfitt sé fyrir þingmenn ríkisstjórnarinnar að greiða atkvæði með vantrausstillögunni, þar sem þeir væru þá í sjálfu sér að sprengja ríkisstjórnina. 

„Ég býst við að þau komi með einhverjar yfirlýsingar að staðan sé þannig í þjóðarbúinu að þau verði að standa saman og geti ekki verið að hlaupa frá borði út af þessar vantrausttillögu. Það verða einhverjir hjá Sjálfstæðisflokknum og kannski einhverjir Framsóknarmenn sem fá að greiða með tillögunni eða sitja hjá, eitthvað sprikl. En ég býst við að þau muni ekki fella hana,“ segir Inga.

Gefur lítið fyrir orð Lilju um að tíðinda sé að vænta á morgun

Þá segir Inga að stór vika sé framundan og mörg krefjandi verkefni bíði þingmanna. 

„Sérstaklega vil ég að við tökum af skarið og tökum utan um fjölskyldur og fólkið í Grindavík. Það er löngu orðið tímabært að fólkið fái að vita hver þeirra framtíð er.“

Lilja Alfreðsdóttir sagði á Sprengisandi í dag að tíðinda væri að vænta á morgun. Inga gaf ekki mikið fyrir þau ummæli.

„Ég var á fjárlaganefndafundi fyrir helgi, á fimmtudaginn, og ég gat ekki heyrt að það væri neitt afgerandi. Lilja og formaðurinn, Sigurður Ingi, tala eiginlega algjörlega í kross. Hann var ekki á þeirri línu að við myndum kaupa eignir Grindvíkinga á meðan hún segir að það sé það sem við ættum að gera.“

Sjálf segist Inga algjörlega sammála Lilju.

„Við eigum að gefa fólkinu hundrað prósent kost á því að kaupa eignir þeirra svo þau geti farið að koma sér fyrir á nýjum stað.“

Sammála Bjarna varðandi mótmæli Palestínumanna

Mótmæli hafa verið boðuð við þingsetningu á Austurvelli á morgun. Mótmæli Palestínumanna sem hafst hafa við í tjöldum á Austurvelli undanfarnar þrjár vikur hafa verið til umræðu, ekki síst eftir færslu Bjarna Benediktssonar, utanríkisráðherra, þar sem hann kallaði tjaldbúðirnar hörmung. 

Inga segist hjartanlega sammála Bjarna. 

„Við vitum að Austurvöllur er í okkar huga svolítið sérstakur. Hann er miðjan okkar við hliðina á þinghúsinu. Það er algjörlega sjálfsagt að mótmæla á Austurvelli, hann er þessi vettvangur þar sem er viðurkennt að mótmæla. En að vera með tjaldbúðir, hvað þá við innganginn í Alþingishúsið, það finnst mér algjörlega og gjörsamlega fyrir neðan allar hellur.“

Í færslu á Facebook í gær gagnrýndi Inga ummæli Einars Þorssteinssonar varðandi tjaldbúðirnar og sagði nýja borgarstjórann „grípa um rassgatið þegar skíturinn er kominn í buxurnar“

„Við vitum að Austurvöllur er í okkar huga svolítið sérstakur. Hann er miðjan okkar við hliðina á þinghúsinu. Það er algjörlega sjálfsagt að mótmæla á Austurvelli, hann er þessi vettvangur þar sem er viðurkennt að mótmæla. En að vera með tjaldbúðir, hvað þá við innganginn í Alþingishúsið, það finnst mér algjörlega og gjörsamlega fyrir neðan allar hellur. 

Þó við leituðum logandi ljósi í einhverju önnur þjóðríki, þá væri hvergi nokkur staðar þannig að Palestínu-arabar væru með tjaldbúðir við alþingi, ekki einusinni í Palestínu

 „Þessi þróun er ekki góð. Nú eigum við endalaust eftir að sjá hina og þessa hópa setja upp tjöld á Austurvelli. Mér finnst þetta galið og það þarf algjörlega að taka á þessu,“ segir Inga Sæland.