Menning

KÚNST: „Við erum öll í grunninn nakin“

Dóra Júlía Agnarsdóttir skrifar
Júlíanna Ósk Hafberg er viðmælandi í nýjasta þætti af Kúnst.
Júlíanna Ósk Hafberg er viðmælandi í nýjasta þætti af Kúnst. Vísir/Vilhelm

Fjöllistakonan Júlíanna Ósk Hafberg er hugfangin af mjúkri, berskjaldaðri og kvenlægri orku en vinnustofa hennar og verk endurspegla það með sanni. Júlíanna Ósk notast við fjölbreytta miðla í listsköpun sinni, smíðar sína eigin ramma, opnaði vinnustofu í miðbænum og lætur ekkert stoppa sig en hún er viðmælandi í nýjasta þætti af Kúnst.

Hér má sjá þáttinn:

Klippa: KÚNST - Júlíanna Ósk Hafberg

Nekt í náttúrulegum kringumstæðum

„Ég stundaði mikla módelteikningu þannig ég var vikulega að fara og teikna nakin módel. Ég varð rosalega hugfangin af líkamanum, sérstaklega kvenlíkamanum og formunum og aðallega að sjá hann undir náttúrulegum kringumstæðum,“ segir Júlíanna Ósk Hafberg um innblástur fyrir stórum verkum hennar af nöktum konum. Hún bætir við að nekt sé eðlilegt viðfangsefni sem ætti ekki að vera feimnismál en birtingarmyndir nektar hafi þó verið ansi afmarkaðar og kynferðislegar í dægurmenningu.

„Við sjáum oftast nektina og sérstaklega kvennektina bara undir formerkjum einhvers kynferðislegs nú í dag. Það er bara í klámi, kynlífi og bíómyndum en ég var allt í einu farin að sjá heilbrigða nekt á miklu náttúrulegri hátt í alls konar fallegum og náttúrulegum stellingum. Það var það sem mig langaði að gefa rými fyrir og það er það sem konuverkin mín fjalla um. 

Að gefa kvenlíkamanum og kvennektinni pláss til að fá að vera til án þess að það sé hlutgert eða kyngert.“

Hún segir fjölbreytileikann hafa rutt sér til rúms að undanförnu hvað varðar ólíkar birtingarmyndir nektar og finnst mikilvægt að vera hluti af breytingunni.

„Við erum öll í grunninn nakin.“

Þættirnir KÚNST með Dóru Júlíu rannsaka hinar ýmsu víddir listsköpunar, ólíka listmiðla og sköpunargleði hjá íslenskum samtíma listamönnum ásamt því að fá að skyggnast bak við tjöldin og heyra um persónulegt líf þeirra.


Tengdar fréttir

Listasýningar með ömmu í æsku kveiktu á sköpunargleðinni

Lágmyndir hafa heillað listamanninn Pétur Geir Magnússon frá ungum aldri og í dag hefur hann fært þær inn í nútímalegt form í listsköpun sinni. Pétur Geir, sem er búsettur og starfræktur í Stokkhólmi, er með bakgrunn í grafískri hönnun en kallar sig hagnýtan myndlistarmann og nálgast listaverk sín á einstakan hátt. Pétur Geir er viðmælandi í nýjasta þætti af KÚNST, sem er jafnframt fyrsti þáttur í seríu tvö.

KÚNST: Inn­sýn í fram­tíðar­heim listarinnar

Í þessum áttunda og jafnframt lokaþætti af Kúnst þar til í haust heimsóttum við útskriftarsýningu myndlistar- og hönnunarnema við Listaháskóla Íslands. Sýningin bar titilinn Verandi vera og var sýnd á Kjarvalsstöðum dagana 21. til 29. maí.

„Líf mitt er meira og minna bara einn gjörningur“

Snorri Ásmundsson er viðmælandi í nýjasta þætti af Kúnst. Hann er listamaður sem takmarkar sig ekki við einn listmiðil, ber marga hatta og er meðal annars gjörningalistamaður, myndlistarmaður, lífskúnstner og frambjóðandi svo eitthvað sé nefnt.

KÚNST: Hughreysting til vinkonu varð að einhvers konar alheims orku sannleika

Myndlistarkonan Kristín Dóra Ólafsdóttir er þekkt fyrir grípandi textaverk í bland við falleg form á striga. Hún er mikil talskona dagbókarskrifa og segir skrifin gjarnan einhvers konar leit að sannleika en hefur gaman að því hvernig orðin geta aðlagað sig að breyttum aðstæðum hverju sinni. Kristín Dóra er viðmælandi í nýjasta þætti af KÚNST sem er að finna neðar í pistlinum.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.