Sjáðu stórkostlegan sprett Rafaels Leao og tvennu Rodrygos

Á Diego Maradona leikvanginum í Napoli tóku heimamenn á móti AC Milan. Olivier Giroud kom Milan yfir á markamínútunni, þeirri 43., eftir stórkostlegan undirbúning Rafaels Leao sem brunaði upp allan völlinn og lagði boltann á Giroud sem skoraði af öryggi. Fyrr í leiknum hafði Alex Meret varið vítaspyrnu Frakkans.

Napoli tapaði fyrri leiknum, 1-0, og þurfti því tvö mörk til að komast áfram. Khvicha Kvaratskhelia fékk upplagt tækifæri til að skora en Mike Maignan varði víti hans. Í uppbótartíma jafnaði Victor Osimhen fyrir Napoli en það dugði ekki og Milan fór áfram, 2-1 samanlagt.

Real Madrid sigraði Chelsea, 0-2, á Stamford Bridge. Brasilíumaðurinn Rodrygo skoraði bæði mörk Evrópumeistaranna sem eru komnir í undanúrslit Meistaradeildarinnar í ellefta sinn á síðustu þrettán árum. Real Madrid vann einvígið, 4-0 samanlagt, og mætir annað hvort Bayern München eða Manchester City í undanúrslitum Meistaradeildarinnar.

Chelsea er aftur á móti úr leik og hefur tapað öllum fjórum leikjunum eftir að Frank Lampard tók við liðinu.

Átta liða úrslitunum lýkur með leikjum Bayern og City og Inter og Benfica í kvöld.