Bíó og sjónvarp

Slegið á eftirvæntinguna þann 9. nóvember

Tryggvi Páll Tryggvason skrifar
Dominic West leikur Karl og Elizabeth Debicki leikur Díönu í fimmtu þáttaröð The Crown.
Dominic West leikur Karl og Elizabeth Debicki leikur Díönu í fimmtu þáttaröð The Crown. Netflix

Æstir aðdáendur sjónvarpsþáttarins The Crown geta farið að koma sér upp lager af poppi eða öðru snakki að eigin vali. Fimmta þáttaröð þáttanna fer í sýningu þann 9. nóvember næstkomandi.

Þættirnir fjalla um ævi og störf Elísabetar annarrar Bretadrottningar og fjölskyldu hennar. Þættirnir, sem sýndir eru á Netflix, hófu göngu sína árið 2016 og hafa reynst afar vinsælir.

Sem kunnugt er lést Elísabet drottning á dögunum. Við andlát hennar virðist hafa skapast mikill áhugi á ævi hennar, sem birtist meðal annars í því að fyrsta þáttaröð The Crown skaust aftur á topp tíu lista Netflix yfir þá þætti sem mest var horft á í vikunni sem drottningin lést.

Netflix hefur nú gefið út að fimmta þáttaröðin, sem beðið hefur verið af meiri eftirvæntingu en venjulega, fer í sýningu þann 9. nóvember næstkomandi. Framleiðendur þáttanna hafa lítið vilja gefa upp um efni þáttaraðarinnar.

Ljóst er þó, miðað við hvar skilið var við í lok fjórðu þáttaraðar og þeirra nýju hlutverka sem bætast við nú, að umfjöllunarefnið verður tíundi áratugurinn. Umræddur áratugur reyndist mjög stormasamur fyrir konungsfjölskylduna. Einkum vegna andláts Díönu prinsessu sem lést af slysförum en einnig vegna tíðra skilnaða innan konungsfjölskyldunnar.

Sú breyting verður einnig frá síðustu þáttaröð að nýjir leikarar taka við hlutverkum helstu persónu þáttanna. Þannig mun Imelda Staunton taka við af Oliviu Colman sem Elísabet drottning. Jonathan Pryce tekur við af Tobias Menzies sem Filippus, eiginmaður Elísabetar.

Þá taka nýjir leikarar einnig við sem Díana prinsessa og Karl prins, sem nú er orðinn konungur. Dominic West leikur Karl og Elizabeth Debicki leikur Díönu.

Þá mun Salim Daw og Khalid Abdalla leika feðgana Mohamed Al-Fayed og Dodi Al-Fayed, en sá síðarnefndi lést ásamt Díönu í bílslysi í París árið 1997.


Tengdar fréttir

Áhorf á Krúnuna eykst um 800 prósent

Áhorf á Netflix þættina Krúnan, eða The Crown, hefur aukist um 800 prósent frá því að Elísabet II Bretadrottning féll frá.

Netflix frestar tökum á The Crown

Peter Morgan höfundur Netflix þáttanna The Crown hefur tilkynnt að tökum verði frestað ótímabundið af virðingu við drottninguna. Elísabet Bretlandsdrottning lést í gær 96 ára að aldri, en Morgan hefur áður talað um að þættirnir séu „ástarbréf“ til hennar. 






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.