A-riðill á HM í Katar: Heima­menn fall­byssu­fóður eða gerist eitt­hvað ó­vænt?

Vísir telur niður í heimsmeistaramótið í Katar sem hefst 20. nóvember næstkomandi. Á næstu dögum tökum við fyrir einn riðil í keppninni á hverjum degi og að þessu sinni er það A-riðillinn sem fær á sig sviðsljósið.

A-riðillinn býður ekki aðeins upp á gestgjafanna sjálfa heldur lið frá fjórum mismunandi heimsálfum og aðeins eitt þeirra var með á síðasta heimsmeistaramóti í Rússlandi.

Katar er auðvitað ekki bara að halda heimsmeistaramótið því auðvitað er landsliðið þeirra að spila þar líka. Katar hefur aldrei verið nálægt því að komast á heimsmeistaramótið og lengi vel óttuðust menn um að liðið gæti fengið algjör útreið á mótinu. En eru Katarbúar svona lélegir?

Katarliðið er auðvitað nokkurs konar málaliðalið, fullt af leikmönnum sem fengu katarskt ríkisfang á síðustu árum í bland við lítt þekkta leikmenn sem fæddust í Katar. Liðið er þó kannski ekki eins slakt og sumir óttuðust. Katar reyndi fyrst að sækja fullmótaða leikmenn úr öðrum löndum en þegar FIFA setti þeim stólinn fyrir dyrnar þar þá fóru þeir að sækja unga erlenda leikmenn og ala þá upp í sinni eigin akademíu þar sem engu var til sparað.

Katarmenn stungu aðeins upp í þá sem töldu þá vera fallbyssufóður með frammistöðu sinni í Asíubikarnum 2019 og sem gestalið í Gullbikar Norður og Mið-Ameríku 2021. Katar varð Asíumeistari eftir sigur á Japan í úrslitaleik og tapaði naumlega á móti Bandaríkjunum í undanúrslitum Gullbikarsins.

Það breytir þó ekki því að flestir eru á því að landslið Hollendinga fari örugglega áfram og það verði síðan Senegal og Ekvador sem berjist um hitt sætið. Svo vill til að lokaleikur riðilsins er einmitt leikur á milli Senegal og Ekvador.

Senegal er sigurstranglegra en Ekvador eru með ungt lið tilbúið að taka næsta skref sem gæti verð á þessu HM. Senegal er ríkjandi Afríkumeistari og vann þar á undan silfur í sömu keppni 2019. Ekvador er með ungt og spennandi lið sem skoraði 27 mörk í 18 leikjum í undankeppni Suður-Ameríku.

Senegalar urðu hins vegar fyrir miklu áfalli í gær þegar Sadio Mane meiddist í leik með Bayern og eins og staðan er núna þá lítur út fyrir það að hann verði ekki með á mótinu. Það er ljóst að Senegal er ekki sama lið án síns besta leikmanns.

Það búast auðvitað flestir við að Hollendingar fari létt með þennan riðil. Hollendingar eru með í fyrsta sinn síðan í Brasilíu 2014 en þeir komust ekki til Rússlands 2018. Hollenska liðið hefur aftur á móti fengið verðlaunasæti á síðustu tveimur heimsmeistaramótum sínum, varð í þriðja sætið 2014 og tapaði á móti Spáni í úrslitaleiknum 2010. Hollenska liðið er uppfullt af leikmönnum úr stærstu félögum Evrópu og þá þyrstir í árangur eftir litlaus stórmót undanfarin átta ár.

Þótt að hollenska liðið sé fullt af flottum leikmönnum þá vantar liðið tilfinnanlega framherja, dæmigerða níu. Hvort það hái þeim verður að koma í ljós en hæfileikarnir eru miklir á öðrum stöðum í liðinu.

Þjálfarar liðanna í A-riðlinum:

Holland - Hinn 71 árs gamli Hollendingur Louis van Gaal sem tók í þriðja sinn við landsliðinu árið 2021. Þjálfaði liðið einnig 2000-01 og 2012-14.

Senegal - Hinn 46 ára gamli Aliou Cissé hefur þjálfað landsliðið frá 2015 og lék sjálfur með landsliðinu frá 1999 til 2005. Hann var fyrirliði 2002 liðsins sem er það besta í sögu Senegal á HM.

Ekvador - Hinn 60 ára gamli Argentínumaður Gustavo Alfaro hefur þjálfað landsliðið frá 2020 en hann hefur verið knattspyrnuþjálfari í þrjátíu ár.

Katar - Hinn 46 ára gamli Spánverji Félix Sánchez hefur þjálfað landsliðið frá 2017 en þar áður var hann með 19 ára og 23 ára landslið þjóðarinnar.

Stærstu stjörnurnar:

Edouard Mendy (Senegal) - 30 ára markvörður Chelsea átti frábæra innkomu í enska úrvalsdeildarfélagið á síðustu leiktíð og var valinn besti markvörður Afríkukeppninnar 2022.

Kalidou Koulibaly (Senegal) - 31 árs miðvörður Chelsea sem sló í gegn hjá Napoli og hefur verið fyrirliði landsliðs Senegals undanfarin ár.

Virgil Van Dijk (Hollandi)- 31 árs miðvörður Liverpool sem hefur lengi verið talinn einn af bestu varnarmönnum heims.

Frenkie de Jong (Hollandi)- 25 ára miðjumaður Barcelona sem hefur verið orðaður við Manchester United og fleiri ensk lið í marga mánuði.

Enner Valencia (Ekvador) - 32 ára sóknarmaður Fenerbahce í Tyrklandi og áður West Ham og Everton, sem er markahæsti landsliðsmaður Ekvador frá upphafi með 35 mörk í 74 leikjum.

Moisés Caicedo (Ekvador) - 21 árs miðjumaður Brighton & Hove Albion í ensku úrvalsdeildinni sem hefur verið fastamaður aftarlega á miðjunni.

Almoez Ali (Katar) - 26 ára sóknarmaður Al-Duhail sem varð markakóngur Asíukeppninnar 2019 með níu mörk þar mark með hjólhestaspyrnu í úrslitaleiknum.

Hassan Al-Haydos (Katar) - 31 árs sóknarmaður Al-Sadd sem hefur skorað 124 mörk fyrir félagsliðið sitt og 36 mörk fyrir landsliðið. Leikjahæsti landsliðsmaður í sögu Katar.

Fylgist með þessum:

Pape Matar Sarr (Senegal) - 20 ára miðjumaður Tottenham sem spilaði það vel fyrir Metz í Frakklandi að Spurs keypti hann. Fær lítið að spila hjá Conte en hefur fengið tækifæri með landsliðinu.

Jurriën Timber (Holland) - 21 árs varnarmaður Ajax sem getur spilað margar stöður í vörninni og hefur skapað sér nafn hjá Ajax og hollenska landsliðinu.

Gonzalo Plata (Ekvador) - 22 ára framherji Valladolid sem skoraði þrjú mörk í undankeppninni og hjálpaði spænska liðinu að komast upp.