Íslenski boltinn

„Fékk þau fyrirmæli að setja boltann út í teiginn“

Ingvi Þór Sæmundsson skrifar
Mark Andreu Mistar Pálsdóttur hleypti miklu lífi í leik Breiðabliks og Stjörnunnar.
Mark Andreu Mistar Pálsdóttur hleypti miklu lífi í leik Breiðabliks og Stjörnunnar. vísir/vilhelm

Andrea Mist Pálsdóttir, leikmaður Stjörnunnar, segist hafa óhlýðnast fyrirmælum þegar hún skoraði mark liðsins í jafnteflinu við Breiðablik, 1-1, í Bestu deild kvenna í kvöld. Andrea skoraði beint úr hornspyrnu á 60. mínútu og kom Garðbæingum yfir.

„Ég er ekki sátt. Mér finnst að við hefðum átt að taka öll þrjú stigin. Mér fannst við vera með yfirhöndina í leiknum og hefðum átt að setja 1-2 mörk hérna í lokin,“ sagði Andrea í samtali við Vísi eftir leikinn.

En hvað var Andrea ánægð með í leik Stjörnunnar í kvöld?

„Varnarleikurinn var til fyrirmyndar og hefur verið það allt tímabilið. En við erum svolítið í basli á síðasta þriðjungnum, að nýta færin okkar. Mér fannst við spila frábæra vörn í dag en það vantaði smá upp á síðasta þriðjungnum,“ sagði Andrea.

En þegar illa gengur að skora er gott að eiga sparkvissan leikmann eins og Andreu sem gerði sér lítið fyrir og skoraði beint úr hornspyrnu eftir klukkutíma.

„Ég fékk þau fyrirmæli að setja boltann út í teiginn en ég nýtti vindinn og skrúfaði hann inn. Ég segi bara að þetta hafi verið planað,“ sagði Andrea.

Stjarnan er áfram í 4. sæti deildarinnar, nú með ellefu stig, fimm stigum á eftir toppliði Vals.

„Það er stutt á milli í þessu og hver leikur er erfiður. Það hefur sýnt sig undanfarið að öll liðin geta unnið alla þannig þetta verður barátta fram í lok tímabils. En við höldum ótrauðar áfram og ætlum að komast eins ofarlega og við getum,“ sagði Andrea að endingu.




Fleiri fréttir

Sjá meira


×