Draumur að verða að veruleika

Þorgils samdi við félagið á dögunum og gerði tveggja ára samning. Liðið leikur í sænsku úrvalsdeildinni á næsta tímabili og þá sem nýliðar í deildinni.

„Ég er bara spenntur og þetta er mjög áhugavert verkefni,“ segir Þorgils en sænska félagið sýndi leikmanninum áhuga fyrir um það bil mánuði síðan.

„Það er kominn tími til að prófa eitthvað nýtt finnst mér.“

Landsliðsmaðurinn Ólafur Andrés Guðmundsson samdi einnig við liðið fyrir ekki svo löngu.

„Það verður örugglega mjög þægilegt fyrir mig að hafa hann. Ég er búinn að heyra í honum og hann er tilbúinn að hjálpa mér með allt sem ég þarf.“

Þorgils er 25 ára línumaður sem hefur spilað í hjarta varnarinnar hjá Val síðustu ár. Hann lék vel með liðinu í riðlakeppni Evrópudeildarinnar á tímabilinu en Valsmenn komust í 16-liða úrslitin í keppninni.

„Þetta var stórt svið sem við fengum að spreyta okkur á og þjálfarinn sagðist hafa séð mig á móti Ystad. Ég held algjörlega að þetta hafi komið mörgum leikmönnum okkar á kortið. Það hefur alltaf verið stefnan að gerast atvinnumaður og ég ætla bara að gera mitt besta og sjá til hvert það leiðir mann.“

Þorgils er í sambandi með handboltakonunni Lovísu Thompson en hún mun vera hér á landi næsta tímabilið. Lovísa var sjálf atvinnumaður í handbolta í Noregi í vetur og kom aftur til Íslands í febrúar á þessu ári.

„Það stefnir allt í það að hún komi ekki með mér út. Hún er að fara í aðgerð og þarf kannski aðeins að vinna í því hérna heima. Við þekkjum alveg að vera frá hvort öðru en það var samt líka fínt að fá hana heim þegar hún kom.“