Þingmenn sneru aftur til vinnu í gær eftir langt helgarfrí og er búist við því að þeir muni greiða atkvæði um frumvörp sem snúa að því að fjármagna tiltekna hluta ríkisins. AP fréttaveitan segir þó óljóst hvort Kevin McCarthy, forseti fulltrúadeildarinnar, hafi yfir höfuð nægan stuðning innan eigin þingflokks til að koma frumvörpunum í gegnum þingið.
Á sama tíma eru þingmenn í öldungadeildinni að semja frumvarp sem öldungadeildarþingmenn beggja flokka eru tilbúnir til að samþykkja. Það frumvarp myndi gefa þinginu lengri tíma til að finna langtíma lausn. Frumvarp öldungadeildarinnar myndi þó líklega ekki komast í gegnum fulltrúadeildina, án stuðnings frá McCarthy en uppreisnarþingmenn hans hafa sagt að slíkt myndi kosta hann embættið.
Í frétt Washington Post segir að McCarthy standi líklega frammi fyrir tveimur afarkostum fyrir vikulok. Annar feli í sér að samþykkja að leggja frumvarp öldungadeildarinnar fyrir fulltrúadeildina, þar sem Demókratar og hófsamari Repúblikanar myndu mögulega samþykkja það, og líklega tapa embætti sem þingforseti.
Hinn kosturinn væri að taka afstöðu með uppreisnarmönnunum, neita að boða atkvæðagreiðslu um frumvarp öldungadeildarinnar og stöðva rekstur ríkisins.
Stendur sífellt frammi fyrir vantrausti
Repúblikanar eru með mjög nauman meirihluta í fulltrúadeildinni og McCarthy hefur átt í miklum vandræðum með hóp fjar-hægri meðlima flokksins. Hann þurfti að verða við mörgum kröfum þeirra til að fá embætti þingforseta eftir ítrekaðar atkvæðagreiðslur og samningaviðræður.
Missi hann einungis fjögur atkvæði úr eigin flokki, kemur hann ekki frumvörpum í gengum þingið.
Síðan þá hafa þessir þingmenn ítrekað gefið í skyn að þeir gætu velt honum úr sessi, hvenær sem er. Ein af þeim kröfum sem McCarthy varð við til að verða þingforseti var að nú þarf eingöngu einn þingmaður að lýsa yfir vantrausti gegn honum til að atkvæðagreiðsla um vantraust fari fram.
McCarthy hefur sagt að hann vilji tryggja rekstur ríkisins í mánuð og nota þann tíma til að finna lausn til lengri tíma. McCarthy og Joe Biden, forseti, gerðu samkomulag í vor þegar það stefndi í að Bandaríkin færu í greiðsluþrot í fyrsta sinn. Það samkomulag fól í sér að ríkisútgjöld til stofnanna, annarra en herafla Bandaríkjanna, yrðu ekkert aukin á næsta ári og aðeins aukin um eitt prósent árið 2025.
Áðurnefndir uppreisnarmenn vilja þvinga McCarthy til að svíkja það samkomulag og krefjast frekari niðurskurðar.
McCarthy lét nýverið eftir þessum þingmönnum og sagði að Repúblikanar ætluðu að hefja formlega rannsókn á Joe Biden, forseta, og því hvort hann hefði brotið af sér í embætti. Því lýsti hann yfir án þess að halda atkvæðagreiðslu á þinginu um hvort tilefni væri til þess, eins og hann hafði áður sagt að rétt væri að gera. Óljóst er hvort hann hefði yfir höfuð nægilegan stuðning innan eigin þingflokks til að slík tillaga yrði samþykkt.
Öldungadeildarþingmenn semja frumvarp
Í frétt New York Times segir að umfangsmiklar viðræður hafi átt sér stað í öldungadeildinni í gær. Þingmenn hafi þó ekki verið sammála um hvort hafa ætti 25 milljarða dala aðstoðarpakka til Úkraínu í frumvarpinu. Bæði Repúblikanar og Demókratar í öldungadeildinni vilja hafa ákvæðið en óttast að það gæti mætt mikilli mótspyrnu meðal þingmanna Repúblikanaflokksins í fulltrúadeildinni.
Mitch McConnell, leiðtogi Repúblikana í öldungadeildinni, hefur verið ötull stuðningsmaður Úkraínu en hann og aðrir öldungadeildarþingmenn flokksins vilja ekki auka á vandræði McCarthy.
Donald Trump, fyrrverandi forseti Bandaríkjanna og væntanlegur forsetaframbjóðandi Repúblikanaflokksins í kosningunum á næsta ári, hefur sagt að Repúblikanar þurfi að stöðva rekstur ríkisins. Hann segir Repúblikana ekki þurfa að hafa áhyggjur af því að þeim verði kennt um, því Joe Biden, forseti, fái sökina.
Þetta skrifaði Trump í svokölluðum sannleik á samfélagsmiðli hans, Truth Social, í gær. Í færslunni kallaði hann Biden spilltan og McConnell aumasta og veikasta leiðtoga í sögu öldungadeildarinnar og kallaði eftir nýjum leiðtoga.
Hann hélt því einnig fram að Marxistar, fasistar og þrjótar væru að rústa Bandaríkjunum með kerfisbundnum hætti.
