Arna Sif Ásgrímsdóttir, varnarmaður Vals, var valin best en Valskonur urðu bæði Íslands- og bikarmeistarar.

Katla Tryggvadóttir, sem er aðeins 17 ára, skoraði fimm mörk á fyrsta heila tímabilinu sínu fyrir Þrótt og var valin efnilegust. Spjall þeirra við Helenu Ólafsdóttur í Bestu mörkunum má sjá hér að neðan.

Arna sagðist ekki hafa reiknað með því að verða valin best allra:

„Ég er ánægð með mitt en svona verðlaun fá oft þær sem skora mikið eða eru meira í sviðsljósinu. Maður hefur kannski ekki verið mikið í því en þetta er bara skemmtilegt,“ sagði Arna sem var frábær í liði Vals og viðurkenndi að tímabilið væri sennilega sitt besta:

Var mun meira í „reddingum“ áður

„Já, ég held ég geti alveg sagt það. Stöðugasta tímabilið. Valur er að spila öðruvísi fótbolta en ég er vön að gera, alla vega síðustu ár. Þá hef ég verið pjúra varnarmaður, mikið að verjast og í reddingum hér og þar, en núna meira með boltann og að taka þátt framar á vellinum, sem hefur gengið mjög vel,“ sagði Arna en hún kom til Vals frá Þór/KA eftir síðustu leiktíð. Litlu munaði þó að hún færi frekar til Skotlands, þar sem hún varð skoskur meistari með Glasgow City 2021.

„Ég var ákveðin í að breyta til en ég var á leiðinni til Skotlands og það eina sem ég átti eftir að gera var að skrifa undir. Það var allt klárt þegar ég heyrði af áhuga Vals og Péturs [Péturssonar, þjálfara Vals]. Mér fannst það meira spennandi; að vera heima og deildin er klárlega sterkari hér en þar. Það eru margir leikmenn í Val sem mig langaði að spila með. Eftir að ég heyrði frá þeim var þetta frekar einfalt val,“ sagði Arna en spjallið við þær Kötlu má sjá hér að ofan.