Erlent

Skilgreina Wagner sem alþjóðleg glæpasamtök

Samúel Karl Ólason skrifar
John Kirby, talsmaður þjóðaröyriggisráðs Hvíta hússins, sagði frá ætlunum Bandaríkjamanna varðandi Wagner Group á blaðamannafundi í gærkvöldi.
John Kirby, talsmaður þjóðaröyriggisráðs Hvíta hússins, sagði frá ætlunum Bandaríkjamanna varðandi Wagner Group á blaðamannafundi í gærkvöldi. AP/Evan Vucci

Yfirvöld í Bandaríkjunum ætla að skilgreina rússneska málaliðahópinn Wagner Group sem alþjóðleg glæpasamtök. Í kjölfar þess verður hópurinn beittur viðskiptaþvingunum sem takmarka eiga umsvif hópsins á heimsvísu.

John Kirby, talsmaður þjóðaröryggisráðs Hvíta hússins, tilkynnti þetta í gær og sagði von á enn frekari aðgerðum gegn málaliðahópnum, sem hefur verið mjög umsvifamikill í Úkraínu. Hópurinn er einnig með viðveru í Mið-Austurlöndum, Afríku og víðar.

Málaliðar hópsins hafa margsinnis verið sakaðir um ýmis ódæði en Wagner Group hefur verið kallaður „skuggaher Rússlands“.

Sjá einnig: Wagner-liði vill hæli í Noregi

Kirby sýndi myndefni úr gervihnetti sem hann sagði sýna lest frá Rússlandi í Norður-Kóreu þann 18. nóvember. Lestin hafi verið notuð til að kaupa hergögn af Norður-Kóreu, sem er brot á viðskiptaþvingunum gegn einræðisríkinu, og flytja þau til Úkraínu. Kirby sagði Wagner hafa keypt eldflaugar af Norður-Kóreu.

Sjá einnig: Tóku eigin málaliða af lífi með sleggju

Áhugasamir geta horft á blaðamannafund Kirby í gær hér að neðan. Það er í upphafi fundarins sem Kirby sýnir myndefni úr gervihnöttum sem hann segir sýna Wagner Group kaupa hergögn frá Norður-Kóreu. Myndefni þessu verður einnig deilt með öryggisráði Sameinuðu þjóðanna og rætt á þeim vettvangi.

Wagner er í eigu rússneska auðjöfursins Yevgeny Prigozhin, sem tengist Vladimír Pútin, forseta Rússlands, nánum böndum. Prigozhin er gjarnan kallaður „kokkur Pútíns“ þar sem hann rak veitingastað í St. Pétursborg sem Pútin sótti reglulega.

Prigozhin hefur einnig gert umfangsmikla samninga við rússneska ríkið og framleiðir meðal annars mat fyrir skólabörn og hermenn í Rússlandi. Hann er einnig sagður fjármagna rekstur Internet Research Agency sem er gjarnan þekkt sem tröllaverksmiðja Rússlands. Þá er hann eftirlýstur í Bandaríkjunum vegna afskipta IRA af forsetakosningunum 2016.

Sjá einnig: Upplýsingahernaður háður úr „Tröllaverksmiðju“ í Pétursborg

Auðjöfurinn viðurkenndi nýverið að hann ætti Wagner Group, eftir að hafa um árabil barist með kjafti og klóm gegn því að vera bendlaður við málaliðahópinn.

Wagner Group hefur ráðið mikinn fjölda manna beint úr fangelsum Rússlands. Prigozhin fór til nokkurra fangelsa í Rússlandi og hét þeim frelsi fyrir sex mánaða þjónustu í Úkraínu.

Kirby sagði í gær að áætlað væri að Prigozhin eyddi um hundrað milljónum dala á mánuði í rekstur Wagner vegna stríðsins í Úkraínu. Hann sagði einnig að talið væri að Wagner hefði um fimmtíu þúsund málaliða í Úkraínu og að um áttatíu prósent þeirra hefðu verið ráðnir úr fangelsum Rússlands.

Þá sagði Kirby að myndast hefði spenna milli Wagner og rússneska hersins.

Prigozhin hefur aukið umsvif sín í rússneskri pólitík í kjölfar innrásar Rússa Í Úkraínu og eru uppi vangaveltur um að hann vilji stilla sér upp sem mögulegum arftaka Pútíns.

ESB beitti Wagner refsiaðgerðum

Evrópusambandið beitti Wagner Group og menn sem að málaliðahópnum koma refsiaðgerðum í fyrra. Sambandið sagði málaliða Wagner hafa brotið gegn mannréttindum fólks og framið ýmis brot eins og pyntingar, aftökur og ógnanir gegn óbreyttum borgurum.

Sjá einnig: Hermenn og rússneskir málaliðar tóku hundruð af lífi í Malí

Í yfirlýsingu ESB sagði að Wagner Group væri fjármagnaður af Prigozhin. Þá staðhæfði hann að hann tengdist málaliðahópnum ekki á nokkurn hátt.

Meðal þeirra sem beittir voru refsiaðgerðum var Dimitrí Utkin, fyrrverandi útsendari GRU, leyniþjónustu rússneska hersins, og einn af stofnendum hópsins. Hann er er skreyttur nasista-húðflúrum. Þá er málaliðahópurinn sagður vera kallaður Wagner Group vegna þess að Richard Wagner hafi verið eitt af uppáhalds tónskáldum Adolfs Hitler.

Utkin er meðal annars sakaður um að hafa fyrirskipað pyntingu og morð á sýrlenskum liðhlaupa.


Tengdar fréttir

Serbar æfir vegna auglýsinga Wagner málaliðahópsins

Rússneskt fréttamyndskeið þar sem serbneskir sjálfboðaliðar eru sagðir undirbúa sig undir að berjast við hlið Rússa í Úkraínu hefur vakið mikla reiði í Serbíu. Um er að ræða myndskeið framleidd af Wagner-málaliðahópnum, þar sem Serbar eru hvattir til að ganga til liðs við hópinn.

Pútín skiptir um herforingja í Úkraínu

Sergei Shoigu, varnarmálaráðherra Rússlands, tilkynnti í dag að Valery Gerasimov, formaður herforingjaráðs Rússlands, muni taka yfir stjórn innrásar Rússa í Úkraínu. Gerasimov tekur við af herforingjanum Sergei Surovikin, sem hefur verið yfir innrásinni undanfarna þrjá mánuði.

Kokkur Pútíns segir hvert hús í Bakhmut vera virki

Rússneski herinn á í basli með að brjóta varnir Úkraínumanna við Bakhmut á bak aftur þar sem „hvert hús er virki“, samkvæmt Yevgeny Prigozhin, eiganda Wagner Group málaliðahópsins. Hann og Wagner hafa leitt viðleitni Rússa við að ná tökum á bænum um mánaða skeið en víglínunum þar hefur verið lýst sem „hakkavél“.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×