Katla skoraði 24 sekúndum eftir að hún kom inná og stelpurnar með fullt hús

Íslensku stelpurnar unnu alla þrjá leiki sína á mótinu og skoruðu í þeim ellefu mörk. Frábær frammistaða hjá framtíðarleikmönnum kvennalandsliðsins.

Stjörnustelpurnar Snædís María Jörundsdóttir og Sædís Rún Heiðarsdóttir skoruðu í fyrri hálfleik og Þróttarinn Katla Tryggvadóttir skoraði síðan tvívegis eftir að hafa komið inn á sem varamaður í þeim síðari.

Snædís María Jörundsdóttir kom íslenska liðinu í 1-0 á 9. mínútu eftir frábæran undirbúning frá Sædísi Rún Heiðarsdóttur. Sædís Rún vann boltann og lagði boltann fyrir á Snædísi eftir að þær höfðu áður farið í skemmtilegt þríhyrningaspil.

Sædís Rún skoraði síðan sjálf á 20. mínútu eftir frábæran sprett upp miðjuna og þrumuskot fyrir utan teig í bláhornið.

Wales náði að minnka muninn snemma í seinni hálfleiknum en þá var komið að ótrúlegri innkomu Kötlu Tryggvadóttur.

Katla kom inn á sem varamaður eftir nákvæmlega sextíu mínútur og 24 sekúndum síðar var búin að skora þriðja markið. Í raun liðum bara fjórtán sekúndur frá því að leikurinn fór aftur í gang þar til að Katla skoraði.

Hún vann boltann sjálf í háspressunni, kom sér framhjá varnarmanni, lék inn í teig og skoraði með laglegu skoti í stöngina og inn.

Katla skoraði síðan aftur sextán mínútum síðar þegar hún fylgdi eftir vítaspyrnu sem hún fékk en lét verja frá sér.

Íslensku stelpurnar enduðu því með fullt hús stiga á mótinu en þær höfðu áður unnið sigra á Portúgal og Póllandi. Fyrsti leikurinn á móti Póllandi vannst 4-2 og leikur tvö vannst 3-2 á móti Portúgal.

Fyrirliðinn Sædís Rún og Katla voru markahæstar hjá íslenska liðinu á mótinu með fjögur mörk hvor en þær skoruðu í öllum leikjum liðsins. Snædís María var síðan með tvö mörk á mótinu.

Margrét Magnúsdóttir er þjálfari íslenska liðsins og greinilega að gera mjög flotta hluti með stelpurnar.