Reyndu að plata les­endur með fréttum um Mbappe

Þær eru ófáar fréttirnar sem hafa verið skrifaðar um möguleg félagaskipti Kylian Mbappe. Flestar hafa þær verið á þá leið að hann væri á leið til Real Madrid og er almennt talið að þegar og ef Mbappe yfirgefur PSG þá verði Madrid hans næsti áfangastaður.

Barcelona hefur að minnsta kosti sjaldan verið nefnt í þessu samhengi. Þar til í morgun. Þá birtist frétt hjá spænska miðlinum Mundo Deportivo þar sem greint var frá því að forsetar Real Madrid og Barcelona hefðu náð samkomulagi um að Barcelona fengi að semja við Mbappe í friði og ró. 

Sagt var að þeir Florentino Perez og Joan Laporta forsetar félaganna hefðu hist á leynilegum fundi þar sem Perez hefði sagst ætla að leyfa Barcelona að semja við Mbappe. Ástæðan fyrir þessari góðmennsku Perez væri að Laporta hafi stutt vel við Perez og Real Madrid í umræðunni um Ofurdeildina í knattspyrnu.

Sagt var að Mbappe myndi flytja í íbúðina sem Ousmane Dembele bjó í og í þokkabót myndu tölvuleikir Dembele fylgja með en Frakkinn er mikill leikjaspilari. Samkomulagið fól einnig í sér að Mbappe mætti ekki skjóta með hægri fæti í leikjum gegn Real.

Líklegast áttuðu flestir lesendur sig á því að eitthvað skrýtið væri á seyði. Sú var líka raunin því 28. desember er nefnilega fyrir Spánverjum það sem 1. apríl er hér á landi. Fréttin var því uppspuni frá upphafi til enda.

Þetta var ekki eina platfréttin í spænska boltanum í dag. Real Betis tilkynnti að goðsögnin Joaquin ætlaði að taka fram skóna á nýjan leik. Það var því miður einnig plat.