Dómara­nefnd KKÍ segir Kristófer ekki hafa átt skilið brott­rekstur eða leik­bann

Atvikið sem um er ræðir snýr að Kristófer Acox, leikmanni Vals, og Jordan Semple, leikmanni Þórs. Semple var ekki með í leik liðanna í gær, sunnudag, þegar Valur jafnaði metin í einvíginu í 2-2.

Eftir leik mætti Lárus Jónsson, þjálfari Þórs, og sagði „þessum leikmanni hjá Val er búið að takast sitt ætlunarverk.“ Þar átti hann við þá staðreynd að Semple hefði farið úr axlarlið eftir samskipti sín við Kristófer. Farið far yfir atvikið í Körfuboltakvöldi bæði fyrir og eftir leikinn í gær.

Í dag, þriðjudag, baðst Lárus svo afsökunar. Hann sagðist ekki hafa ætlað að gera Kristófer upp ásetning, enda geti hann með engu móti sagt til um hvort um viljaverk hafi verið að ræða.

„Það er ekki mitt hlutverk að vera dómari í þessu máli en ég hef mikinn metnað fyrir því að deildin okkar verði sem best. Góð deild verður aldrei betri heldur en leikmennirnir sem spila leikinn. Það er því mjög miður þegar alvarleg brot verða þess valdandi að góðir leikmenn sem við viljum sannarlega sjá kljást á vellinum geta ekki spilað leikinn fagra,“ sagði Lárus einnig.

Nú hefur KKÍ gefið frá sér yfirlýsingu. Þar segir að allir aðilar innan dómaranefndar sambandsins, innlendir sem og erlendir, hafi verið sammála að Kristófer hafi ekki átt skilið brottrekstur né leikbann.

Yfirlýsingu KKÍ má sjá í heild sinni hér að neðan.